دوّمین نامَه تَسالونیکی کلیسا را 1 - کتاب مقدس به زبان تالشي - گویش مرکزی

¹ پولوس و سیلاس و تیموتائوسی طَرفیکا، شهرِ تسالونیکیانی کلیسارا کن چَمه دَدَ خدا و خداوند عیسی مسیح دلَکانَه:

² چَمه دَدَ، خدا و خداوند عیسی مسیح طَرفیکا فیض و صلح و سلامتی شِمَرا ببو.

شکر کردِ

³ اَی برا اِن، اَمه پی اوزون شمَه وِجودی خونه خدا شکر بکَرم، دِرِست نی هِمَه، اِمی خونه کن شمه ایمان هِنترَکِه کا پِرَرا و شمَه هر کِرَمی موحبَت یَندِ سَر وِر آبو.

⁴ اِمی خاطر، اَمه اِشتَن خدا کلیسا دلَکا شمَه آمبَست بِه و ایمانی خونه، اَیذَتون و سختیون تاو وَردِرا، شمه وِجودیرا ایفتخار بکَمون.

مسیح ویگَردِستِه موقه دیوون کردِ

⁵ اِم، خدا عادیلانَه دیوون کردِ نشونَه یَه، تا شمَه خدا پادیشاهیرا لَیاقَتِرون ببو، کن چَی خونه عذاب نی بَکَشتیرون.

⁶ چون واقییَن خدارا اِم عادیلانَیَه کن اَیِنی کن بَشِمَه عَذاب دَرِن، عذابینَه عوَض بدَرِ،

⁷ و شمَه کن عذاب بَبَردیرون اَمَنَه آلاوِنِه. اَ زمانی کن خداوند عیسی اِشتَن قودورَ فرشتَه اونَّه، آستامونیکا اَیر آبو.

⁸ کولوستارَ آرا دلَکا اَ خدانشناسون و اَیِنی کن چَمه خداوند عیسی اِنجیلیکا نافِرمونی اَکَرینَه، تَقاص ویرَگت.

⁹ چَوون جَزا زَیرونَه نیفلَه آبِه خدا حِضوریکا و چَی خِنَری شکوه جَلالیکا اَ،

¹⁰ هَته کن اَ، اَ روجیکا آ تا اِشتَن موقدسون دلَکا شکوه و جلال بَگَتی و گِردِ اَیِنی دلَکا کن ایمان وَردشونه، حَیرون بِه باعیث ببو. اِم شِمَرا نی بَبیَه، چیرا کن چَمه شاهیدیرا ایمان وردَرون.

¹¹ اِمی خاطر، یَژَن شِمَرا دِوا بَکمون تا چَمَه خدا بَشِمَه اِشتَن صلا ژِرا قابل بِزنِه و اِشتَن اینجارینَه هر چاکَه نیَتی و هر چاکه کاری کن شمَه ایمانیکا سرچشمه بَگتی، اَنجوم بدَرِ،

¹² تا چَمه خداوند عیسی نومی شمَه دلَکا شکوه جلال بیگِرِ، و شمَه نی چَمَه خدا و خداوند عیسی مسیح فیضی خونه، چَی دلَکا شکوه وجلال بِوینَه.