یوحنا سوّمین نامَه 1 - کتاب مقدس به زبان تالشي - گویش مرکزی

¹ ایسبیَه ریشی طرَفیکا، خاجَتییَه گایوسیرا کن بَی ’حییقتَن‘ رَی بَداشتیم.

² اَی خاجَتی، چمن دِوا اِمَه کن هَمه چیی ترا چاک ببو و سَلامت بَبی، هَتَه کن اِشتِه جان نی سَلامَتَه.

³ چون اَموقه کن برا اِن آمینه و اِشتِه وفاداری و حَییقَتی دِلَه زندَگی کردِ کا شاهیدی داشون، برک خَش آبیمه، و واقیین کن حییقتیکا زندَگی بَکش.

⁴ هیچ چیی ایی اِمیکا ویشتَر بَمن خَش آنییَکَرد کن دَرَسِم چمن خِردَنِن ’حَییقتیکا‘ زندَگی بَکَن.

⁵ اَی خاجتی، تِه گِردِ اِشتِه کارونکا اِشتِه برا اونرا، اِشتِه اَمانتداری آشَموست، بخصوص اَیِنیرا کن اِشتِه وَر خَلکین.

⁶ اَیِن نی کلیسا حِضوریکا اِشتِه موحبَتی سَر شاهیدی دوعَشونه؛ پس چاکَه کاری بَکَش اَگَم اَوون اَته کن خدا شَئنیکا اَ، سَفَریرا بَینی.

⁷ اِمی خونه کن اَیِن اَ نومی خونه را، سفَریرا شَه اینَه و غَیریَهودیونکا کَاریَریی ویگَتَشون نی.

⁸ پس اَمه اِنتَرَ کَسون کاریَری بدَرم و تا اَشامونَه اَوونَّه حَییقتی را همکار بِبَم.

⁹ اَز، ایی چیی ایی کلیسا را نوشتم، ولی دیوتْرِفیس کن رَی بَداشتی بَشتن اول بزنِه، چَمَه زاکینی اییتنا نییَکرد.

¹⁰ پس وَقتی کن بام، اَ کارون سَردِرِ کن اَ بَکَیَه رَسیدگی بَکَمَه، چیرا کن غَرَصینَه چَمه زرَبرا بَد باتی، و اِمیکا نی راضی دَرَمه نیَه و چَمَه برا اون نی قبولِش کردَ نییَ؛ و برا اِنی کن بَپیشونه اَوون قِبول بِکَن، چَوون نَه گَتَشه، و کلیساکا بِرِن بَرَکَرد.

¹¹ اَی خاجتی، بدی اِشتَنرا سرمشق مَکَه، بَسکَم چاکیکا سرمشق بیگِه؛ اَ کَسی کن چاکه کار بَکی خِداکارَ، ولی اَ کن بدَ کار بَکَی خِداش ویندَ نییَه.

¹² گِرد دیمیتریوسیرا چاک شاهیدی دَرِن، حتی حَییقت اِشتَن. اَمه نی اِنتَرَ شاهیدی دَرَم و بَموستیش کن چَمه شاهیدی راستَه.

آخیر بَسر

¹³ خَیلی چییون داریم کن تِرا بِنوسم، ولی نَپیم بَه دَوات و کاغَذینَه ببو.

¹⁴ امید بداشتیمه خَیلی زوو بَتِه بوینم و رودَکر گَفَه ژَنِه بکرَم.

¹⁵ سلامت بَبی! رَفَقن تِرا سلام دَرِن. رَفِقون ایلَه ایلَه چَمَه سلامی آرَسون.