دوّمین نامَه تَسالونیکی کلیسا را 3 - کتاب مقدس به زبان تالشي - گویش مرکزی

اَمَرا دِوا بِکَرَ

¹ اَی برا اِن آخِریکا، چَمَرا دِوا بکَرَ تا خداوندی کلام تِند نار بشو و چَی ایحترام غَم هردِ ببو، هته کن شمَه دلَکا انترَ بَه،

² و تا گناخکار و آوشرَ آدَمونکا برَخَم، اِمی خونه کن گِردیرا ایمان نیَه.

³ ولی خداوند اَمینه؛ اَ بَشِمَه آمبَست آرَکَرد و اَ آوشَری نَکا بَشمَه غَم بردی.

⁴ اَمه خداوندی دلَکا بشِمه ایطمینان دارَم کن اَ چیی ایی کن بَشِمَه حِکم بَکمون بَجا بوعَردیرون و اَنجوم بَدارون.

⁵ خداوند شمه دلون خدا موحبتینه و مسیح پایدارینه هیدایت بکَرِ.

هشدار تنبلَه آدَمونرا

⁶ اَی برا اِن، چَمَه خداوند عیسی مسیح نومینَه بشِمه حِکم بَکمون، کن هر برا ایی کن تنبلی بَکَی و اَ چیی ایی کن اَمَکا ویگَتَرون بَه واتَنه رفتار نینَّکرد رَت آبَه.

⁷ اِمی خونه کن اِشتَن بَموستیرون کن پی چنترَ اَمَکا سرمشق بیگِرَ. چون اَموقه کن اَمه شِمنَه دَرِ بیمون، تنبل نِبیرون،

⁸ و مفته، کَسی نونی نَردِمون، بَسکم زَمَت و سختینَه شَو روج کارِمون کردَ تا هیچ کِرَمی شِمَکا، سربار نِبَم.

⁹ نِه اِمکن اَمه انترَ حقی مدارَم، بَلکَم تا اِشتَنکا ایلَه نمونَه ایی سرمشق گَتِرا، شِمَرا بِنَرَم.

¹⁰ اِمی خونه کن حتی اَ زمانی کن شمَنه بیمون اِمی بَشِمَه حِکم کردمون کن «هر کَم نَپیشَه کار بکرِ، نون نی نَرِ.»

¹¹ اِمی خونه کن اَمه دَمونَرَست کن شمَه دلَکا بَعضییِن تنبَلی بَکَنَه. هیچ کاری نینَّکرد، بَسکم دییَرَ آدَمون کاریکا فضولی بَکَن.

¹² و ایسَه خداوند عیسی مسیح نومینه انترَ آدَمونرا حکم بکَمون و اَوون تشویق بَکَمون کن آلاوین و اِشتَن روزی بَروَرِن.

¹³ ولی اَی برا اِن شِمَه، چاکی کردِکا ویمَخِسَه.

¹⁴ اَگَم کَسی اَ چیی اییکا کن اَمه اِم نامَکا باتیمون ایطاعَت نکَرِ، اَی نِشون بکرَ و بَینه شِه آمِه مکَرَ تا شرمندَ آبو.

¹⁵ ولی بَی غَنیم مَزنَه، بَسکم هنتَه ایلَه برا شیوار بَی هوشدار بدرَ.

خَیرَ دِوا

¹⁶ ایسَه، صلح و سلَامتییَه خداوند، اِشتَن هَمه موقه و هر وضعیکا بشِمه صلح سَلامتی بدَرِ. خداوند شمَه گِردینه درِ ببو.

¹⁷ اَز، پولوس، اِشتَن دست خَطینه اِم سلامی بنِوشتیم. اِم چمن نوشون چمن گردِ نامَه اونکارَ. اَز انترَ بَنوشتیم.

¹⁸ چَمَه خداوند عیسی مسیح فیض شمَه گِردینه درِ ببو.