دوّمین نامَه تَسالونیکی کلیسا را 2 - کتاب مقدس به زبان تالشي - گویش مرکزی

بی دینَه مِرد

¹ ایسَه اَی برا اِن، چَمَه خداوند عیسی مسیح ویگَردستِه خونه و چَمه جَم آبه چَی وَریکا، شمَکا خاشتو خازِمون

² هیچ چیی ایی شمَه فکری خَراو آنِکَرِ و تَتَه وَسَّه کا دَنِگنِه چِه ایلَه روح واسیطنَه و چِه ایلَه گَفینَه و چِه ایلَه نامه نَه کن اینگار چَمه طَرَفیکارَ کن بواجه، خداوندی ویگَردستِه روج آرَستَه یَه.

³ مرزَ هیچ کس هیچ جورَ بشِمه گول بژَنه. اِمی خونه کن تا اَوَلیکا خدا زِرَبَرا مردوم راست آنِبون، و اَ بی دینَه مِرد کن نیفله آبِه خِردنَه اَیر آنِبو، اَ روج نیام.

⁴ اَ هر چیی اینه کن بَی خدا خلِه بکَنه و بَی پرستش بکَن، زِرَبَرا را راست آرَب و بَشتن کَفاتَر بَموستی، تا اَجِگایی کن خدا معبدیکا بنِشتی و اییلام بَکَی کن اِشتَن خدا اَ.

⁵ شمَه یادیکا نیَه اَموقه کن شمَنه دَرِ بیم اِمون بشِمه اَواجیمه؟

⁶ شمه بَموستیرون کن ایسَه چه چیی ایی چَی ناری، کا گَتِه و تا اَ اِشتَن وَقتیکا با.

⁷ اِمی خونه کن اِم بی دینی راز ایسَه نی کار بَکَی، تاکَه تا وقتی اَ چیی کن چَی نَه بَگَتی، نیفیت آبو.

⁸ اَموقه اَ بی دینَه مِرد اَیر آرَب، کن خداوند عیسی اِشتَن نَفَسی دَمینَه بَی نیفله آرَکَرد و اِشتَن پور شوکوهه آمِه نَه بَی نیفیت آرَکَرد.

⁹ اَ بی دینَه مِردی اَیر آبه شیطونی کاری واسیطنَه و گِردِ اِشتَن زِبقینه موعجیزَو نشونه و عَجیبه چییِن کن گومراه بکَنه،

¹⁰ و گردآوشَر حیلَه اونَّه، اَیِنی کن نیفلَه آبِه راکاینَه گول بَژَی. اِمی خونه کن اَیِن نَپیشون بَه حَییقَتی رَی بدارِن تا نیجات بیگِن.

¹¹ پس خدا اَوون ایلَه چَتینَه حیلَه کا ویلاخنِه، اَنَه کن اَیِن اَ چیی ایی کن دِروو اَ باوَر بَکن،

¹² تا گردِ اَیِنی کن حَییقَتِشون باوَر نِکردَ و هَر چیی ایی کن نادِرستَه کَیفِشون کردَ، مکحوم ببون.

آمبَست بومونَه

¹³ ولی اَی برا اِن کن خدارا خاجَتی ایرون، اَمه اوزون پی شمه وِجودی خونه خدا شکر بکَرم، اِمی خونه کن خدا بَشِمَه نوبَری شیوار اینتخاب کردِشَه کن نیجات بیگِرَ، اَ تقدیس بِه واسیطَه نَه کن خدا روح نَه اَنجوم بَبی وحَییقییَه ایمانداشتِه نَه.

¹⁴ اِنتَرَ بَه کن اَ بشِمه چَمَه انجیلی واسیطنَه صَلا ژشَه تا چَمه خداوند عیسی مسیح شکوه و جلال شمَه نصیب ببو.

¹⁵ پس اَی برا اِن، آمبَست بومونَه و اَ آموجِنیکا کن اَمَکا گَتِرونَه دَچیکَه.

¹⁶ ایسَه چَمَه خداوند عیسی مسیح اِشتَن و چَمَه دَدَ خدا، کن اَمه رَی دارییَه و فیضی واسیطنَه اَمَش زَیرونَه آلاویستِه و و چاکَه اومید آداشَه،

¹⁷ شمَه دِلون آلاوونِه و هر چاکَه کاریکا و گَفیکا بَشِمَه آمبَست غَم برِ.