اوّلین نامَه تیموتائوسیرا 6 - کتاب مقدس به زبان تالشي - گویش مرکزی

¹ گردِ اَیِنی کن وزییَر گیری، جِلَبی بِنیکان، پی اِشتَن اَربابی کامیلا ایحتیرام بکَن تا مردوم خدا نومی زِرَبَرا و چَمَه آموجیکا بدَ چییِن نِواجن.

² اَیِنی کن چَوون اربابِن ایماندارین، نِباید اِمی خونه کن یندِنَه برا این، اَوون کمتر حورمَت بکَن. بَسکم پی حتی چاکتَر خیدمت بکَن، چون اَیِنی کن اِم خیدمتیکا برَ بَبَنه، ایماندار وخاجَتی این. اِم چییون آموج بدَ و چَی اَنجوم دوعِرا اَوون تشویق بکَه.

پولدوستی آخر

³ اَگَم کَسی دییَرَ مودیل آموج بدَرِ و چَمَه خداوند عیسی مسیح دِرِستَه کَلامینه واَ آموجینَه کن دینداری راه نَه ضِد ببو،

⁴ اَ، یالَه نار آبَیَه و هیچ چیی ایی نییَفَهمِست. اِنتَرَ آدَمی خَرا خِلِه و جَنگِستِه، کلَمه اون سرَ، کن بَیکا زِرَ بردِ، ایختلاف، ایفترا و بَد گومانی،

⁵ و یَژَن آدَمونی دلَکا کن چَوون فکر مِچمَه و حَییقَتیکا بی نَصیبین و گَمون بَکن کن دینداری وسیلَه ایی بَرَ بردِرا اَ، جنگِستِه و ژِژِ باعیث ببین.

⁶ ولی دینداری قیناعَت کردِنه، یالَه برکَه بَرَ ایی بداشتی.

⁷ چیرا کن اَمه اِم دِنیارا هیچ چیی ایی وَردَمون نی و اَیکا نی هیچ چیی ایی نیمونَه بَرد.

⁸ اَمّا اَگَم چَمَرا هردَ چیی و دکَردَ چی ببو، قانع بَبیمونَه.

⁹ ولی اَیِنی کن پولدار بِه طَمارزو بَداشتین، وسوسَه کا و دومیکا دَنَّگِنِست و دَدارَ خواستَه اون دلَکا کن ضرَرر بَژَی و آدَمون نیفیت آبِه و نیفلَه بِه طرَف دَرَراکنِست، وینَّه گِنِست.

¹⁰ اِمی خونه کن پولدوستی هَمه مودیل بدی ریشَه یَه، و پولی حِرصی خونِه اَ کن بعضییِن ایمانیکا رَت آنَّب و بَشتن وِرَ داجیکا ویلاخِنییَشونَه.

پولوسی سیفارش تیموتائوسیرا

¹¹ ولی تِه کن مِردِ خدا ایشَه، اِمونکا بیوریج، و صالح بِه و دینداری و ایمان و موحبت و پایداری و مولایمتی دوملَه بب.

¹² ایمانی، چاکَه جنگیکا بجَنگ. اَ زَیرونه زندَگی کن چَیرا بَتِشون خِلِه کردیَه آچیک، و اَی وِرَ شاهیدون حِضوریکا، ایترافِرر کردَ.

¹³ اَز، خدایی کن گِردِ چییون زندَگی بَبَخشِستی حِضوریکا، و مسیح عیسی ناریکا کن پونتیوس پیلاتوسی وَریکا، چاکَه ایترافِش کردَ، بَرک بَتِه سیفارش بَکَم،

¹⁴ کن اِم حِکمی تا چَمه خداوند عیسی مسیح آمِه موقه، بی عَیب و چَمای کا غَم بَری،

¹⁵ کن خدا اِمی موناسیبَه وقتیکا اَنجوم آرَدا، اَ کن موتبارکَه و تاکَه حاکیم و شاهون شاه و خداوندون، خداوندَ.

¹⁶ تاکَه هَیَه کن زَیرونَه، اَ کن ایلَه نوریکا اَ، کن نییَبن بَیکا نِزِک آشِه، هیچ کَس بَی ویندَش نیَه و نییَشا ویندِ، حورمت و سلطَنَت تا ابد چَیرا ببو. آمین.

¹⁷ اِم دِنیا پولدارون بواج کن یالَه نار آنِبون و اِم دِنیا مالی سَردِرِ کن نیمَند، اومید مدارن. بَسکم چَوون اومید خدا ایکا ببو کن گِردِ چییون فِرَوون چَمرا آمادَ آرَکَرد تا اوونکا کیف بکَرم.

¹⁸ اَوون فِرمون بدَ کن چاکی بِکَن و چاکَه کارون دلَکا دولتمند ببون، دست و دلباز و بخشندَ ببون.

¹⁹ اِنترَکه، اِشتَنرا ایلَه گنجی گِرد آنَّکرد کن چَوون آیندَرا آمبستَه هیم بَبیَه، تا بشان اَ چیی ایی کن حَییقیَه زندَگیَه، بَدَست بوعَن.

²⁰ تیموتائوس، اَ امانتی کن اِشتِه دَست دوعَشونه، غَم بَه. دَدارَ گَفونکا و زِرَبَرا اَ فکرونکا کن ایشتباهی اَوون مَریفَت باتینَه کا، رَت آب؛

²¹ چون بَعضییِن کن اِم چییون دلَکا ایدعا بَکَن، ایمانیکا رَت آبَه اینَه. فیض بَتِنه دَرِ ببو.