دوومین نامه قرنتیانیرا 6 - کتاب مقدس به زبان تالشي - گویش مرکزی

¹ پس اَ چییِنی خاطر کن خدا هَمکاریمون، شمَکا خاشتو خازِمونه کن خدا فِیضی دَدار بَدَست نِوَرَ.

² اِمی خونه کن خدا اِشعَیای پَیغمبری کیتاویکا باتی: «چمن موناسیبَه وقتیکا، اِشتِه جوابی دامَه و نیجات گَته روجیکا، تِرا آرَستِم.» ایسَه، اَلان خدا موناسیبَه وقتَه؛ ایسَه الَان نیجات گَتِه روجه.

پولوسی سختی اِن

³ اَمه هیچ کَمی راه سَریکا، هیچ سِه ایی نِه ویدارَم، تا چَمَه خیدمتی کا هیچ عَیبی مَبو،

⁴ بَسکَم هر کاری بَکَمون وآمونَم کن خدا وَزییَریمون، موصیبتَونکا، سختییِن و غَرّونکا تاو وَردِ نَه،

⁵ لِس هَردِ موقه کا، زیندانون دِلَکا، خَرا خِلِه دلَکا، سخته کاریکا، شَوونکا بی‌خواوی دلَکا، اَنشتا بِه کا آمونَم کن خدا وَزییَریمون؛

⁶ پاجا بِه نَه، دانایی نَه، صَبری نَه، مِربانی نَه، خدا موقدسَه روح نَه، خالیصَه موحبتینَه،

⁷ راست واتِه نَه، خدا خنَری نَه، صالح بِه اَصلَحنَه کن چَمَه راستَه بالو چَپه بالیکارَ؛

⁸ عیزّت و ذیلّتی کا، چِه اَمه نوم بَندوم بکَن چِه اَمَکا تَریف بِکَن. حیلَه بازون شیوار اَمنَه رفتار بَبییَه، اِم حالینَه اَمه راستَه واج هِستیمون؛

⁹ امنَه بی نوم و نشونه آدَمی شیوار رفتار بَکن، اِم حالینَه بَمَشون آزنِستَیَه؛ امَنه مردَ آدَمون شیوار رفتار بَکن، اِم حالینه دیسَه هَنوزَنی زِند ایمون؛ اَمنَه هنتَه رفتار بَکن کن اِنگار مجازات بَبیمون، اِم حالینَه، اَمَشون کِشتَشون نی؛

¹⁰ اَمنَه برضخَه آدَمون شیوار رفتار بکَن، اِم حالیکا اوزون خَشیمون؛ امنَه هنته گیدَلیون شیوار رفتار بَبی، ولی خَیلیون پولدار بَکَمون؛ اَمنَه هنته اَیِنی کن هیچ چیشون نی رفتار بکنَه، ولی گِردِ چییون صاحیبیمون.

¹¹ اَی شهر قورنتوسی آدَمِن، اَمه رُک شِمَه نَه گَف ژمونه و اِشتَن دِلی سفرَ شِمَرا آکَردِمون.

¹² اَمه، اِشتَن موحبتی شِمَکا دریغ کردَمون نی. بسکم شِمَه ایرونه کن اِشتَن محبتی اَمَکا دریغ بَکَرون.

¹³ شِمَه نَه هنته چِمِن خِردَنون شیوار گَف بژَم؛ شِمَه نی شِمَه دِلی سِفرَ اَمَرا آکَرَ.

زندَ خدا معبد

¹⁴ بی ایمانون یوقی بِن مَشَه، اِمی خونه کن مَگَم صالح بِه و آوشَرگیری یَندِ مربوطین، و نور و ظلَمات یَندِ نَه چِه رَفاقتی دارِن؟

¹⁵ مَگَم مسیح وبِلیعان یعنی شیطون یندّنه سلوکت بکَن و مؤمن و کافر چِه چیکا یَندِ بَمندین؟

¹⁶ خدا معبد و بُتونرا چِه سلوکتی هِستَه؟ اِمی خونه کن اَمه زندَ خدا مَعبَدیمون. هَتَه کن خدا تورات و پیغمبرون کیتاویکا باتی: «اَز چَوون دِلکا زندَگی بَکمَه و چَوون مینَکا گَل بژَمَه، و اَز چَوون خدا بَبیمَه و اَیِن چِمِن قام بَبینَه.»

¹⁷ پس، خداوند باتی: چَوون دِلَکا بِرِن بِرَ و تاک آبَه. هیچ جیفینینَه چیی ایی بال مَژنه اَموقه اَز بَشِمَه قبول بَکَم.»

¹⁸ « واز شِمَرا دَدَ بَبیمَه و شِمَه مِرا زوعَه اِن و کِله اِن بَبیرونَه، خِداوندِ قادر مطلق اِمی باتی.»