دوومین نامه قرنتیانیرا 10 - کتاب مقدس به زبان تالشي - گویش مرکزی

پولُوس اِشتَن خیدمَتیکا دیفا بَکَی

¹ از، پولوس، بَشتن، مسیح فورتنی و مِرَبان بِنَه بشمَه خاشتو خاز بکمَه، اَز کن شمَه اِشتَن باتیرون وقتی شمَه وریکام سَر بَه جیریم و اَ موقه کن شمَه وریکا نیم جَسوریم.

² اَز بَشِمَه خاشتو خاز بَکَم وقتی کن شمَه وَر آمیم مجبور مبوم شمنَه جیسارتینَه رفتار بکَم، اَتَه کن بَعضی آدَمونکا گَمون بَکن اَمه آدَمون فکرینَه رفتار بَکمون.

³ اِمی خونه کن هر چَنه جندَکیکا زندَگی بکَمون، ولی طبق جندَک نِجَنگَم.

⁴ اِمی خونه کن چَمه جنگِستِه اَسلحَه، جندَکی شِن نیَه، بسکَم خدا زبقی بَداشتی تا قَلَه اون نیفیت آکَرِ.

⁵ اَمه، هر گَه بَه گَه دوعِه و دانا ایی کن خدا زِرَبَرا اَ نیفیت بَکمون، و هر فکری مجبور بَکمون تا میسح کا ایطاعَت بکَرِ.

⁶ اَموقه کن کامیل مسیح کا فِرمون بَبرون، اَمه آمادَ ایمون تا هر نافِرمونی ایی تِنبِه بکَرَم.

⁷ دیَسَه و بوینَه کن شمَه چَمی نَکا چِه چییَه، اَگَم ایی نفر ایتمینان بَداشتی کن مسیح شِنَه، اَ آدَم پی بِزنِه هته کن اَ مسیح شنِه اَمه نی مَسیح شِنیمون.

⁸ چون حتی اَگَم اییی زرَ ویشتَر چَمَه زاکینی سَردِرِ ایفتخار بکَم، شرمندَ آنیمَب، اَ زاکین کن خداوند شمَه بنا کردِ خونه بَمِنِش آدوعَیَه، نِه شمَه نیفیت آکَردِرا.

⁹ نِمَپی اِنتَرَ نمود بَدَ کن اَز بَپیمه اِشتَن نامه اونَّه بَشِمَه بترسامونم،

¹⁰ اِمی خونه کن بعضی باتینَه: «چَی نامَه اِن بَرک سختو سنگینین، ولی رودَکَرعِجِزَ و چَی گَفِن بَحیساب نان.»

¹¹ بَرزِن اَکَن اِنتَرَ باتی سرآگِنِه هر چیی ایی کن وقتی مند نیمَه و اِشتَن نامه اونکا باتیمَه، هَنگومی کن آمیم اَ کاری بَکَم.

¹² نِه اِمکن جورعت بَکَمون بَشتن اَیِنی کاولَکا بَحیساب بوعَرم کن بَشتنکا تَریف بَکن یا اِشتَن یندِنَه موقایسَه بکَن. ولی اَموقه کن اَیِنی کن یَندِ سِبِک سنگین بکنَه و بشتَن یندِنَه موقایسَه بَکن، نینَّه فَهمِست.

¹³ ولی اَمه بیش از انداز ایفتخار نِکَرَم، بَلکَم تاکَه هه اندازَ کن خدا اَمرا تیین کردشَه ایفتخار بَکمون، هه اَندزَ کن شمَه نی در بَر بَگَتییَه.

¹⁴ اِمی خونه کن اَمه چَمه لِنگی چَمَه حَدی کا دراز آکَردَمون نی، ایی جوری کن اینگار هرگز بَشِمَه خیدمتمون کردَ نییَه. اِمی خونه کن اَمه اَولین کَسِنی بیمون کن مسیح اِنجیلی بَشِمَه آراستِنِستمون.

¹⁵ اَمه چَمَه حدی بَموستیمون و خلکی زَمَت کَشتَه سَر ایفتخار نِمونَکَرد. ولی اَمه امیدِمون هِستَه کن هر چَنَه شمَه ایمان ویشتَر ترقی بَکیَه، چَمَه خیدمتی حَد نی شمَه دلَکا ویشتَر آبَو،

¹⁶ تا بِشوعَم اِنجیلی، اَ وِلَتِنیکا کن بَشِمَکا دورین موعیظَه بکَرَم. اِمی خونه کن نَپیمونَه کاری سَردِرِ ایفتخار بَکَرم کن چیمی بَه نَه، دییَرَ کَسی حَدی کا اَنجوم بَیَه.

¹⁷ برزَ«هَر‌ کَم کن ایفتخار بَکَی، بَه خداوند ایفتخار بکَرِ.»

¹⁸ چون اَ کَسی کن بَشتَنکا تَریف بدَرِ قِبول نییَب، بَسکَم اَ کن، خدا بَیکا تَریف بدَرِ قِبول بَبی.