دوومین نامه قرنتیانیرا 13 - کتاب مقدس به زبان تالشي - گویش مرکزی

آخِرین اِخطارِن

¹ اِم سوّمین کَرَیَه کن شِمَه ویندِ را کام آمِه. «هَر گَفی دِ یا سِه گِلَه شاهیدی نَه ثابیت بَبی.»

² از دوومین کَرَرا کن شمه وَر آمَه بیم، اَیِنی کن چیمی بَه نَه گناخ کَردشون بَه، و هنته هر دیرَ کَسی هوشدار دامَه و ایسَه نی کن اِشتَن اَ جِگاکا نیم، هنی هوشدار دِرِم کن اَگَم ایکَرَ دییَر شمه ور بام، چَوون سَر رحم نِمَکرد.

³ اِمی خونه کن شمه اِمیرا کن مسیح چمن واسیطنَه گَف بَژَی، ثابیت کردِرا ایلَه دلیل بَپیرون. میسح شمه ناریکا عِجِز نیَه، بَلکَم شمه دِلَکا قودورَ.

⁴ اِمی خونه کن هر چَنَه اَ عِجِز گیریکا صَلیبی سَر شَه، ولی خدا خِنَرینه کا زندَگی بَکی. اِمی خاطرکن، اَمه نی چَی دِلَکا عِجِزیمون، ولی بَینَه شمه ناریکا خدا خنَرینه زندَگی بکَمونَه.

⁵ بَشتن وَرداوَرد بکَرَ تا دیَسَه کن ایمانِرون هِسته یا نِه. بَشتن محک بِژنه. یا مَگَم اِمیکا سَرآنینَگِنِست کن عیسی مسیح شمه دَلَکارَ؟ مگَم اِمکن اِم وَرداوَردیکا رَد آبَه.

⁶ اومیدواریمَه اِمیکا سَر آگِنه کن اَمه اِم وَرداوَردیکا رَد آبَه نیمون.

⁷ چَمه دِوا خدا دَرگارا اِمه کن شمَه خطایی نِکَرَ؛ نِه اِمی خاطر کن مَلوم ببو اَمه وَرداوَردیکا سرافراز آبیمونَه، بَلکَم اِمی خونه کن اَ چیی ایی کن دِرِستَه اَنجوم بدَرَ، حتی اَگَم اِنتَرَ آمونِه کن اَمه رَد آبه ایمون.

⁸ اِمی خونه کن اَمه نِمونَشا حَییقَتی زِرَبَرا کاری اَنجوم بدَرم، بَسکم هر چیی ایی بَکمون حَییقَتیرا اَ.

⁹ اِمی خونه کن هر موقه اَمه عِجِز بِبَم و شمه قودور، چَمَه خَشی باعیث بَبیَه، و چَمَه دِوا اِمه کن شمه هَنی زبق بیگِرَ.

¹⁰ اِمی خاطِر، وقتی کن اَز مند نیمه اِمی شِمَرا بَنِوشتیم تا وقتی کن شمَه وَر آمیم، مجبور مبوم اِشتَن زاکینیکا تِندَ رَفتار شمنَه بَکَم، اَ زاکینی کن خداوند بنا کَردِ خونه بَمن آدوعَشَه، نِه ویراوِنِستِه خونه.

آخِرین گَفِن

¹¹ اَی برا اِن آخِریکا خَش بِبَه؛ شمَه فکر اِم ببو کن هَنی زبق بیگِرَ؛ یَندِ آلاوِنَه، یَندِ نَه هم رَای ببَه، صلح و سلامتیکا زندَگی بکَرَ، و صلح و سلامتی خدا شمَنه بَمندیَه.

¹² موقدسَه ماچینِه نَه یَندِ سلام بواجَه.

¹³ موقدسَه آدَمِن گِرد شِمَرا سلام دَرِن.

¹⁴ خداوند عیسی مسیح فیض، خدا موحبت و خدا موقدسَه روح رَفاقَت، شِمَه گِردینَه دَرِ ببو.