اوّلین نامَه تیموتائوسیرا 4 - کتاب مقدس به زبان تالشي - گویش مرکزی

بعضی اِن ایمانیکا آنَّگَردِست

¹ ولی خدا روح، دیار باتیَه کن آخر زَمانیکا بَعضییِن بَشتن، گول اَژنَه روحونکا و پَریانون آموجی وَقف بَکنه و ایمانیکا آنَّگردِست.

² اِم آموجون، دِرواَوجِن و دِسرَ کرچَنگِن بوعنَه کن چَوون ووژدان مردَیَه.

³ اَیِن ایزدواج کردِ منع بَکنه و دستور درِن هردَچییونی که خدا اَوون خلق کردشَه نَرِن، تا اَیِنی کن واقییَن ایمان بَداشتین و اَی آزنِن، شکر کردِ نَه اَ هَردَ چییون بَرِن.

⁴ چون هر چیی ایی کن خدا خَلق کردشَه چاکَه، و هیچ چیی ایی نِباید رد کردِ، اَگَم شکر کردِ نَه قِبول ببو،

⁵ چیرا کن خدا کلامینَه و دِوا نَه تقدیس آرَب.

⁶ اَگَم اِم چییون برا اونرا آموج بدَری، مسیح عیسی وزییَر آشَبِن، کن کلامی ایمانیکا و چاکَه آموجی کن چَی دوملَه ایشَه، تربییَت بَگَتیش.

⁷ تِه دَدار و کِفرَ اَفسانَه اونَّه کاریر نِبو، بَسکم دینداریکا بَشتن تربیت اَکَن،

⁸ چون اَگَم چِه، تَنی تربیتیکا تیکَلیی فایدَ ایی بداشتی، ولی دینداری گردِ چییِن بَرَ بَداشتیَه، اِمی خونه کن هِم اِم زندَگی وهِم آیندَ زندَگی وَعدَ دَرِ.

⁹ اَم گَفیَه کن بَبی بَی ایتماد کردِ و هر وَریکا بَبی قِبول کردِ.

¹⁰ چون اَمه اِمی خاطر زَمَت بَکَشتیمون و تقلا بَکَمون، چون اَمه چَمه اومیدی زندَ خدا سردِر نوعَمونَه کن آدَمون گِردی نیجات اَدَرَ، بَخصوص اَیِنی کن ایمان بَداشتین.

¹¹ اِم چییون حِکم بِکه و آموج بدَ.

¹² مَرزِن هیچ کَس بَتِه اِشتِه جوانگیری خونه بَتِه گِچ بَحیساب بوعَرِ، بَسکم گَف ژِکا و کاریکا و موحبتیکا و ایمانیکا و پاجا بِه کا، گردِ ایماندارونرا سرمشق بب.

¹³ تا چمن آمِه بَشتَن، خدا کَلامی خَندِ آدَمون دلَکا و اَوون تشویق کردِ و آموج دوعِه وقف اَکَن.

¹⁴ اَ عطا ایی کن اِشتِه دلَکارَ، بی ایتینایی مکَه، عطایی کن اَموقه کن شورا ایسبیه ریشِن اِشتِه سَر بال آناشون و پیشگویی واسیطنَه بَدَست وَردِر.

¹⁵ اِم چییون اَنجوم بدَ و بَشتن چَیرا وقف بکه تا اِشتِه پیشرفت گِردیرا دیار آبو.

¹⁶ قَشَنگینَه اِشتِه هَواسی بَشتَنکا و اَ آموجیکا کن کایشَه دوعِه ببو. اَوونکا آمبَست بومون، اِمی خاطِر کن اِم کارینَه هِم بَشتن و هِم اَیِنی کن اِشتِه گَفی دَنَّرَست، نیجات آشَدا.