دِوُّمین نامَه تیموتائوسیرا 2 - کتاب مقدس به زبان تالشي - گویش مرکزی

مسیح چاکَه سرباز

¹ پس تِه بَلمَه، اَ فیضیکا کن مسیح عیسی کارَ قودور آب،

² و اَ چیی ایی کن وِرَ شاهیدون وَریکا بَمنکا درَستِر، اَمینه آدَمونی دَست آدَ کن دییَرَکسون آموج دوعه بشان.

³ هنته مسیح عیسی چاکه سربازی شیوار، عَذابونکا شریک بب.

⁴ هیچ سربازی، اِشتَن خیدمت کردِ موقه، بَشتن زندَگی کارونکا نِه ویلاخنِه، چیرا کن بَپیشَه اَ کن، بَش خیدمتیکا آناشَه راضی بکَرِ.

⁵ پَلَوونی کن موساقبَه قانونی واته اَنجوم نِدَرِ، تاج وینییَگَت.

⁶ اَ کشاوَرزی کن خَیلی کار بَکَی پی اَوَلین کَسی ببو کن اِشتَن اَکینیکا رَسَت ببَرِ.

⁷ اَ چیی ایی سَر کن اَز باتیم فکر بکَه، اِمی خونه کن خداوند هر چیی ایکا بته فَهم آرَدا.

⁸ عیسی مسیح یاد آرَفَن کن داوود پادیشا اودومیکا بَه و مردَاونکا زندَ آبَه؛ اِنجیلی کن اییلام بَکَمه، اِمه،

⁹ چَی خاطِرَ کن موجریمون شیوار بَمن زِنجیلینه دَبستَشون و کام عذاب کَشتِه، ولی خدا کلام زِنجیلیکا نییَه.

¹⁰ اینتیخاب بَه آدَمون خونه گردِ چییون تاو بوعَمه، تا اَیِن نی اَ نیجاتی کن مسیح عیسیکارَ، اَبَدیَه شکوه و جلالینَه بَدَست بوعَن.

¹¹ اِم گفی بَبی ایتماد کردِ کن: اَگَم بَینه مَردیمون، بَینه زندَگی نی بَکَمونَه.

¹² اَگَم تاو بوعَرم، بَینَه پادیشاهی نی بَکَمون. اَگَم بَی حاشا بکرَم، اَ نی بَمَه حاشا بکَیه.

¹³ اَگَم بی وفا آبَم، اَ وفادار بَمندیَه، اِمی خونه کن نییَشا بَشتن حاشا کردِ.

¹⁴ اِمون چَوونرا یاد آرَفَن و خدا حَضوریکا اَوون سیفارش اَکَن، کن کلَمه اون سَردِرِ خَرا خِلِه نِکَرِن، کن بَرَ ایی نیشَه، بَسکم باعیث بَبییَه اَیِنی کن دَنَّرَست راه کا رَت آبون.

¹⁵ چَتین تقلا بَکه کن خدا حِضوریکا مقبول بَبی، هنتَه پاسَریی ایی شیوار کن خَجالت نییَکَشت و حَییقَتی کَلامی دِرِست بَکار بَگَتی.

¹⁶ ولی دِنیا دَدارَ گَفونکا رَت آب، کن آدَمون ویشتَر و وِرتَر بی دینی طَرَف بَبَیَه.

¹⁷ اِنتَرَ آدَمون گَفِن، هنتَه جِذانی شیوار ولاخ آرَب، هیمِنائوس و فیلیتوس هِم کاولَکانَه،

¹⁸ کن حَییقتیکا آگَردِستَه اینَه و باتینَه: اَ روجی کن مردَاِن زندَ آنَّب، هِم ایسَه یَه، و اِنترَکه بعضیون ایمانی نیفیت بَکَن.

¹⁹ اِم حالیکا، سختَه هیمی کن خدا نوعَشه، آمبسته و اِم گفینه موهر بیَه کن: «خداوند اِشتَن آدَمون آرَزنِست،» و «هر کَم خداوندی نومی ایقرار بکرِ، پی نادِرستیکا رَت آبو.»

²⁰ ایسَه ایلَه یالَه کَکا، تاکه طِله و نقرَاینه غَب نییَه، بسکم چو و گیلییَه غَب نی هِسته؛ بعضییِن موهیمَه کارونرا خَرج بَشین، بعضییِن دستَه غَبو قَجَقین.

²¹ پس هَر کَم بَشتن اِم چییونکا پاجا غم بَرِ، غَبی بَبیَه کن موهیمَه کارونرا ایستفادَ بَبی، موقدَّس و مِفَتَه غَبی کَه صاحیبیرا اَ وهر چاکَه کاری اَنجوم دوعِرا آمادَیَه.

²² پس جوانیَه مِیلونکا بیوریج، و اَیِنی نَه کن پا جا اَ دِلینَه خداوندی خِله بَکن، صالح بِه و ایمان و موحبَت، صلح و سَلامتی دوملَه بب.

²³ نافَمه گَه بَه گَه دوعِه کا رَت آب، چیرا کن بَموستیشَه خَرا خِلِه راست آرَکَرد.

²⁴ خداوندی پاسَری نِباید خِرا خِلِه بِکرِ، بَسکم پی گِردینه مِربان ببو و بشا آموج دوعِه و بدی اون دلَکا صبرینَه تحمل بکَرِ.

²⁵ پی اَیِنی کن موخالفین آلاونیِه نَه اِصلاح بکرِ، شاید خدا اَیِنِش توبَه عطاکردَ تا حَییقتی آزنن،

²⁶ تا جیپَرکین، و ابلیسی دومیکا بیوریجِن، اِمی خونه کن بَیکا ویلاخیستَه بینَه تا چَی خواستَه اون اَنجوم بدَرِن.