اوّلین نامَه تیموتائوسیرا 5 - کتاب مقدس به زبان تالشي - گویش مرکزی

کلیسا خونه آموجِن

¹ پیرَ مِردی تَشر مژَن، بَسکم بَی هنتَه اِشتِه دَدَ شیوار تشویق بکَه، و جَوانون هنتَه اِشتِه برااون شیوار،

² و پیرَ ژِنون نی هنتَه اِشتِه نَنَه شیوار و جوانَه ژِنون هنتَه اِشتَن خالا اون شیوار، گِردِ پاجا به کا.

³ ویوَ ژِنِنی کن واقییَن بی کَسین، حورمت بکَه.

⁴ ولی اَگَم ویوَژِنی خردن و نوَ بَداشتی، اَیِن پی اَولیکا یاد بیگِن کن اِشتَن خانیواندَ غَم هردِ نَه، اِشتَن دینداری آمونن و اِنترَکه اِشتَن دَینی، اِشتَن دَدَ و نَه نَه را اِشتَن بابا اونرا اَدا بکَن، چیرا کن اِم کار خدا راضی بَکیَه.

⁵ ولی اَ کن واقییَن ویوَ یَه و بی کَسَه، چَی اومید خداکارَ و شَوانَه روج دِوا بَکَی و خداکا کاریَری بَپیشَه.

⁶ ولی اَگَم ایلَه ویوَ ژِنی عَیّاشی دلَکا زندَگی بکرِ، با امکن زندَیه، ولی مردیَه.

⁷ اِم چییون حکم بکَه تا چَوون زندَگی کا چیی ایی چَوون چَمای بِه را نِبو.

⁸ اَگَم کَسی اِشتَن خیشون بَخِصوص اِشتَن که آدَمون نیازی دوملَه مبو، اِشتَن ایمانی حاشا بَژَی و ایلَه بی ایمانیکا بد تَرَ.

⁹ تاکَه اَیِنی نومی ویوَژِنونکا بنوس، کن شِصتیکا ویشتَر ببون و ایکَرَ شو، شَه ببون.

¹⁰ و چَوون تَریف چاکَه کارون اَنجوم دوعِه خونه بَرشَه ببو، یعنی: اِشتَن خردنِنِشون یال آکردَشون ببو، خَلکینه مِیمان نَواز ببون، موقدسَه آدَمون لِنگی شوشتَشون ببو، چَوون هواس عِجِزونکا ببو، و بَشتن هر چاکَه کاریرا وقف کردَشون ببو.

¹¹ ولی جوانَه ویوَژِنون نومی مَنوِس، چون هَتَه کن چَوون هَوا هَوَس اَوون مَسیح کا رَت آرَکَرد، بَپیشونَه شو بشون.

¹² اِمی خونه کن اِشتَن اَوّلنَه ایمانی پا بِن بنانَه، اِمی خاطِر محکوم آنَّب.

¹³ و غَیرَاز اِم، اَیِن تنبل بِه آموج بَگَتینَه، اِم کَه اَ کَه بَشینَه، و نِه تاکَه تنبلی، بَسکَم خَبر اَبَر و فِضول بَبیبن و اَ چیی اِنی کن نِباید بِواجن باتینَه.

¹⁴ پس چمن نظَر اِمَه کن جوانَه ویوَ ژِنِن شو بشون، خِردن بوعَن و کَه غَم بَرِن و غَنیمی ایفترا گَتِه فِرصَتی نِدَرن.

¹⁵ چون ایسَه نی بعضیِن شیطونی دوملَه شَه اینَه و گومرا آبَه اینَه.

¹⁶ اَگَم ایماندارَ ژِنی، اِشتَن خیشونکا ویوَ ژِنی بدارِ، پی اِشتَن اَوون کاریَری بدرِ تا کلیسارا سربار نِبون و کلیسا بشا ویوَ ژِنونی را آرَسِه کن واقییَن بی کَسین.

¹⁷ ایسبیَه ریشِنی کن چاک رهبری کردَشون ببو، دِ برابر حورمت نوعه لَیاقَتی دارِن، بَخِصوص اَیِنی کن موعیظَه کردِکا و آموج دوعِه کا زَمَت بَکشتین.

¹⁸ اِمی خونه کن کیتاو توراتیکا باتیَه: «سیامالی کن گِرَگا بَکوستی، چَی گَوی دمَبَست» و «کاریگَر پی اِشتَن مِژدی ویگِرِ.»

¹⁹ هیچ کِرَم کلیسا ایسبیَه ریشون زِرَبَرارا، هیچ ایفترایی قبول مکَه، مَگَم اِمکن دِ یا سِه شاهید شاهیدی دوعَشون ببو.

²⁰ اَیِنی کن گناخ کردِکا ایصرا بَداشتین، گِردی نَکا تَشر بِژَن تا دییَرَ آدَمِن بتَرسِن.

²¹ خدا و مسیح عیسی و اینتخاب بَه فرشتَه اون نَکا، بتِکا خاشتو خازِمه کن بی غَرَض اِم قانونون اَنجوم بدَری و طرفداری کردِ خونه، هیچ کاری اَنجوم نِدَری.

²² اِمی خاطر کن ایی نفری خیدمت کردِرا اینتخاب بَکری کا مَتاوی، دییَر آدَمون گِناخیکا شریک آمَب، بَسکم بَشتن پاجا غَم بَه.

²³ دِ تاکَه آو مَهِنج، بَلکَم اِشتِه لَوَ خونه و آزارِنی کن اوزن هِستِرَ، تیکَلی ایی نی شراو بِنج.

²⁴ بعضیون گِناخ دیارَ و اَیِن ناردَکَر دیوون کردِرا بَشین، ولی بعضیون گناخ عرَی دیار آرَبن.

²⁵ پس چاکَه کارِن نی دیارین، و حتی اَیِنی کن دیار نینَّه، نییَبن اوون نون آکَردِ.