اوّلین نامَه تَسالونیکی کلیسا را 5 - کتاب مقدس به زبان تالشي - گویش مرکزی

خداوندی روج

¹ اَی برا اِن، ایسَه، وقتِن و زمانون خونه، نِپیستِشه چیی ایی شمَرا بنوسم.

² چون شمه اِشتَن چاک بَموستیرون کن خداوندی ویگَردِستِه روج، هنتَه پتارچی ایی کن شَویرا آ، آرَرَست.

³ اَ موقه مردوم باتینه: «صلح وسلامتی و اَمن و اَمانَه»، چَی به دوملَه ایکَرَ ایی نیفله آبه چَوون سَردِرِ اَیر آرَب، هنته کن، گونَه ژِن، زَندِ داجی بَگَتی، و اَیِن نییَشا بروشتِه.

⁴ ولی شمَه اَی برااِن ظِلَماتیکا نیرون کن اَ روج هنته پتارچی شیوار بشمَه غافلگیر بکرِ.

⁵ شمه گِرد نوری خِردَنن و روجی خِردَنِنیرون؛ اَمه شَو و ظلَماتی شِن نیمون.

⁶ پس هنته دییَرَ کسون شیوار بَشتن خاو نِژَنم، بَسکم بیدار و هوش ببَم.

⁷ چون اَیِنی کن بَخِتینَه، شَویرا بَختین، و اَیِنی کن مَست بَکن، شَویرا مست بَکَن.

⁸ ولی اَمه اِمی خونه کن روجی شِنیمون، پی هوش ببَم، و ایمان و موحبتی زرِه دکَرَم، و نیجات گَتِه اومیدی هنته کِلاخودی شیوار کلَکا آنَرَم.

⁹ اِمی خونه کن خدا اَمَش نِه غَضَّبیرا، بَسکم چَمَه خداوند عیسی مسیح واسیطنه، نیجات گَته خونه تَیین کردَشَه،

¹⁰ اَ کن چَمَه خونه مردَ، تا چِه هوش ببَم چه خاویکا، بَینه زندَگی بکرم.

¹¹ پس یَندِ تشویق و ایمانیکا تقویَت بکَرَ، هته کن ایسَه نی بَکَرون.

آخِرین سیفارِشِن و خَیرَ دِوا

¹² اَی برا اِن ایسَه، شمَکا خاشتو خازِمه اَیِنی کن شمَه دلَکا زَمَت بَکشتین و خداوندیکا شمه رهبرینه و بشمَه اَندَرز بَکن، ایحترام بنَرَ،

¹³ و موحبتینه، اَ کارِنی خونه کن اَیِن اَنجوم دَرِن، اَوون بَرک ایحتیرام بکَرَ. یندِنَه صلح و سلامتیکا زندَگی بکَرَ.

¹⁴ اَی برا اِن، شمَکا خاشتو خازِمه کن تنبلون نصیحت بکرَ؛ ترسو اون تشویق بکرَ؛ عِجِزونرا آرَسه؛ و گِردینه صبور ببَه.

¹⁵ هوش ببَه، هیچ کَسی، بَدی بَدینه جواب نِدَرِ، بَسکم یَژَن یَندِ سَر و گِردِ آدَمون سَردِرِ چاکی کردِ دوملَه ببه.

¹⁶ اوزون خَش ببَه؛

¹⁷ یَژَن دِوا بکَرَ؛

¹⁸ هر وَضعیکا شکر بکَرَ، اِمی خونه کن خدا خواستَه مَسیح دلَکا شِمَرا اِمَه.

¹⁹ خداروح آرا دَنِکِشه؛

²⁰ پیشگو اییون گِچ بَحیساب موَرَ.

²¹ بَسکم گِردِ چییون وَرداوَرد بکَرَ؛ اَ چیی ایی کن چاکَه کا، آچیکَه.

²² هَر مودیل بَدیکا رَت آبَه.

²³ ایسَه خدا صلح سلامتی، اِشتَن بَشِمَه کامیلا تقدیس بکرِ و تا چَمه خداوند عیسی مسیح آمِه، شمه روح و جان و تن بی عَیب بومونِه.

²⁴ اَ کن بَشِمَه خِله بکَیه، اَمینه؛ اَ حتما اِم کاری بَکیه.

²⁵ اَی برا اِن، چَمَرا دِوا بکَرَ.

²⁶ موقدسَه ماچینِه نَه برا اون گِردی سلام آدَرَ.

²⁷ خداوندی حِضوریکا، بَشِمَه قَسم دَرِم کن گِردِ برا اونرا اِم نامَه بوخونَه.

²⁸ چَمه خداوند عیسی مسیح فیض شمَنه ببو.