رَسولون اَعمال 12 - کتاب مقدس به زبان تالشي - گویش مرکزی

یعقوبی کشتِه

¹ اَ زَمانیکا، هیرودیس پادیشا چن نفری کن کلیسا آدَمونکا بین، دمَندَ اَوون اَیذَت آزارکردِ.

² هیرودیسی فِرمونینَه، یوحنی برا، یعقوبیشون شَمشیرینَه کِشتَه.

³ و وَقتی ویندِشَه چَی اِم کار یَهودیون خَش آکَردِشَه، پطروسی نی ویلاخِنیشَه. اِم ایتفاقِن فَطیرَ عیدَ روجون دلَکا دَگِنِستَه.

⁴ هیرودیس، پطروسی ویلاخِنیِه بَه دوملَه، بَی زیندانیکا دَرَفَندِش و چار دَستَه، چار نَفرِ چَی پاستِه را آناشَه. و اَپیش بَه پِسَخه عیدی بَه دوملَه، گِردی وَریکا پطروسی مُحاکیمَه بکَرِ.

⁵ پس پِطروسِشون زیندانیکا غَم هَردَ، ولی کِلیسا پطروسی خونه یَژَن خدا وَریکا دِوا اَکَرین.

⁶ ایی شَو، اَ روجی بَه نَه کن هیرودیس اَپیش بَه پطروسی موحاکیمَه بکَرِ، پطروسی دِ زِنجِلینَه دَبَستَشون بَه و دِ گِلَه سَربازی وَسَطیکا خت بَه، و نیگَبانِن نی زیندانی بَرَنگا نَ کا کِشَک اَدَرین.

⁷ ایکَرَ ایی خداوندی ایلَه فرشتَه اَیر آبَه و نوری زیندانی دِلَکا شَپَق ژِشَه. فرشتَه پِطروسی طَفی ژِشَه و بَی خاویکا پِکَردِش، و واتِش: «زو پِب! » جَخت زِنجیلِن چَی بالیکا آج آبین و ویگِنِستین.

⁸ فرشتَه پطروسیش واتَه: «اِشتِه مینی دَبَست و پا غَبی دَکَه.» پِطروس نی هَتَه کردش. چَی بَه دوملَه فرشتَه بَی واتِش: «اِشتَن رَدا بَشتَن کا پِپِش و چمن دوملَه بِه.»

⁹ پِطروس چَی دوملَه زیندانیکا بِرِن برشَه. پِطروس باوَر نَکَریَه اَ چیی ایی کن فرشتَه اَنجوم دَرِ، واقِعی ببو، بَسکَم گَمون اَکَریَه کن کا رویا ویندِ.

¹⁰ اَیِن اَوَّل و دِوومه نیگَبانونکا دَیوَردین و آسونَه دَروازَ را آرَستین کن شَهری طَرَف آج آرَبیَه. دَروَازَ اِشتَرا چَوون نَ کا آج آبَه. اَیِن بِرنیرا شین و هَتَه کن کایبین شِه، ایکَرَ ایی فرشتَه غَیب آبَه.

¹¹ اَموقه پِطروس هوش آرمَه و واتِش: «ایسَه دِ یَقین بَموستیم کن خداوند اِشتَن فرشتَه عَندَشَه و بَمن هیرودیسی چینگیکا و اَ اَیذَت آزاری کن قام یَهود چَی اینتظاریکا بینَه تا چمن سَردِرِ با، اَراخِمونیَشَه.»

¹² وقتی پِطروس اِمیکا سَر آگِنَه، مَریَمی کَرا شَه، کن، اَ یوحنی کن بَی مَرقُس نی خِلِه اَکَرینَه، نَنَه بَه. اَ جِگاکا خَیلیِن جَم آبَه بین و دِوا اَکَرین.

¹³ وَقتی کن پِطروس کَه بَرَنگا کوستِشَه، ایلَه کِرِچی کن چَی نوم رودا، بَه آمَه تا بَرَنگا آکَرِ.

¹⁴ وَقتی کن اَ کِرِچی پطروسی سَسِش آزنِستَه، وِرَ خَشی خونِه، بَرَنگا آکَرِدِ عَوَض، بتاو بتاوینَه کَه دِلَرا آگَردِسته و واتِش: «پِطروس بَرَنگا پِشتیکارَ!»

¹⁵ اَیِن کِرِچیشون واتَه: «توریشَه؟» ولی وَقتی چَی ایصراری ویندِشون، واتِشون: «لابد چَی فرشتَه یَه.»

¹⁶ اِم هنگومیکا، پِطروس هَتَه بَرَنگا اَژَنیَه. آخیر بَسَر وَقتی بَرنگاشون آکَردَ، چَی ویندِ خونِه حَیرون مَندین.

¹⁷ پِطروس اِشتَن بالی ایشا نَه، اَوون ساکیت آکَردِش و چَوونرا جیگیر کَردِشَه کن چَنتَه خداوند بَی زیندانیکا اَراخِمونیَشَه و واتِش: «اِم ماجیرا یعقوب و دییَرَ برا اونرا خبر بدَرَ.» چَی به دوملَه اَوونَّه دییَرَجِگایی را شَه.

¹⁸ سَو سَه، سربازون دِلَکا خَرا خِلِه ایی راست آبَه، اِمی خونِه کن نَزنینَه پطروسی سَر چِه آمَه یَه.

¹⁹ هیرودیس فِرمون داشَه تا گِردِ جِگا اونکا پطروسی دوملَه بِگَردِن؛ وقتی کن اَشون پَیدا نِکَردَ نیگَبانونکا باز خواس کَردِشون و چَوون کشتِه حِکمی آداشَه. چَی بَه دوملَه پِطروس ولَته یَهودیَه کا شهر قِیصَریَه را شَه و مدتی اَ جِگاکا مَندَ.

هیرودیسی مردِ

²⁰ هیرودیس شهرِنِه صور و صِیدونی آدَمونرا آسرَنگِستَه بَه. اِمی خونِه، اَ دِ گلَه شهری آدَمِن یندِنَه چَی وَر شینَه وایجازَ اَپیشون بَه تا هیرودیسی بوینن. اَیِن پادیشا دَستَک، بِلاستوسیشون راضی دَروَردَ تا پادیشا نَه آشتی بِکَن، اِمی خونه کن چَوون هَردَ چیی و زندَگی اَساس هیرودیسی وِلَتیکا آی.

²¹ اَ روجیکا کن یَندِنَه قَرارِشون نوعَه به، هیرودیس اِشتَن پادیشایی رَداش دَکردَ و تَختی سَردِرِ نِشتَه و جَماعتیرا سوخنرانیش کردَ.

²² مردوم لَسَّه ژِشون: «اِم ایلَه خِدااون سَسَه، نِه آدَمی سَس!»

²³ جَخت، خداوندی ایلَه فرشتَه هیرودیسیش ژَ، اِمی خونِه کن خِداش شکوه جلال آدوعَش نِبَه. اَموقه بولبورزَ اِن چَی جَندَکی هَردِشونَه و اَ مَردَ.

²⁴ ولی خدا کَلام ویشتَر نَ را اَشیَه و پَخش آرَبیَه.

²⁵ بَرنابا و شائول اِشتَن مَاموریَتِشون تَمون آکردَ، و اورشَلیمیکا ویگَردِستین و یوحنا کن بَی مَرقُس خِلِه اَکَرینَه نی، اِشتَنَه وَردِشون.