اوّلین نامَه تیموتائوسیرا 3 - کتاب مقدس به زبان تالشي - گویش مرکزی

شمَاسِن و کلیسا ناظیرِن

¹ اِم گَفییَه کن بَبی بَی ایتِماد کردِ: کن اَگَم کَسی کلیسا سَردِرِ نیظارَت کردِ طمارزو بدارِ، چاکَه کاری دوملَه یَه.

² پس پی کلیسا ناظیری زندَگیکا نِبایَد چیی ایی چَی چَمای کردِرا ببو، تاکَه ایلَه ژِن بدارِه، هوش ببو، اِشتَن نفسی نَه بیگِرِو آبرو مند ببو، مِیمان نواز ببو آموج دوعه بِشا؛

³ نِه کم عرخَه هر، یا زورَواج ببو، بَسکم آرام ببو؛ و نه جنگِستِه دوملَه ببو و نِه پولدوست.

⁴ اَ پی اِشتَن کَه آدَمون ایدارَ کردِ عوهدَکا چاک بِرِن بَرا و اِشتَن خِردَنون اِنتَرَ تربیت بکرِ کن کامیلَه ایحتیرامینَه، بَیکا فِرمون ببَن.

⁵ اِمی خونه کن اَگَم کَسی مَزنِه چنترَ اِشتَن کَه آدَمون ایدارَ بکرِ، چنتَرَ بشای خدا کلیسا غَم بَرِ؟

⁶ و تازَ ایماندار مبو، نِکَرِ یاله نار آبو و اِبلیسی شیوار محکوم ببو.

⁷ و عَلاوَ بَر اِم، اَ پی کِلیسا بِرنی آدَمون دِلکا نی خوش نام ببو تا رسوا آنِبو و ابلیسی دومیکا مَویلاخه.

⁸ هنترکه شَماسِن پی باوقار ببون، دِسَرَ کرچنگ مَبون، یا شراویکا مَویلاخین، نادِرستَه بَرَ را طمَع ندارِن.

⁹ اَیِن پی ایمانی رازی، پاجا اَ وِژدانینَه غَم بَرن.

¹⁰ و اَیِن پی اَولیکا ورداورد ببون؛ چَی به دوملَه اَگَم ثابیت بکَن عَیبیشون نییَه، بَرزَ شماسی مقامیکا خیدمت بِکَن.

¹¹ هنترَکه نی، چَوون ژِنِن نی پی باوقار ببون، ایفترا نِژَنِن و بَسکَم هوش ببون و گردِ چییونکا اَمین ببون.

¹² هر کِرَم شَماسونکا پی ایلَه ژِن بِدارِن و پی بشا اِشتَن کَه آدَمِن و اِشتَن خردَنون ایرادَ کردِ عوهدَکا چاک بِرِن بَرا.

¹³ چون اَیِنی کن شَماسی مقامیکا چاک خیدمتِشون کردَ ببو، ایلَه چاکَه مَقامی وینَّگَت و اَ ایمانی کن مَسیح عیسی دلَکا اَ یالَه ایطمینانی بَدَست بوعَنَه.

¹⁴ اومید بَداشتیمه کن خَیلی زو اِشتِه وَر آم، ولی اِمون تِرا بَنوشتیم تا،

¹⁵ اَگَم چمن آمِه عَری دگِنِسته، بِزنی کن خدا کَه آدَمون دلَکا کن زندَ خدا کلیسا و حَییقَتی سِتون و بینا اَ، چنتَرَ پی رفتار کردِ.

¹⁶ واقییَن کن دینداری راز بَرک یالَه: اَ جندَکی دَلکا اَیر آبَه، خدا روح واسیطَنه تصدیق به، فرشتَه اِن اَشون ویندَ، قامونرا اییلام بَه، دِنیا دلَکا بَشون ایمان وردَ، و شکوه و جلاینَه، کَفاراشون بردَ.