رَسولون اَعمال 10 - کتاب مقدس به زبان تالشي - گویش مرکزیپِطروس و کُرنِلیوس 1 شهر قِصَریَه کا ایلَه رومیَه افسَری، کُرنِلیوس نوم اَمونیَه. کُرنِلیوس رومی گوردانی فَرماندَ بَه کن اَی گوردان ایتالیایی نی اَواجینَه. 2 کُرنِلیوس دیندارَ مِردی بَه، اَ و گردِ چَی کَه آدَمِن خدا تَرس بینَه. کُرنِلیوس دَستو دِلبازینَه دَس دَریسونرا آرَرَسیَه و یَژَن خداوندی دَرگا کا دِوا اَکَری. 3 ایی روج، ناهاری بَه دوملَه ساعت سِه نِزِکیکا، خدا ایلَه فرشتَش رویا دلَکا واضِح ویندِشه کن چَی وَر آمَه و واتِش: «کُرنِلیوس!» 4 کُرنِلیوس تَرسینَه بَی چَم دَشتِشَه و واتِش: «بلِه چمن سَروَر!» فرشتَه واتِش: «اِشتِه دِوا اِن و صَدَقَه اِن هِنتَه یادِگاریَه خَلایی شیوار خدا حِضوریرا آرَستَه. 5 ایسَه کَسِنی شهر یافارا بَینِن تا شمعون کن بَی پِطروس خِلِه بَکَنَه اِم جِگارا بوعَن. 6 اَ، شَمعون نومَه دباغی وَر بَمندیَه کن چَی کَه دَیرا کَناریکارَ.» 7 وَقتی اَ فرشتَه کن بَینَه گَف دَرِ بَه چَی وَریکا شَه، کُرنِلیوس دِ گِله اِشتَن پاسَریونکا و اِشتَن ایلَه وفادارَ سربازونکا، اِشتَن وَر خِلِه کَردِش. 8 کُرنلِیوس گِردِ ایتفاقون چَوونرا جیگیر کَردِش و اَیِنِش یافارا عَندِشه. 9 سَو سَه، ناهاری موقِه، وَقتی راکا بین وشَهری کا نِزِک آرَبین، پِطروس دِوا کردِ خونه کَه بونیرا پِشَه. 10 اَ، اَجِگاکا اَنشتاش بَه و اَپیش بَه چیی ایی بَرِ. هته کن غذا حاضیر آرَکَرینَه، پِطروس خَلسَه کا دَشَه. 11 اَ حالیکا ویندِشَه کن آستامونن آج آبین و چیی ایی هِنتَه یالَه سِفرَ ایی شیوار کن چار گوشَه کا ویرَشتَه یَه زَمینی طَرَفیرا، کا ویرمِه. 12 اَ سِفرَ هَر مودیل چارپا و خَزَندَ او پَرَندَ کا پَتلَمَه بَه. 13 هَه موقِه سَسی چَی گوشیرا آرَستَه کن اَواجیه: «پِطروس، پِب، سَر آبیر و بَه!» 14 پِطروس واتِش: «هرگز، خِداوَندا، اِمی خونه کن اَز هَیچ موقه حَروم یا جیفینینَه چیی ایی لِو ژَم نی.» 15 دِوومین کَرَرا اَ سَس آمَه کن اَواجی: «اَ چیی کن خدا پاجا آکَردَشَه، تِه جیفینین مَواج!» 16 اِم رویا سِه کَرَ تِکرار آبَه و چَی بَه دوملَه سِفرَ جَخت آستامونیراشون بَردَ. 17 هَه حالیکا کن پِطروس حَیرون اَ رویا مَعنی خونه فکر اَکَری، اَیِنی کن کُرنِلیوسی عَندَش بَه شَمعونی کَه ویندِشون و چَی کَه بَرَنگارا آرَستین. 18 اَیِن لَسَّنَه دَرَپَرسین: «شمعون کن بَی پِطروس باتین، اِم جِگاکا بَمندی؟» 19 پِطروس هَنوزَنی اَ رویا فِکریکا بَه کن خدا روح بَی واتِش: «دَیَس، سِه نَفَر اِشتِه دوملَه بَگَردِستین. 20 پِب و بِنیرا بش و اَوونَّه شِرا چیمَه میمَه مَکَه، اِمی خونِه کن اَز اَوون عَندمَه.» 21 پِطروس بِنیرا شَه و اَیِنِش واتَه: «اَز هَه ایمَه کن چَی دوملَه بَگَردِستیرون. شِمَه چِه خونِه آمَه اینَه؟» 22 اَیِن واتِشون: «رومیَه افسَر کُرنِلیوس اَمَش عَندَیَه. اَ درستکار و خدا تَرسَه مِردیَه و یَهودیِن نی گِرد بَیکا چاکه تَریفی دَرِن. اَ ایلَه موقدسَه فرشتَکا فِرمون گَتِشه کن اِشتِه دوملَه بَینِه و بَتِه اِشتَن کَه را صَلا بِژَنِه و اِشتِه گَفون دَرَسِه.» 23 پس پِطروس اَوون کَرا بَردِشَه تا چَی مِیمان بِبون. پِطروس سَو سَرا پِبَه و اَوونَّه شَه. شهر یافا بَعضی برا اونکا نی اَینَه شینَه. 24 اَیِن سَوسَرا شهر قِیصَریَه را آرَستین. کُرنِلیوس اِشتَن نِزِکَه خیشون و رَفِقون نی جَم آکَردَش بَه و چَوون آمِه را چَم بَرا بَه. 25 وَقتی پِطروس کَه دِلَه دَرمَه، کُرنِلیوس چَی اِستِقبالیرا شَه و چَی لِنگون نَ کا بَرگِنِستَه وبَی پَرستِش کَردِش. 26 ولی پِطروس اَی راست آکَردِشَه و واتِش: «پِب؛ اَز نی ایلَه اینسانیمَه.» 27 چَی بَه دومله هِنتَه کن بَینَه گَفا گَف بَه، کَه دِلَرا دَرمه و اَ جِگا کا یالَه جَماعَتیش ویندَ. 28 پِطروس اَیِنِش واتَه: «شِمَه اِشتَن بَموستیرون کن یَهودیونرا دییَرَ قامونَّه شِه آمِه کردِ یا چَوون کَه شِه، ایجازَشون نییَه. ولی خدا بَمِنِش آمونِستَه کن هیچ کَسی ناپاکوجیفینین نِواجِم. 29 پس وقتی چمن دوملَه عَندِرون، بی چون و چیرا آمیمَه. ایسَه بِواجِه، چِه خونِه چمن دوملَه عَندَرون؟» 30 کُرنِلیوس جواب آداشَه: «چار روج چیمی بَه نَ هِم موقه، ناهاری بَه دوملَه ساعت سه نِزِکیکا، اِشتَن کَکا کایبیم دِوا کَردِ کن ایکَرَ ایی، ایلَه مِردی کن نورانیَه شِندِر دَرِش بَه چمن نَ کا اَیر آبَه 31 و واتِش: ”کُرنِلیوس، اِشتِه دِوا قِبول بَه و اِشتِه صَدَقَه اِن خدا حِضوریکاشون یاد آرَفندَیَه. 32 ایسَه کَسِنی شهر یافا را بَین تا شَمعون کن بَی پِطروس خِلِه بَکَن، اِم جِگا را بوعَن. اَ دَباغَه شمعونی وَر کن چَی کَه دَیرا کَناریکارَ مَندَ.“ 33 پس جَخت اِشتِه دوملَه عَندِمَه و تِه نی لُطفِر کَردَ وآمیشَه. ایسَه اَمه گِرد، خدا حِضوریکا حاضیریمون تا هَر چیی ایی کن خداوند بَتِش فِرمون دوعَه یه، دَرَسَم.» 34 چَی به دوملَه پِطروس اِنتَرَکِه دَمندَ گَف ژِ: «ایسَه سَر آگِنیم کن واقییَن خدا آدَمون دِلَکا فَرق نیَه نا؛ 35 بَسکَم هَر قامیکا، هَر کَم خداکا بِتَرسِه و اَ چیی ایی کن دِرِستَه اَنجوم بدَرِ، خدا بَی قِبول بَکَی. 36 خدا اِشتَن کلامی واتَنَه، کن قام یَهودیرا عَندَش بَه، عیسی مسیح کن گِردی خداوندَ واسیطنَه، صلح و سلامتی خَشَه خبری اییلام کردِشَه. 37 شِمَه اِشتَن بَموستیرون کن اِم کار چِنتَه اَ تَعمیدی بَه دوملَه کن یحیی اَش اییلام کردَ، وِلَته جَلیلیکا شِروو بَه و ولَتِه یهودییَه گِردِ جِگا اونکا پخش آبَه. 38 و چِنتَه خدا عیسای ناصِریش خدا موقدسَه روح و زِبقینَه مسح کَردِش، ایی جوری کن گِردِ جِگا اونکا اَگَردیَه و چاکَه کار اَکَری و گِردِ اَیِنی کن اِبلیسی ظِلمی بنیکا بین، شفا اَدَری، اِمی خاطِر کن خدا بَینَه دَرِ بَه. 39 «اَمه گِردِ کارِنی کن اَ وِلَته یَهودیَه کا و شهر اورشَلیمیکا اَنجوم داشَه شاهیدیمون. اَیِن، بَی صَلیبی سَر جیبَستِشون و کِشتِشون. 40 اَمّا خدا اَی سِوومَه روجیکا زندَش آکَردَ و اَیر آکَردِش، 41 اَمّا نِه گِردِ آدَمونرا، بَلکَم تاکَه چَمَرا کن خدا طَرَفیکا اینتخاب بَه ایمون کن چَی شاهیدِن بِبَم. یعنی چَمَرا کن، چَی زِندَ آبِه مَردَ اونکا، بَه دوملَه، بَینَه هَردِمون و هِنتِمون. 42 اَ اَمَش فِرمون دوعَه تا اِم حَییقَتی قامیرا اییلام بِکَرَم و شاهیدی بِدَرَم کن خدا بَی تَیین کَردَشَه، تا زِندَاون و مَردَ اون داوَر ببو. 43 پَیغمبَرِن گِرد، عیسی خونه شاهیدی دَرِن کن هَر کَم بَی ایمان بوعَرِ، چَی نومینَه چَوون گِناخِن بخشیدَ آنَّب.» 44 پِطروس هَنوزَنی گَف دَرِ بَه کن خدا موقدسَه روح گِردِ اَیِنی کن پَیغومی دَرَرَسین سَر ویرمَه. 45 اَ ایمان دارِنی کن سِنَت بِه رسمی دارین یعنی اَیِنی کن چَوون نَسَب یهودی بَه پطروسینَه آمَه بین، وقتی ویندِشون خدا موقدسَه روح خَلا، حتی غَیر یَهودیون سَر نی ویرمیَه، حَیروون مَندین. 46 اِمی خونه کن دَرَستِشون کن اَیِن دییَرَ زبانینَه گَف بَژَن و خدا شکوه و جلال دَرِن. اَموقه پِطروس واتِش: 47 «ایسَه کن اِمِن خدا موقدسَه روح دِرِست چَمَه شیوار ویگَتِشون، کی بَشایَه چَوون نَه بیگِرِ تا آوینَه غسل تعمید بیگِن؟» 48 پس فِرمون آداشَه تا اَوون عیسای مسیح نومینَه غسل تَعمید بِدَرِن. اَموقه اَیِن پِطروسیکا اَپیشون بَه کن چند روجی اَوونَّه بومونِه. |
@ 2024 Korpu Company