دوومین نامه قرنتیانیرا 1 - کتاب مقدس به زبان تالشي - گویش مرکزی1 پولوسی طرفی کا، کن خدا خواستنَه مسیح عیسی رسولَه، و چَمَه برا تیموتائوسی طَرَفیکا، خدا کلیسا را کن شهر قُرِنتُسی کارَ، و گِردِ موقدسِن کن وِلَته اَخائیه اِم سَر اَسَریکاینَه: 2 فیض و سلامتی چَمه دَدَ خدا طَرَفیکا، و خِداوندْ عیسی مسیح طَرَفیکا، شِمَرا ببو! خدا گِردِ آلاونییِه 3 خدا متِبارک ببو، کن چَمَه خداوند عیسی مسیح دَدَ یَه، کن رَحمتون دَدیَه و گِردِ آلاویستِه خِدایَه؛ 4 هه خدا کن اَمه گِردِ چَمَه موصیبتونکا آلاونِه، تا اَمه نی بِشوعَم اَ آلاویستِه ایی کن بَیکا ویگِتَمونه، دییَرَ کَسون کن موصیبتونکان، اَوون آلاوِنَم. 5 چون هَتَه کن مسیح رَنجون کا فَرَوون رَسَت بَبَردیمون، هَه اَندازَ نی مسیح واسیطنَه آلاویستِکا فِرَوون رَسَت بَبَمون. 6 اَگَم موصیبتیکا مون، شِمَه آلاویستِه نیجاتی خونه اَ؛ و اَگَم آلاویستِه بَداشتیمون، هَنی شِمَه آلاویستِه خونه اَ، و اِم اَ موقعی بَبی کن شِمَه هَه عذابی کن اَمه بَکشتیمون، صبرینَه تاو بوعَرَ. 7 چَمَه امید کن شِمَه سَر دارَم آمبستَه، اِمی خونه کن بَموستیمون هَتَه کن چَمَه عذابونکا رَسَت بَداشتیرون، چَمَه آلاویستِه کا نی رَسَت بَبَرون. 8 بِرااِن، چون نَپیمونه موصیبتی کا کن منطقه اِ آسیا کا چَمَه سَر آمَه، بی‌خَبر بِبه. چون فِشارِنی کن چَمَه سَردِرِ آمَه چَمه تاویکا ویشتَر بَه و چَمَه زندَ مندِ اومیدی نِداریمون. 9 واقیین اَمَرا اِنتَرَ به کن اَمَشون مردِرا محکوم کردیَه. ولی اِمِن گِرد اِمی خاطر اِیتِفاق دَگِنسته تا خِداکا توکل بِکَرَم کن مردَاون زندَ آرَکَرد، نِه بَشتَنکا. 10 خدا اَمَش اِنتَرَ برکَه اَکِشَه خَطریکا اَراخِمونیشَه و بَراخِمونستی. اَمه اَ کَسی سَردِرِ اومید دبستَمونه کن یَژَن اَمه راخنِه، 11 شمَه نی پی اِشتَن دِوا اونکا اَمه کاریَری بدَرَ، و اَ برَکَتی خونه کن خَیلیون دِوا جَوابیکا، اَمَشون آدوعَیَه، خَیلیی اِن چَمَه خاطِر شکر بِکَن، پولوسی نقشَه اِن عَوَض آرَب 12 اِمی خونه کن چَمَه ایفتخار کردِ، چَمَه ووژدانی خونه اَ کن شاهیدی دَرِ، اِم دِنیا دلَکا صیداقَت و راستینَه، کن خدا کارَ رفتار کردِمون، نِه اینسانی حیکمتینَه، بَسکم خدا فِیضینَه رفتار کردِمون، بَخِصوص شِمنَه. 13 چون غَیراَرز چیی ایی کن شمَه بخَندیرون و بفَهمِستیرون شِمَرا نِمَه نِوِشت. و از اومید بَداشتیم کن شمَه اِمی چاک سَر آگِنَه- 14 هَتَه کن تا حَدی اَمَرون آزنِستَیَه، تا چَمَه خداوند عیسی روجیکا هَتَه کن اَمه شمَه خاطِر ایفتخار بَکَمون، شمَه نی چَمه سَر ایفتخار بکَرَ. 15 چون اِمیکا خاطر جَم بیمَه، اَپیم بَه اوّلیکا شِمَه وَر بام تا دِ کَرَ فیضی تجربَه بکرَ. 16 اَز اَپیم بَه کن مقدونیه شِه موقه، راه سَریکا بشمَه بوینِم و مقدونیه کا هَنی شمه وَر ویگردم تا بَمن ولَتِه یهودیه شِه را راهی بکَرَ. 17 مَگَم هَنگومی کن اَپیم بَه اِم کاری بِکَم چیمه میمَه اَکَریمه؟ مگَم اَز اینسانی فِکرونَّه تصمیم بَگَتیم، اَتَه کن ایی لحظَکا بواجِم ’ها، ها‘ و هِم بواجِم ’نِه، نِه‘؟ 18 خدا وفاداری سَر قَسَّم بردیمه کن چَمَه گَف شِمَنَه «ها» و «نِه» نِبَیَه. 19 اِمی خونه کن خدا زوعَه عیسایِ مسیح، کن اَز و سیلاس و تیموتائوس بَی شِمَه دلَکا اِییلام کَردِمونه، «ها» و «نِه» نِبَه، بَسکَم چَی دِلَکا اوزون ’ها‘ یَه. 20 اِمی خونه کن خدا وعده اِن گِرد، عیسی مسیح کا ’ها‘ اینَه. هِمی خونه چَی واسیطنَه یَه کن اَمه «آمین» باتیمون، تا خدا شکوه وجلال پَیدا بکرِ. 21 ولی خدا اَ کن اَمه و شِمَه، مسیح دلَکا آمبَست بَکَی و اَ اَمه مَسح کَردَشه، 22 واِشتَن مُهری چَمه سَر ژَشه و اِشتَن روح، هنته بَیانه شیوار چَمَه دلونکاش آنوعَیَه. 23 خدا شاهید بَگتیم کن تاکَه اِمی خونه کن بَشِمَه برضَخ آنِکَم شهر قورنتوسیرا وینِگَردِستیم. 24 نِه اِم کن شِمَه ایمانی سَردِرِ سَروَری کَردَمون ببو، بَسکَم شِمَه نَه، شِمَه خَش برا تَقّلا بَکَمون، اِمی خونه کن شمَه ایمانی دِلَکا آمبَستیرون. |
@ 2024 Korpu Company