دوومین نامه قرنتیانیرا 5 - کتاب مقدس به زبان تالشي - گویش مرکزی

چَمَه آستامونیَه کَه

¹ ایسَه بَموستیمون هر موقه اِم زمینیَه اَوالَه یعنی چَمَه زمینیَه کَه، کن چَی دِلَکا بمندیمون کایبَه ویریستِه، خدا کا عیمارَتی بَداشتیمون، کَه ایی کن بالینه سی آبَه نییَه و آستامونیکا زیرونَه.

² و حییقتا کن اِم اَوالَکا آه بَکَشتیمون، اِمی خونه اَمه ایشتیاق بَداشتیمونه تا اِشتَن آستامونیَه کَه هِنتَه شِندِری شیوار دکَرَم،

³ اَگَم کن واقییَن چَی دَکَردِنه، دِ اَمه لوت نی مونَب،

⁴ اِمی خونه کن تا زمانی کن اِم اَوالَکا هِستیمون چَتینَه بارینَه آه بکَشتیمون، اِمی خاطر نییَه کن لوت آمونَب، بَسکَم ویشتَر دَپوشامونیَه آمونَب، تا زندَگی اَ چیی ایی کن فانیَه ویبَرِ.

⁵ خدا یَه کن اَمه اِم هدفیرا حاضِیر آکَردَشه و روح القدوسی هنتَه ایله بِیانه ایی شیوار اَمَش آداشَه.

⁶ پس اَمه اوزون دلگَرمیمون، اَمه بَموستیمون تا زمانی کن اِم تَنیکا کَه بَداشتیمونَه، خِداوندیکا رَت آبَه ایمون،

⁷ اِمی خونه کن اَمه ایمان داشتِه نَه زندَگی بَکَمون نِه اَ چیی ایی نه کن بَویندیمون.

⁸ ها، چَمَه دِل حیسابی گرمَه و چاک بَموستیمون اِم تَنیکا رَت آبَم، و کَه کا خِداوَندینَه زندَگی بکَرَم.

⁹ پس چِه تَنیکا زندگی بِکَرَم چه بَیکا رَت آبَم، چَمَه نییَت اِمَه کن بَی راضی دَروَرَم.

¹⁰ اِمی خونه کن اَمه گِرد پی مَسیح دیوون کَردِ تختی نَه کا حاضیر آبَم، تا هَر کَم اِشتَن چاکَه کارون یا بَدَ کارونی کن اِشتَن تَنیکا زندَگی اَکَریَه اَنجوم دوعَشه، سزا بوینِه.

آشتی خیدمَت

¹¹ پس اِمی خونه کن خداوندی تَرسی معنی بَموستیمون، مردمی قانع بِکَمون. ولی اَ چیی ایی کن هِستمونَه خدا را دیارَ و امیدواریمَه شِمَه ووژدانیرا نی دیار آبو.

¹² اَمه نَپیمونَه هنی دَمونم بَشتنکا تَریف دوعه، بَلکَم بَپیمونَه دلیلی بوعَرَم کن شمَه چَمه سَر ایفتخار بکَرَ، تا بِشاعَه کسِنی کن ظاهیری سَر ایفتخار بَکَنه، چَوون جوابی بدَرَ.

¹³ اِمی خونه کن اَگَم چَمَه عقلی هیچ بَرکَردمونه، خدا خونه اَ؛ و اَگَم اَلمندَیمون، شِمَه خونه اَ.

¹⁴ اِمی خونه کن مسیح موحبت اَمه کنترل بکیَه، چون بَموستیمونه کن ایی نفر گِردی خونه مَردَ، پس گِرد مَردینَه.

¹⁵ و اَ گِردی خونه مَردَ تا اَیِن دِ اِشتَن خونه زندَگی مَکَن بسکم اَ کَسی خونه زندَگی بکَن کن چَوون خونه مَردَ و زندَ آبَه.

¹⁶ پس، چیمی بَه دوملَه هیچ کِرَم آدَمون طبق جندک آنِزنَم. ، هر چَنَه چیمی بَه نَه طبق جندَک مسیح آزنیمون، ایسَه دِ اِنتَرَ نیَه.

¹⁷ پس اَگَم کَسی مسیح دِلَکا ببو، تازَ خیلقَتیَه. گِردِ کنَه چییِن تَمون آبینَه؛ ایسَه، گردِ چییِن تازَآبَه اینَه!

¹⁸ اِمِن گِرد خدا کا اینه کن مسیح واسیطه نَه اَمَش اِشتَنَه آشتی داشَه و آشتی دوعِه خیدمتی چَمه دست آداشَه.

¹⁹ یعنی، خدا مسیح دِلَکا دِنیاش بَشتنه آشتی اَدَریَه، و مردومی گِناخون چَوون حیساب نَوَریه، و آشتی پَیغومی چَمه دست آداشَه.

²⁰ پس اَمه مسیح سَفیرِن نیمون، خدا اِشتَن پیستَه چیی اَمَنَه اَنجوم دَرِ. اَمه مَسیح طَرَفیکا بَشِمکا خاشتو خازِمونه کن خدانَه آشتی بکرَ.

²¹ خدا اَکَن گِناخِش نِه آزنِستَه، چَمَرا گناخ سِی آکَردِش تا اَمه چَی دلَکا خدا صالِح بِه کا شریک آبَم.