دوومین نامه قرنتیانیرا 2 - کتاب مقدس به زبان تالشي - گویش مرکزی

¹ اِمی خونه کن اَپیمَه ایکَرَ دییَر، شمَه وَر بام و بَشمَه برضَخ آنِکَم.

² اِمی خونه کن اَگَم شِمَه برضَخ آکَم، دِ کی بَشایَه بَمن خَش آکَرِ، غَیراَز شِمَه کن بَشمِه برضَخ آکَردمَه؟

³ از اَتَرَکِه شِمَرا نامه نِوشتِمه تا اَ موقه ایی کن شمَه وَر کام آمِه، اَیِنی کن پی بَمن خَش آکَن، چمن برضَخ بِه باعیث نِبون. چیرا کن شمَه گِردی ایتمینان داریمَه کن چمن خَشی شمَه گِردی خَش به باعیث بَبی.

⁴ اِمی خونه کن بَرکَه قورصَه اینَه و چَکِستَه دِلینه و چَمِنی نَه کن اَسِرگینه پَتلَمَه یَه شِمَرا نِوِشتم، اِمی خاطر نِنِوشتِمه تا بَشمَه برضَخ آکَم، بَسکم تا سرآگنَه کن چَنَه بشمَه رَی بَداشتیم.

گِناخکاری بِبَخشَه

⁵ ولی اَگَم کَسی برضَخ بِه باعیث بَیَه، نِه تاکَه بَمن، بَلکَم تا حدی شمَه گِردی برضَخ آکَردشَه، نَپیمَه اِم موضوع خونه وَرَواجی کَردَم ببو.

⁶ چون اَ آدَمی موجازات کن شمَه ویشتَری طَرَفیکا چَی لَیاقت اَزنینَه، وَستَه.

⁷ پس پی بَی ببخشَه و بَی آلاونَه، نِکرِ وِرَقورصَه بَی زمین گیر بکَرَ.

⁸ پس، شمَکا خاشتو خازِمَه کن بَی شمه موحبتیکا موطمعین بکرَ.

⁹ اَز اِمی خاطِر شِمَرا نوِشتمه کن بَشمَه وَرداورد بکَم تا دَیَسم کن هر دستوریکا فرمون بَبَرون یا نِه؟

¹⁰ هر کَمی شِمَکا کن بَی ببَخشِه، از نی اَئی بَبخشِستیم. و واقییَن کن اَگَم کَسی بَخشِستِمَه - البت اَگَم دلیلی بَخشِسترا ببو - اَز شمَه خاطِر مَسیح حِضوریکا اِنتَرَ کَردَمَه،

¹¹ تا شَیطون اَمه گول مَژنِه، اِمی خونه کن چَی نقشَه اون بَموستیمون.

پیروزی مسیح دِلَکا

¹² وقتی مَسیح اِنجیلی موعیظَه کردِ خونه شهر تروآسیرا شیم، اِم حالیکا کن خداوند یالَه بَرنگایی اَ جِگاکا چمن ناریکا آج آکَردَشه،

¹³ ولی هَنی تَفشیش بیمه اِمی خونه کن اِشتَن برا تیتوسی پَیدام کَردَ نِبه. پس اَ جِگا آدَمونَّه خداحافیظی کردِمه و منطقه مَقدونیَه را شیم.

¹⁴ ولی خدا شکر بَکَم کن اوزون مَسیح کا، اَ اِشتَن پیروزی دلَکا اَمه راهنمایی بَکَی و چَی اَلمند گیری عطر چَمه واسیطنَه گِرد جگا اونگا ولاخ آرَکَرد.

¹⁵ اِمی خونه کن اَمه، چِه اَیِنی دِلَه بِبَم کن نیجاتِشون گتَیَه و چِه اَیِنی دِلَه کن نیفَه آبَه اینَه، خِدارا هنتَه مَسیح خَشَه بوعَه عطری شیوار هِستیمون،

¹⁶ اَ کَسیرا کن مَرگی طرَف بَشی، مَرگی بو درَم؛ و دییَرَ کَسیرا کن زندَگی طرَف بَشی اَمه چَیرا زندَگی بو دَرَم. و کیَه کن اِنتَرچییون لَیاقَتی بدارِ؟

¹⁷ اِمی خونه کن اَمه اَیِنی شیوار کن اِشتَن نفعی خونه خدا کَلامی بَخِرَتین، نیمون. بَسکم اَمه خدا چَمون نَکا مَسیح دلَکا گَف بَژَمون. اَ آدَمونی شیوار کن خالیصَه نیَت بَداشتین و خدا طَرفیکان.