دوومین نامه قرنتیانیرا 4 - کتاب مقدس به زبان تالشي - گویش مرکزی

اِنجیلی نور

¹ پس چون اَ رحمتی کن اَمشون دوعَیَه خونه اِنتَرَ خِیدمتی بَکَمون، نا اومید آنی مونَب.

² بَلکَم نونکِه و آوشرَ راهونکا رَت آبَه ایمون و حیلَه بازی نِمونَکَرد، و خدا کَلامیکا دَست نِبَرَم، بَسکَم آشکارا حَییقتی باتیمون، تقلا بَکَمون کن گِردی ووژدان اَمه، خدا حِضوریکا تایید بَکَرِ.

³ حتی اَگَم چَمَه اِنجیل نامفهومَه، کسِنیرا کن نیفلَه آبه راه کانَه نامفهومَه.

⁴ اِم زَمونه خدا بی ایمانون فکری کورآکَردَشه تا مسیح اِنجیلی شکوه و جلالی نوری کن خدا صَفَتَه، نِوینِن.

⁵ اِمی خونه کن اَمه چَمه اِشتَنرا موعیظَه نِمونَکَرد، بَسکَم اَمه اییلام بَکَمون عیسای مسیح خداوند، و بَشتَنکا تاکَه عیسی خاطر و اَ نی تاکَه هنتَه شمه پاسَری شیوار گَف بژَمون.

⁶ چون هَه خِدای کن واتِشَه: «نور ظلَماتی دِلَکا شپَق بژَنِه،» اِشتَن نوری چَمَه دِلونکا دَتاوِنیشَه تا خدا شکوه و جلالی آزنِستِه مَسیح صَفتیکا، اَمه نورانی بکرِ.

⁷ ولی اِم گنجی سِفالَه خِمونکا دارَم، تا دیار ببو کن اِم یالَه خِنَر خِداکارَ نِه اَمکا.

⁸ اَمه هَر طَرفیکا سختیکا مونَه، ولی فِل آبَه نیمون؛ حَیرونیمَه، ولی نا اومید نیمون؛

⁹ اَیذت آزار بَبیمون، اَمّا اَمشون آهشتَه نیَه؛ اَمشون زَمینی سَردِرِ ویرَفندَشونه، ولی کم نِوَردمون.

¹⁰ اوزون عیسی مردِ اِشتَن تَنینه پِرِمون تا عیسی زندَگی نی چَمه تَنیکا اَیر آبو.

¹¹ چون اَمه کن زِندَ ایمونه، اوزون عیسی خونه اَمه مرگی دست بدان تا چَی زندَگی چَمه فانیه تَنیکا دیار آبو.

¹² پس مرگ چَمَه دِلَکا کا کارکَردِ، ولی زندَگی شمه دِلَکا.

¹³ کیتاو مزموریکا نوشته آبیه کن: «ایمان وَردِمَه، پس گَفِم ژَ.» هِم ایمان داشتِه روح نَه، اَمه نی ایمان بَداشتیمون و گَف بَژَمون.

¹⁴ چون بَموستیمون اَ کن عیسایِ خداوندی مَردَاونکا زِندَش آکَردَ، اَمه نی عیسی نَه زِندَش آکَردَیَه، و شِمَه نَه چَیی حضور بوعَردییَه.

¹⁵ اِمن گِرد شِمَه خاطِرَ، تا هر چَنَه خدا فیض ویشتَر و وِرتَرَ آدَمونرا بَبی، خدا شکوه و جَلالیرا شکر کَردِ نی ویشتَرو وِرتَر ببو.

¹⁶ پس نا اومید آنی مونَب. هَر چَنَه چَمَه ظاهیر کا نیفیت آبِه، چَمَه باطن روج بِه‌ روج تازَ تر آرَبن.

¹⁷ اِمی خونه کن چَمَه اِم گِچو زو دَیوَرَ رنجِن، اَمَرا ابَدیَه شکوه و جَلال بوعَردی کن اَ رَنجونَّه سَر نییَه.

¹⁸ پس اَمه اَ چیی کن بَبییَه ویندِ دِنِه دَیسَم، بَسکَم اَ چیی ایی کن نییَب ویندِ کا چَم دَشتَمون، اِمی خاطر کن ویندَنییَه چییِن زوو بَگِذَشتینَه ولی اَ چیی اِنی کن نییَب ویندِ، زَیرونین.