دِوُّمین نامَه تیموتائوسیرا 3 - کتاب مقدس به زبان تالشي - گویش مرکزی

آخِرین روجِن

¹ ولی اِمی بزون کن آخیرَ روجونکا، سختَه روجِنی بَبینَه.

² اِمی خونه کن آدَمِن، خودپرست، پولدوست، مغرور، یالَه نار، زَبون اَدَر، دَدَ نَه نَه را نافِرمون، ناشکر، جیفینین،

³ بی عاطیفَه، کینَه ایی، ایفترا اَگِر، بی بندوبار، اَملِک، چاکی غَنیم،

⁴ خَیانتکار، بی مولاحیظَه، و غرور اَوون بَگَتییَه کن عَیاشی، خداکا ویشتَر رَی بدارِن.

⁵ چَوون نِمود دیندار، ولی چَی خِنَری حاشا بژَن. اِنتَرَ آدَمونکا رَت آب.

⁶ اِمِن کَسِنی هِستینه کن مردومی کَکا نفوذ بَکن، نافَمَه ژِنون اِشتَن اسیر آنَّکرد، ژِننی کن گناخون باری بنیکا کَنگور آبَه اینَه و موختلیفَه هَوسِن اَوون هر وَریرا دَرَراکنِست،

⁷ اِم ژنِن اوزون آموج بَگتین، ولی هرگز نینَّشا حَییقتی آزنِسته.

⁸ هَته کن یَنَّیس و یَمبریس کن موسی زِرَبَرا راست آبینَه، اِم مِردِن حَییقتینه ضِدین، کن چَوون فکرِن خراوین و چَوون ایمان مردودَ.

⁹ ولی کاری نینَّشا کردِ، اِمی خونه کن چَوون نافَم گیری گِردیرا دیار آرَبن، هته کن اَ دِ نافَم گیری نی دیار آبَه.

موقدسَه نوشتَه اِن گَرد خدا ایلهامَه

¹⁰ ولی تِه چمن آموج و چمن رفتار و چمن هدف وچمن ایمان و چمن صبر و چمن موحبَت و چمن تاو وردِکا، نِزِک شاهید بیشَه،

¹¹ و اَیذَت آزارون و عَذابِنی کن شَهرِنِه اَنطاکیَه، قونیَه و لِسترَه کا چمن سَردِرِ آمَه و اَیذَت و آزارِن و عَذابِنی کن تحمل کردِم، ولی خداوند بَمِنش گِردِ اوونکا اَراخِمونیَشه.

¹² واقییَن گِردِ اَیِنی کن بِپیان مسیح عیساکا دیندارینَه زندَگی بِکَن، عذاب بَکَشتین؛

¹³ ولی آوشَرَ آدَمِن و حیلَه بازِن بَدیکا بدتَر آنَّب؛ گول بَردین و گول بَژَنه.

¹⁴ ولی تِه اَ چیی ایکا کن آموج گتَرَ و بَی ایمان وردَرَ آمبَست بِب، چیرا کن بَموستیشَه اَیِنِرِ کیونکا آموج گَتَرَ،

¹⁵ و چنترَ خِردَن گیریکا موقدسَه نوِشته اون اَزنیشَه کن بَشانَه، بَتِه حیکمت یاد دوعه و اَ ایمانی کن مسیح عیسی دلَکارَ واسیطنَه، نیجات گَتِرا آرَسونِه.

¹⁶ موقدسَه نِوشته اِن گرد خدا ایلهامینَه و آموج و تشَر و ایصلاح و تربیتی خونه، صالح بِه دلَکا مِفَتَه،

¹⁷ تا مِرد خدا کامیل آبو و هر چاکَه کاریرا آمادَ.