دوومین نامه قرنتیانیرا 11 - کتاب مقدس به زبان تالشي - گویش مرکزی

پولوس و دِروعَه رَسولن

¹ اَی کاش کن شمَه چمن اِم تیکَلیی نادونیکا تاو اَوَریرون، بَمن تاو بوعَرَ!

² اِمی خونه کن اَز شمَه سَر غَیرَت بَداشتیمَه و اِم غَیرَت خدا طَرَفیکا اَ، اِمی خونه کن اَز بَشِمَه ایلَه مِردینَه، یعنی مسیح نَه، پَیوندی آکَردمَه تا بَشمَه هنتَه ایلَه پاجا اَ باکِرَ ایی شیوار چَی دَست آدَرِم.

³ ولی بَتَرسِستیمَه هَته کن نلَتی حَوّاش گول ژَ، شمَه فکر اَ صاف و صادیق و خالیص بِه کا، کن مَسیح سَردِرِ دارَ، مونحرف آبَو.

⁴ اِمی خونه کن اَگَم کَسی شَمه وَر با و غَیرَاز عیسی کن اَمه بشمه اییلام کَردِمونه دیَرَ عیسیایی اییلام بکَرِ، یا اَگَم غَیراَز اَ خدا موقدسَه روح کن ویگَتَرون دییَرَ روحی ویگِرَ، یا غَیراَز اَ اِنجیلی پَیغوم کن قِبولِرون کردیَه دییَرَ اِنجیلی پیغومی قِبول بکَرَ، شمَه راحت بَی قبول بکَرون.

⁵ واقییَن کن گمون نِمَکرد اَ یالَه رَسولونکا چیی ایی کَم بدارم.

⁶ حتی اَگَم ماهیرَ گَفَه ژَنی مبوم، اَلمند گیریکا چیی ایی کم نیمَه؛ واقییَن کن اَمه بَشِمَه هر لَحاظیکا، اِمی هر چیی ایکا شمَرا دیار آکَردِمون.

⁷ مَگَم گِناخِم کردَ کن بَشتَنِم گِچ آکَردَ تا شمَه سربلند آبَه، اِمی خونه کن خدا اِنجیلی پَیغومی مفتَه بَشِمَرا اییلامم کردَ؟

⁸ اَزدییرَ کِلیسا انِم پِتارِستَه و اَوونکا مالییَه کاریَری ویگَتِم تا بَشمِه خیدمت بکَرِم.

⁹ و مودَتی کن شمَه دلَکا بیم دَس دَریس بیم، هیچ کَمی دوشیکا باری نوعَم نییَه، اِمی خونه کن برا اِنی کن مقدونیَ ولَتیکا چمن وَر آمین چمن نیازون برطرف کردِشون. و اَز هیچ جورَ شمَه دوشیکا باریم نوعَه نِبَه و نِمَه نا.

¹⁰ مسیح اَ حَییقَتی سَر کن چمن دِلَکا هِستَه قسَم بَردیم، کن هیچ‌کس اَخائیه منطقَه کا چِمِن اِم ایفتخار بَمِنکا وینیَگَت.

¹¹ و چیرا؟ یعنی اِمکن بَشمَه رَی نِدارِم؟ خدا بَموستی کن رَی بَداشتیم!

¹² و اِشتَن کردَ کاری ایدامَه دَرِم تا اَیِنی کن ایدعا بَکَن بَپیشون هَتَه کن اَمه خیدمت بَکَمون خیدمت بِکَن، و امیکا ایفتخار بَکنَه هیچ آکَم. اَیِنی کا کن تَقلا بَکَن، تا بَشتَن اَ چیی ایکا کن چَی سَر ایفتخار بَکن اَمنَه برابر بکَرِن.

¹³ اِمی خونه کن اِنتَرَ کَسِن، دِروعه رسولِن و حیلَه بازَ کاریگَرِنی هِستین کن بَشتن هِنتَه مَسیح رسولون شیوار نمود دَرِن.

¹⁴ و اِم عجیب نییَه، اِمی خونه کن شَیطون نی بَشتن نوری فرشتَه شیوار نمود دَرِ؛

¹⁵ پس تعجوبی نِدارِ کن چَی پاسَرییِن نی بَشتن صالِحَه آدَمون پاسَری شیوار نمود بَدَن. اَیِن آخیر بَسَر اَ موجازاتی کن چَوون حقَّه وینَّگَت.

پولوسی عَذابِن

¹⁶ هَنی کام واتِه: کَسی بَمن نافَم مَزنِه. ولی اَگَم اِنتَرَ بَکرون نی، حداقل بَمن هنتَه نافمَه مِردی شیوار قِبول بَکَر، تا اَز نی تیکَلیی بشام ایفتخار کَردِ.

¹⁷ وقتی اَز اِنتَرَ اطمینانیَه اِشتَن ایفتخاریکا باتیم، خداوندی طَرفیکا نِمَه وات، بَسکَم نافَمیکا باتیم.

¹⁸ اِمی خاطر کن خَیلی اِن اینسانیَه فکرون خونه ایفتخار بَکَنه، اَز نی ایفتخار بَکمَه.

¹⁹ نِه کن شمَه اِشتَن اَلمندیرون، اِمی خاطرشمَه خَشینَه نافَمون تحمل بَکَرون!

²⁰ اِمی خونه کن اَگَم ایی نفر شِمَکا بَشمَه اِشتَن وَزییَر سی آکَرِ، یا شمَه ویرَبَرد، یا اِمکن شمکَا سوایستفادَ بکَرِ، یا بَشتن شمَکا سَر بِزنِه، یا شمَه صَفَتی سِلَّه دکَرِ، تاو بوعَردیرون.

²¹ شرمندَگینه پی بواجِم کن اَمه اِم کاریرا بَرک عِجِز بیمون! ولی اَگَم کَسی جورعَت بدارِ چیی ایی سَر ایفتخار بَکرِ- هَنی کایمَه نافَمون شیوار گَف ژِ- اَز نی بَشتن چورئَت دَرِم کن اَ جریانی سَر افتخار بکَم

²² اَیِن عِبرانی اینَه؟ اَز نی هِستیم، اَیِن ایسرا ئیلی این؟ اَز نی هِستیم، اَیِن ابراهیمی خردَنین؟ اَز نی هِستیم،

²³ اَیِن مسیح پاسری اینه؟ اَز اَوونکا ویشتَر هستیم-هِنتَه تورَ آدَمون شیوار گَف بَژَم - گِردیکا چَتین تر کارم کَردیَه، ویشتَر زیندان دَگنستَه ایمه، گِردیکا ویشتَر لِسِم هردیَه، مَردِ مزَ خَیلی چَشتَمَه.

²⁴ یهودیونکا پِنج کَرَ شَلاق هَردَمه کن هَر کَرَ سی و نَه ضربه بَه.

²⁵ سِه کَرَ لِسینَه بَمن ژِشون، ایی کَرَ سنگ سار آبیم، سه کَرَ چمن سفَریکا چمن کشتی قرق آبَه، ای شَو و ای روج دَیرا دِلَکا مند بیمَه.

²⁶ اَ سَفَرِنیکا کن اَز یَژَن اَشیمَه، یاله ربارون خَطریکا، پِتارچییون خطَر، اِشتَن قامی طَرَفیکا خطَر، غَیر یهودیون طَرَفیکا خَطَر؛ شهری دلَکا خطر، وَیاوونی دلَکا خطَر، دَیرا دلَکا خطَر؛ دروو اَواجَه برا اون طَرَفیکا خَطریکا؛

²⁷ خَیلی کارِم کَردیَه و سختی کَشتمَه، خَیلی شَو بی خاوی کَشتَمه؛ وِشی و تِشی بیمه ولی تاوِم وَردَ، چندین کرَ بی غَذا مندَ ایمه، غَزری دِلَکا لوت بیمَه.

²⁸ اِمِن گِرد بَکَنار، گِردِ کلیسا اون تَفشیشی بار، چمن دوشیکا سنگینی بَکَی.

²⁹ کیَه کن عِجِز آبو و از عِجِز آمَبوم؟ کیَه کن بلِسکِه و از نِسیجیم؟

³⁰ اَگَم پی ایفتخار بِکَم، چیی یونی سَر ایفتخار بَکمَه کن چمن عِجِز گیری آمونِه.

³¹ خِداوندْ عیسی دَدَ، خدا، کن اَئی تا اَبَد شکر ببو، بَزنیَه کن دِرو نِمَدا.

³² شهر دَمشقیکا، حاکمی کن حارِص پادیشا بَش اینتخاب کَردَ، شهردمشقی سَردِرِ نیگَبانِنی آناشَه تا بَمن ویلاخِنِن.

³³ ولی بَمن چَرگه ایی دِلَکا آناشونَه، و پِنجَرَ ایکا کن شهری دیواریکا بَه بِنیرا آداشون و اِنتَرَکِه چَی چینگیکا ویریتیم.