اوّلین نامَه تَسالونیکی کلیسا را 1 - کتاب مقدس به زبان تالشي - گویش مرکزی

¹ پولوس و سیلاس و تیموتائوسی طرَفیکا، شهر تِسالونیکی کلیسارا، کن خدای دَدَ وچمه خداوند عیسی مسیح دلَکا اینه: فیض و صلح و سلامتی شِمرا ببو.

اِم ایماندارِن سرمشق آنَّب

² اَمه اوزون شمه گِردی وِجودیرا خدا شکر بَکمون و چَمَه دِوا اونکا یَژَن بَشِمَه یاد آمونَفَند،

³ شمه کارون کن ایمانیکا اَ و زمَتی کن موحبتی دلَکا کَشتَرون و شمه آمبَست بِه اومیدیکا، کن چَمَه خداوند عیسی مسیح کا اَ، خدا و چَمه آستامونیَه دَدَ ناریکا یاد آمونَفَند.

⁴ چون اَی برا اِن کن خدارا خاجَتی ایرون، اَمه بَموستیمون خدا شِمَش اینتخاب کردَیَه.

⁵ اِمی خونه کن چَمَه اِنجیل تاکَه گَفینَه نِه، بَسکم زبقینَه و خدا موقدسَه روح نَه و کامیله ایطمینانینَه بَشِمَه آرَستَه، هته کن چاک بموستیرون شمه خونه چنترَ شمه دلَکا رفتار کردِمون.

⁶ شمه اَمکا و خداوندیکا سرمشق گَتِرون، اِمی خونه کن برکه وِرَ رنجون دِلَکا، اَ خَشی ایی نَه کن خدا موقدسه روح آرَدا، خدا کلامِرون قِبول کردَ.

⁷ اِنترَکه شمه مقدونیه و اَخائیَه گردِ ایماندارونرا سرمشق آبیرون،

⁸ اِمی خونه کن شمه واسیطَنه خداوندی کلام تاکَه مقدونیَه و اَخائیَه کا نَژَنینَه، بَسکم گِرد جگااونکا شمه ایمانیکا کن خدارا دارَ، گَه بَه گَه بَبی، اَنه کن دِ لازم نییَه اَمه چیی ایی بواجم.

⁹ اِمی خونه کن اَیِن اِشتَن شمه چاکَه ایستقبال کن اَمَکا کردِرون گَف بژَن، و اِمکن چنترَ بوتون آهَشتِرون، خدا طرف آگَردِستِرون تا حَییقیو و زندَ خدا خیدمت بکرَ

¹⁰ و تا خدا زوعَه آستامونیکا آمِه اینتیظاریکا ببَه، کن خدا بَی مردَ اونکا زندَ آکَردِشه، یعنی عیسی، کن اَمَش آیَندَ غَضَّبیکا بَرَخامونِستی.