اوّلین نامَه تَسالونیکی کلیسا را 3 - کتاب مقدس به زبان تالشي - گویش مرکزی

¹ پس اِمی خاطر کن نِشاستِمونَه اِمی تاوِ وردِ، راضی آبیمون کن اَمه آتِنیکا تاک آهَرزِن.

² اَمه تیموتائوسی کن مسیح اِنجیلی کاریکا، خدا همکارَ و چَمَه برا اَ، شمَه وَریرا عندِمه تا بشِمه شمه ایمانیکا تشویق و قودور آکَرِ،

³ تا هیچ کِرَمی شمَکا اِم سختیون خونه سِست آنِبو، چون کن شمَه چاک بَموستیرون کن اَمه هِمیرا تَیین بَه ایمون.

⁴ چون هَنگومی کن شمَنه بیمون، ناردَکَر واتِمونَه کن اَیذَت آزار بَویندیرون، و هته کن بَموستیرون، اِنتَرَ نی آبَه.

⁵ اِمی خاطر، چون دِ نَشایمَه تاو وردِ، تیموتائوسی عندِمه تا شمَه ایمانیکا خبر بیگِم، اِمی خونه کن اِمیکا اَتَرسیمه کن اَ وس وَسه اَکَر یعنی ابلیس، ایی جوری بَشِمَه وس وَسش کردَ ببو، و چَمَه زَمَتِن هیچ آبَه ببون.

تیموتائوسی خبر کن آلاونِه

⁶ ولی ایسَه کن تیموتائوس شمَه وَریکا ویگَردِسته یَه و شمه ایمان و موحبتی چاکه خَبری وردشَه. اَ اَمَش خبر دوعَیه کن شمه اوزون چَمَه تَریفی چاک بَکَرون و هته کن اَمه شمَه ویندِرا ایشتیاق دارَم، شمه نی چَمَه ویندِرا خَوَصِرون.

⁷ اِمی خاطر، اَی برا اِن، گردِ اِشتَن سَختییِن موصیبَتونکا، شمَکا و شمه ایمانی خونه آلاویستیمون.

⁸ اِمی خونه کن ایسَه زندَگی بکَمون، اَگَم کن شمه خداوندی دلَکا آمبَست بومونَه.

⁹ ولی چنترَ بَشامون اِم همَه خَشی شمَه خونه، کن چَمه خدا حَضوریکا چَمه نَصیب بَیَه، شکر بکرَم؟

¹⁰ هته اَمه شَوو روج جان و دلینه دِوا بَکَمون کن تا رودَکَر بَشمَه بوینَم، تا شمه ایمانی هر کمو کاستی برطرف بکرَم.

¹¹ ایسَه چَمَه دَدَ، خدا اِشتَن، و چَمَه خداوند عیسی، چَمَه راه شمَه طَرفیرا درَراکنِست.

¹² و هته کن چَمَه موحبت شِمَرا ایضاف آرَب، خداوند شمه موحبتی یَندِ را و گردِ آدَمونرا وِر و کوکورو آکرِ.

¹³ و شمه دلون آمبَست آکَرِ تا اَموقه کن چَمَه خداوند عیسی گردِ اِشتَن موقدَسونَّه آ، چَمَه آستامونیَه دَدَ، خدا حَضوریکا، بی عَیب و موقدَّس ببَه.