پطروسی اوّلین نامَه 5 - کتاب مقدس به زبان تالشي - گویش مرکزی

خدا رَمه را شونه ببه

¹ اَز کن اِشتَن ایسبیَه ریشونکا ایمَه و مسیح رَنجون شاهیدیمَه و شِکوه و جَلالی کن دیار بَبی کا شریکیم، ایسبیَه ریشِنی کن شمَه دِلَکانَه سیفارش بَکم کن:

² رَمه ایی کن خدا شمه دِست دوعَیَه هَته کن خدا بَپیشَه شونَه گیری و نیظارت بکرَ، نِه کم زورینه بَسکم شمه میل و رغبَتینَه ببو، و شمَه شرم آوَرَ بَرَ خونِه را مبو بَسکم ایشتیاقینَه ببو.

³ نِه اِمکن اَیِنی سَر کن شمه دَست آدَعوشونه را سروری بکرَ، بسکم رَمه را نمونَه ببَه،

⁴ زمانی کن شونه اون رئیس اَیر آبو، شکوه و جلالی تاج کن نیفیت آنیَب وینَّگَت.

⁵ هِنترَکه اَی جَوانِن، شمه ایسبیه ریشون فِرمون ببه. شمه گِردِ، اِشتَن رفتاریکا فروتنی دَکرَ، اِمی خونه کن، «خدا یالَه نارون نَکا بمندی، ولی فروتنَه آدَمون فیض بَبخشِستی.»

⁶ پس بَشتَن خدا قودورَ بالی بنیکا فروتن آکَرَ تا موناسیبه وقتیکا بشِمه دَورازِ.

⁷ اِشتَن تفشیشون گِردی، چَی دَست آدَرَ اِمی خونه کن اَ شمه فِکریکا هِسته.

⁸ هواسِرون اِشتَنکا ببو و هوش ببَه، اِمی خونه کن شمه غَنیم ابلیس، هنتَه شیری شیوار غورش بَکی و هر طرفیرا کا گردِسته تا ایی نفری پیدا بکرِ بَی ویبَرِ.

⁹ ایمانیکا آمبَست ببه و چَی رودَکَر بومونه، چون بَموستیرون کن دِنیا دِلکا شمه بِرااِن، هِم عذابونَّه سَراسَر آبین.

¹⁰ تلَکه زمانی رنج و عذاب بَردِ بَه دوملَه، پور فیضه خدا کن بَشِمَه مَسیح دلَکا خِلِه کردشَه تا چِی زَیرونه شکوه و جلالیکا شریک آبه، بَشِمَه هنی بَنا بَکی و آمبست و قودور و پایدار بَکیَه.

¹¹ سلطنَت تا ابد و تا ابد چَیرا ببو. آمین.

آخِرین سَلامِن

¹² سیلاسی واسیطَنه، کن بَی اَمینه برا ایی بَموستیم، موختصَر اِم چن گِلَه خطی شِمرا نوشتم تا شمه سیفارش بکَم و بَشِمَه اییلام بکَم کن خدا حقیقیَه فیض، هِمه. اَیکا آمبست بومونه.

¹³ خالاایی کن شهر بابِلیکارَ، اَ کن شِمَه شیوار اینتخاب بَیَه و هِنتَه نی چمن زوعَه مرقوس، شمَرا سلام بَدان.

¹⁴ یَندِ ماچینِه ایی نَه کن رَی داشته کا آ، سلام بدَرَ. شمه گِردیرا کن مسیح دَلکارون، صلح و سلامتی ببو.