رَسولون اَعمال 11 - کتاب مقدس به زبان تالشي - گویش مرکزیپِطروس کلیسارا گزارش دَرِ 1 رَسولِن و برا اِن گِردِ یَهودیَه کا دَرَستِشون کن غَیر یَهودییِن نی خدا کَلامیشون قبول کردیَه. 2 پس وَقتی کن پِطروس شهر اورشَلیمیرا ویگَردِستَه، اَ کاولَه ایی کن سِنَت کَردِ رسمی قِبول دارینَه، پطروسیرا رِقنَه گَتِشونَه، واتِشون: 3 «ته سِنَت بَه نیَه آدَمون کَرا شیشَه و اوونَّه هَمسِفرَ بیش.» 4 پِطروس گِردِ ایتفاقون اَوَّلنَکا تا آخیر چَوونرا جیگیر کَردِشَ، واتِش: 5 «اَز شهر یافا کا کایبیم دِوا کَردِ کن خَلسَه کا، رویا دلَکا ویندِمَه چیی ایی هِنتَه یالَه سِفرَ ایی شیوار کن چار گوشَه کا ویرَشتَه بَه، آستامونیکا ویرمَه و بَمن آرَستَه. 6 وَقتی قَشنگینَه دَیَشتِم، چارپااِن و اَشیا و خَزَندَاِن و پَرَندَ اون چَی سَریکا ویندِم. 7 چَی بَه دومله سَسی چمن گوش آرَستَه کن اَواجیَه: ”پِطروس، پِب، سَر آبیر و بَه.“ 8 «ولی مِن جواب دوعَه: ”هرگز، خِداوَندا، اِمی خونِه کن اَز هیچ موقه حَروم و جیفینینَه چیی لِو ژَم نی.“ 9 «دِوومین کَرَ آستامونیکا سَس آمَه کن ”اَ چیی ایی کن خدا پاجا آکَردَشَه تِه جیفینین مَواج.“ 10 و اِم ایتفاق سِه کَرَ تیکرار بَه؛ چَی بَه دوملَه گِردِ اَ چییِون، آستامونیراشون کَفا بردَ. 11 «هَه موقِه کا، سِه نَفَر کن شهر قِیصَریَکا چمن وَر رَونَه آبَه بینَه، کَه ایرا کن اَز اَجِگاکا مَند بیم آرَستین. 12 خدا روح بَمنِش واتَه کن اَوونَّه بشوم و فرق نِنَم. اِم شَش برا نی بَمِنَه آمینَه، و اَمه اَ مِردی کَه دِلَه دَرمیمون. 13 اَ چَمَرا جیگیر کَردِشَه کن چِنتَه اِشتَن کَکا ایلَه فرشتَه ویندِشَه کن بَی واتَش بَه: ”کَسِنی شهر یافا را بَین تا شَمعونی کن بَی پِطروس نی خِلِه بَکَن، اِم جِگارا بوعَرِن. 14 اَ تِرا ایلَه پَیغومی بوعَردیَه کن چَی خونِه، تِه و اِشتِه کَه آدَمِن گِرد نیجات بَگَتیرون.“ 15 «وَقتی گَف ژِ دَمَندیم، خدا موقدسَه روح چَوون سَردِرِ ویرمَه، دِرِست هَتَه کن اَوَلیکا چَمه سَر ویرمَه. 16 اَموقه خداوندی واتَه گَفی یاد آرَفَندِمَه کن واتَش بَه: ”یحیی آوینَه تعمید اَدَریَه ولی شِمَه خدا موقدسَه روح نَه تعمید بَگَتیرون.“ 17 پس اَگَم خدا، هَه خَلایی کن چَمه ایمان وَردِ بَه دوملَه بَه عیسای مَسیحِ خداوند اَمه دوعَش بَه، اِمون نی آداشَه، اَز کیی بِبوم کن بِپیام خدا کاری نَه بیگِم؟» 18 وقتی اَیِن اِم گَفِنِشون درَستَه، دَمِریستین و خِداشون سِتایِش کَردَ، و واتِشون: «پس خدا غَیر یهودییون نی فرصَت دوعَشه تا اِشتَن گِناخونکا توبَه بِکَن و زَیرونَه زندَگی بَه دَست بوعَن!» اَنطاکیه کلیسا 19 اَ ایمان دارِنی کن استیفانی اَیذَت کردِ به دوملَه وِلاخ آبَه بین، تا فینیقیَه و قِپرس و اَنطاکیَه را سَفَر کَردِشون. اَیِن خدا کَلامی تاکه یَهودیونرا اِییلام اَکَرینَه و هِم. 20 ولی چَوون دِلَکا چَن نَفری قِپرس و قیرَوانی آدَمونکا بینَه. اَیِن وَقتی اَنطاکیَه را آرَستین، یونانیونَّه گَف ژِشون و عیسای خداوندی خَشَه خَبَری اَیِنِشون دوعَه. 21 خداوندی بال نی اَوونَّه دَرِ بَه و خَیلییِن ایمانِشون وردَ و خداوندی طَرَف آگَردِستین. 22 وقتی اِم خَبَر اورشَلیمی کلیسا را آرَستَه، بَرناباشون اَنطاکیَه را عَندَ. 23 وقتی بَرنابا اَجِگارا آرَستَه و خداوندی فِیضی ویندِش، خَش آبَه و گِردیش تَشویق کَردَ تا صِدقِه دِلینَه خداوندی وَفادار بِبون، 24 اِمی خونه کن بَرنابا چاکَه مِردی بَه و خدا موقَدَسه روح و ایمانیکا پَتلَمَه بَه. اِمی خاطِر وِرَ کاولَه ایی بَه خداوند ایمان وَردِشون. 25 پس بَرنابا .شهر تارسوسیرا شَه تا شائولی پَیدا بکَرِ. 26 و چَی پَیدا آبِه بَه دوملَه اَشون اَنطاکیَه را وَردَ. اَیِن اَ جِگاکا ایی سال کلیسا مردومینَه جَم آرَبین و برکَه وِرَ کاولَه ایی آموج اَدَرینَه. اَنطاکیَه کا بَه کن اَوَلین کَرَ را عیسی شاگِردِنشون مسیحی واتَه. 27 اَ روجون دِلَکا چَن گِلَه پَیغمبَر اورشَلیمیکا اَنطاکیَه را آمین. 28 ایلَه اَوونکا کن آگابوس نوم داری، راست آمَندَ و خدا روحینَه پیشگویی کَردِش کن چَتینَه قَحطیی ایی دِنیا گردِ جگا اونکا بومَیَه. اِم قحطی کِلودیوسی حِکومَتی زَمانَه کا ایتفاق دَگِنِستَه. 29 پس شاگِردِن تَصمیمِشون گتَه کن هَرکَم هَر چَنَه بَشانَه، برا اونیرا کن یَهودیَه کا بَمَندینَه کمک بَینِن. 30 پس اِنتَرَ کردشونَه و خَلااِنی کن گِرد آکَردَشون بَه، بَرنابا و شائولی شون دوعَه، تا ایسبیَه ریشونرا بِبَرن. |
@ 2024 Korpu Company