دِوُّمین نامَه تیموتائوسیرا 4 - کتاب مقدس به زبان تالشي - گویش مرکزی

خدا کلامی اییلام کَردِ

¹ اَز، خدا و مسیح عیسی نَه کا کن زندَاون و مردَاون سَردِرِ دیوون بکیَه، و چَی آمِه و چَی پادیشاهی خونه، بَتِه سیفارش بَکم کن،

² خدا کلامی اییلام بکه و وقتو بی وقت آمادَ بب و ورَ صبرینَه و کامیلَه آموجینَه، ایصلاح و تَشَر و تشویق بکری.

³ چون زمانی آرَرَست کن آدَمِن دِرِسته آموجی تاو نینَّوَرد، بَلکَم موعلیمِنی اِشتَن دوور گِرد آنَّکرد تا اَ چیی ایی کن چَوون گوشِن بَپیشونَه گوش آدَرن، اَوونکا درَسِن و چَوون هوا و هَوَسونَّه جور بَبیَه؛

⁴ و اَیِن حییقیتی گوش دوعِه کا آنَّگردِست، افسانَه اون طرف گومراه بَبینه.

⁵ ولی ته همه حالیکا هوش بب؛ عذابون تحمل اَکَن، اِنجیلی اییلام کَردِ کاری اَنجوم آدَ و اِشتَن خیدمتی کامیل آکَه.

⁶ اِمی خونه کن چمن خون، هم ایسَه، هنتَه شَراوَ خلا شیوار، کا ویرَبِن و چمن اِم دِنیاکا شِه وَقت، آرَستیَه.

⁷ اَز چاکَه جنگیکا جَنگِسته ایمَه، چمن موساقبَه تَمونِم آکردیَه و چمن ایمانِم غَم هردیَه.

⁸ ایسَه بَه دوملَه اَ صالِح بِه تاج مِرا آمادَیَه، تاجی کن خداوند، اَ عادیلَه داور، اَ روجیکا بَمن عطا بکَیه، نِه تاکَه بَمن، بَسکم بَه گِردِ اَیِنی کن چَی اَیر اَبِرا ایشتیاق دارینَه.

آخِرین سیفارشِن

⁹ تقلا بَکه تا خَیلی زو چمن وَر بای.

¹⁰ اِمی خونه کن دیماس اِم دِنیا رَی داشتِه خونه بَمن آهَشتشَه و شهر تسالونیکیرا شه. کریسکیس غَلاطیَه منطقَه را و تیتوس نی دَلماتیَه منطقه را شَه اینَه.

¹¹ تاکَه لوقا بَمنَه دَرِ. مرقُسی پِگِه و بَشتَنه بوعَه، اِمی خونه کن اَ چمن خیدمَتیرا خَیلی بَکار آ.

¹² تیخیکوسی شهر اَفِسوسیرا عَندِمه.

¹³ اِشتِه آمه موقه، قبایی کن تروآسیکا کارپوسی وَریکا جیگام هَشتَه یَه بَشتنه بوعَه، و کیتاوِن و بَخِصوص طومارون نی بَشتنه بوعَه.

¹⁴ اسکندَر مسگَر، بمِنه بَرکه وِرَ بدی کردشَه. خداوند چَی کارون جَزا آرَدا.

¹⁵ تِه نی اَیکا دوور بومون، اِمی خونه کن چَمَه پَیغومی زِرَبَرا را بَرک راست آبَه یه.

¹⁶ چمن اَولین دیفا کا، هیچ کَم چمن پِشت نِبَه، بَسکم گِرد بَمِنشون آهَشته. نِکرِ کن اِمی چَوون حیسابیکا بنرَ.

¹⁷ ولی خداوند بَمِنه دَرِ به و بَمن زبق داشه تا اَ پَیغوم، چمن واسیطنه کامیلا اییلام ببو و غَیر یهودیین گِرد اوون درَسن. هنترَیه کن شیری گَویکا بروشتیم.

¹⁸ خداوند بَمن گردِ بد کارونکا بَرَخامونِستیَه و بَمن سقَه جان اِشتَن آستامونیَه پادشاهیرا بوعَردیَه. تا ابد و تا ابد شکوه و جلال چَیرا ببو. آمین!

آخِرین سلامِن

¹⁹ چمن سلامی پریسکیلا و آکیلا و اونیسیفوروسی کَه آدَمونرا آدَرَ.

²⁰ اِراستوس شهر قورتوسیکا مندَ، و اَز تروفیموسی کن آزاری بَه شهر میلیتوسیکا آهَشتِمه.

²¹ تقلا بکه زِمستونی بَه نَه اِم جگارا آرَسی. یوبولوس، و هنته پودِنس، لینوس، کلودیا و گِردِ برا اِن تِرا سلام دَرِن.

²² خداوند اِشتِه روح نَه دَرِ ببو. خدا فیض شمه گِردینَه دَرِ ببو.