اوّلین نامَه تَسالونیکی کلیسا را 4 - کتاب مقدس به زبان تالشي - گویش مرکزی

زندَگیی کن خدا راضی آرَکَرد

¹ اَی برا اِن آخیر بَسَر، اَمه خداوند عیسی دلَکا، شِمکا خاشتو خازِمونَه، هَتَه کن چنتَه زندَگی کردِ و خدا راضی آکَردِ، امَکا بَشمَه آرَستَه، هته کن کاینَه اَنجوم دوعِه، اِم کاری ویشتَر و وِرتَر اَنجوم بدَرَ.

² چون بَموستیرون کن عیسای خداوندی واسیطنَه، چه حِکمِنی بَشِمَه آدوعَمون.

³ چون خدا ایرادَ اِمه، یعنی شمَه موقدَّس بِه: بَشتن بی عیفتیکا رَت آکَرَ؛

⁴ تا هر کِرَم شمَکا پی بِزنِه کن چنترَ اِشتَن تَنی، موقدَّس بِه و عیزَّتیکا غَم برَ.

⁵ نِه اَ غَیر یَهودییِنی شیوار کن خدا آنینَزنی، شهوت و هَوا هَوَسیکا؛

⁶ تا هیچ کس اِم کاریکا، اِشتَن برا حَقیکا خطا یا سوایستفادَ نِکرِ. هته کن چیمی بَه نه بَشِمَه واتِمون و بَه جِد هوشدار دامون، خداوند اِم کارون گِردی تَقاصی ویرَگَت.

⁷ اِمی خونه کن خدا اَمَش نِه تاکَه پاجا بِه را، بَسکم موقدَّس بِه را خِله کردشَه.

⁸ پس، هر کَم اِمی رَد بکَرِ، نِه کن اینسان، بَسکم خدایی کن روح القودوسی بَشِمَه آرَدا، رَد آکردشَه.

⁹ ایسَه برا بِه موحَبَتی خونه نِپیستِمه چیی ایی شِمَرا بنوِسم، اِمی خونه کن شمَه خدا کا آموج گَترونه کن یَندِ رَی بدارَ،

¹⁰ اِمی خونه کن واقییَن کن شمَه گِرد برا اون، مقدونیَه اِم سَر اَسَریکا رَی داریرون. ولی اَی برا اِن، بَشمَکا خاشتو خازِمه کن ویشتَر و وِرتَر اِم کاری بَکَر.

¹¹ آرامَه زندَگی طَمارزو بدارِ و اِشتَن کاریکا ببَه و اِشتَن بالونَّه کار بکَرَ، هَتَه کن اَمه بَشِمَه فِرمون آدامون.

¹² تا اَیِنی ناریکا کن کلیسا بِرنیکاینَه، دِرستینه زندَگی بکرَ و دییَرَکَسی موحتاج آنِبَه.

خداوندْ عیسی ویگردِسته

¹³ اَی برا اِن، نَپیمَه اَ ایماندارِنی خونه کن مردَاینه کا بی خبر ببَه، نِکَرِ دییَرَ آدَمونی شیوار کن اومید نینَّداشت، عازیَه بیگِرَ.

¹⁴ اِمی خونه کن اَگَم ایمان دارَم کن عیسی مَردَ و هنی زندَ آبه، پس هنترَکه، خدا ایماندارِنی کن عیسی دلَکا مَردَ اینَه نی، بَینه آگاردنِه.

¹⁵ اِمی خونه کن اَمه خدا کلامی واسیطنه اِمی بَشمَه اییلام بَکَمون کن اَمه کن هَنوزَنی زندَ ایمون و تا خداوندی آمِه موقه بَمندیمون، مَردَ ایماندارونکا نار دَنی مونَش.

¹⁶ اِمی خونه کن خداوند اِشتَن، ایلَه حِکمینَه، تتَّه لَسَّنه و فرشتَه اون رَئیسی سَسینَه و خدا زرنا سَسینه، کن آستامونیکا ویرَرا. اَولیکا اَیِنی کن مسیح دلَکا مردَ اینه زندَ آنَّب.

¹⁷ چَی به دوملَه، اَمه کن زندَایمونَه و هِستیمون، اَوونَّه خِرون دلَکا کفا بَبَنه، تا خداوندی هوا کا بوینَم، و اِنترکه اوزون خداوندینه بَبیمون.

¹⁸ پس اِم گَفونَّه یَندِ تشویق بکَرَ.