اوّلین نامَه تیموتائوسیرا 2 - کتاب مقدس به زبان تالشي - گویش مرکزی

گِردیرا دِوا بکَرَ

¹ پس، هر چیکا بَه نه، بَپیمَه، درخواستِن، دِوا اِن، شیفاعَتِن و شکر گذاریون گردِ آدَمونرا اَنجوم بدَرَ،

² حاکیمونرا و صاحیب منصَبونرا، تا اَمه بشوعَم آرام و آسودَ زندَگیی ایی بدارَم کن کامیلَه دیندارینَه و وَقارینَه ببو.

³ اِم چَمَه نیجات اَدَر، خداچَمیکا چاک و چَی دِلپیستَه یَه،

⁴ کن اَپیشَه گِرد آدَمِن نیجات بیگِن و حییقَتی آزنن.

⁵ اِمی خونه کن تاکَه ایلَه خدا هِسته و خدا و آدَمون وَسطیکا تاکَه ایلَه واسیطَه هِسته، یعنی اَ اینسان کن مسیح عیسی اَ؛

⁶ اَ کن اِشتَن جانی دوعِه نَه، گردِ آدَمون، خونَه پولی آداشَه. اِم حَییقَتی سَر، موناسیبَه موقه کا شاهیدیشون دوعَه،

⁷ اِمی خونه کن اَز اِمی خاطِر اینتیخاب بیمَه تا غَیر یَهودیونرا ایلَه آموج اَدَر و ایلَه رسول و ایلَه موعَلیم ایمانی دلَکا ببوم، حَییقَتی باتیم و دِرو نِمَدا.

⁸ پس چمن طَمارزو اِمه کن گِردِ جِگا اونکا مِردِن دِوا بِکَن، و بی غَضَّب و خَرا خِلِه اِشتَن بالون دِوا کَردِرا کَفا بِبَن.

⁹ هنتَرَکه نی بَپیمَه کن ژِنن آبرومَندَ شندِر دَکَن و نیجابَتینه و حَیا نَه، نِه امکن دَوَته ذِلفینه، یا طِلِه و مِرَنه، یا گِرونَه شِندِرینَه،

¹⁰ بَسکم بَشتن چاکَه کارونَّه، هته کن اَ ژِنون شاَئنیکارَ کن ایدعا بَکن دیندارینَه.

¹¹ ژِن پی سکوت بکَرِ و کامیلَه فِرمون بِه نَه آموج بیگِرِ.

¹² اَز ژِنی ایجازَ نِمَدا کن آموج بِدَ یا ایلَه مِردی سَر تسلط بدارِ، بَسکَم پی ساکیت ببو.

¹³ اِمی خونه کن اَولیکا آدَم خلق بَه و چَی بَه دوملَه حوا.

¹⁴ و آدَم گولِش نَردَ، بَسکم ژِن بَه کن گولِش هردَ و نافِرمون آبَه.

¹⁵ ولی ژِن خِردَن دِنیا وردِ نَه، نیجات بَگَتی، اَگَم ایمانیکا و موحبَتیکا و موقدَّس بِه کا، نیجابَتیکا بومونن.