دوومین نامه قرنتیانیرا 8 - کتاب مقدس به زبان تالشي - گویش مرکزی

دستو دل باز بِه را تشویق کردِ

¹ برااِن، اَمه بَپیمون اَ فِیضیکا کن خدا مقدونیَه کلیسا اِنِش دوعَیَه بَشِمَه باخبَر آکَم.

² اِمی خونه کن اَیِن موصیبَتی خونه، بَرک وَرداورد آبین، ولی بَرک خَشین و با اِمکن خَیلی دَس دَریسین، ولی دستو دلبازینَه.

³ اِمی خونه کن اَز اِشتَن شاهیدیمه کن اَیِن اِشتَن اینجاری قَدَر و حتی بیَیکا نی ویشتَر پیشقدَم بینه،

⁴ بی دِسَرَکرچَنگ گیرینَه اَمَکا خاشتو خازِشون کَردَ واَپیشون بَه کن اِم خیدمتیکا کن موقدسَه آدَمونرا اَنجوم بَبی شریک ببون.

⁵ اَیِن نِه تاکَه اَتَه کن اَمه اینتیظار داریمون بَلکَم اول بَشتَنِشون خداوندیرا وقفِشون کردَ، و چَی به دوملَه خدا ایرادَ واتَنَه، بشتَن اَمَرا وَقف کردشون.

⁶ هِمی خونه، تیتوسیکا اَپیمون بَه هَتَه کن چیمی بَه نَه اِشتَن اولین قدمِش پِگتَه به، ایسَه نی خَیرَ کاری شمَه دلَکا تَمون آکَرَ.

⁷ ولی هَتَه کن هَمه چیکا سَریرون، ایمانیکا، گَفیکا، دانا ایکا، دِسَرَ کرچَنگ نِبِه کا، و شمَه موحبَت کَردِ چَمَه سَردِرِ، پس اِم خَیرَ کاریکا نی گِردیگا سرتر بِبَه.

⁸ اَز اِمی شِمَرا حِکم نِمَکرد، بَلکَم بَپیمه شمَه موحبَتی کن دِسَرَ کرچنگ گیرینَه نییَه، دییَرَ آدَمون غَیرَتی واثیتنَه، ثابیت بکَم.

⁹ اِمی خونه کن چَمه خداوند عیسی مسیح فِیضیکا باخَبَریرون کن هر چَنَه دولتمند بَه، شمِه خونه دَسدَریس آبَه تا شمَه چَی دَسدَریسیکا دولتمند آبَه.

¹⁰ اَز اِشتَن نظَری اِم موضو خونه باتیم: اِم شمَه نفعیرا اَ، اَوَ سالیکا، شمه نِه تاکَه اِم خَیرَ کاری اَنجوم دوعه کا، بَسکم چَی اَنجوم بِه خَشیکا نی نار دَوَشتیرون.

¹¹ پس ایسَه اِم کاری تَمون آکَرَ، تا خَشی ایی کن اِم کاری خونه داریرون، چَی تَمون آکردِ نَه، شمه مالیَه اینجاری اندازَنَه جور ببو.

¹² اِمی خونه کن اَگَم خَشی ببو، اَ آدَمی خَلا، طبق اَچیی ایی کن بَداشتیَه قِبول بَبی، نِه طبق اَ چیی ایی کن نیشَه.

¹³ اِمی خونه کن چَمَه خواستَه اِم نیَه کن دییَرَ آدَمِن آسایشی کا ببون و شمه فشاریکا، بَلکَم بَپیمون اینصافینَه ببو،

¹⁴ کن ایسَه شمه فِرَوونی چَوون نیازی برطرف بَکَی، تا ایی روجی نی چَوون فِرَوونی شمه نِیازی برطرَف بکَرِ. اِنتَرَکه اینصاف برقرار ببیَه،

¹⁵ هَتَه کن توراتیکا نوشتَه آبیَه: « اَ کن وِر جَم آکَرِ، ایضاف نِداریَه، و اَ کن کم جَم آکَرِ، کم نِداریَه.»

پولوس، تیتوسی سیفارش بَکَی

¹⁶ ولی خدا شِکر بَکَم کن اَ غَیرَتی کن اَز شمَه سَر دارِم تیتوسی دِلیکا نی هِستَه.

¹⁷ چون کن اَ نِه تاکَه چَمَه خواستَه قِبول کردشَه، بَسکم اَ اِشتَن برکَه خَشینَه، شمَه وَر آمِرا نار دَوَشتَه.

¹⁸ اَمه تیتوسینَه ایلَه برا اونکا رونَه بکَمون کن کلیسا اِن گِردیکا اِنجیلی موعیظَه کردِ کا سرشناسَه.

¹⁹ و نِه تاکَه اِم، بَسکم اَ برا کلیسا اون طَرَفیکا اینتخاب بَیه تا اِم خَیرَ کاری اَنجوم دوعه را و ایدارَ کردِ را کن چَمَه وظیفَه یَه اَمنَه همسَفَر ببو. اَ کاری کن خداوندی شکوه جَلالیرا اَ و چَمَه خیر خواهی آمونِه.

²⁰ اَمه بَرک موراقبیمون کن اِم خیدمت کن خَلا گِرد آکَردِ اَ، کن دِلیکارَ و چَمَه واسیطنَه اَنجوم بَبی هیچ کَسی چَمه سَریکا عَیب مَپِنَه.

²¹ اِمی خونه کن سعی بَکمون نِه تاکَه خداوندی چَمیکا، بَسکم مردومی نَظریکا نی اَ چیی ایی کن دِرِستَه اَنجوم بدَرم.

²² و اِمونَّه، اِشتَن برا نی رونَه بکَمون کن چَندین کرَ اَیِنمون ورداوَرد کردیَه و سرآگِنه ایمون کن خَیلی چییونکا خَشی بَداشتینه، و ایسَه اَ برا، اَ وِرَ ایطمینانی کن شمَه سَر بَداشتی، ویشتر خَشی بداشتی.

²³ تیتوسی خونه نی پی بواجم کن بَشمِه اَ خیدمت کَردِکا چمن شریک و همکارَ؛ و اَز چَمَه برا اون خونه پی بواجم کن اَیِن کلیسا اون فرستادَاِن و مسیح شکوه و جَلا لینَه.

²⁴ پس شمَه اَ موحبت و ایفتخاری کن اَمه شمَه سَر بَداشتیمون، کلیسا اون وَریکا اَ آدَمونرا ثابیت بکَرَ.