پطروسی اوّلین نامَه 3 - کتاب مقدس به زبان تالشي - گویش مرکزیژِنن و مِردِن 1 هِنترکه، اَی ژِنن شمَه، اِشتَن شو فِرمون ببَه تا اِمکن اَگَم ایله اوونکا خدا کلامی فِرمون مبون، بی اِمکن چیی ایی اوون بواجَه، شمه رفتاری خونه ایمان بوعَن، 2 وقتی کن اَیِن شمه پاجا و موحترمه رفتاری دنَّدِشت. 3 شمه خاص گیری ظاهیری مبو، هنتَه دَوَته ذِلفون شیوار و طِلِه ویرَشتِه و گرونه شندرینه، 4 بَسکم بَرزَ شمه خاص گیری، شمه اَ دَرونیَه اینسانی ببو کن شمَه دِلیکارَ و نییَبن چمینه بَی ویندِ، و ایله آلاویستَه و مولایِمَه روحی نَه وَج آبَه ببو، کن خدا نظَریکا اِنتَرَ خاص گیری ایی برک با اَرزِشَه. 5 اِمی خونه کن گِذَشته دوورَ موقدسَه ژِنن کن خداکا اومید دارینَه، بَشتن اِنترَکه وَج آکَرینَه. اَیِن اِشتَن شو فِرمون بینَه، 6 هَته کن سارا اِشتَن شو ابراهیمی فرمون بَه و بَی اِشتَن آقا خِلِه اَکَریَه. شمه نی اَگَم چاکی بکرَ و تَرسناکَه چیی کا مترسَه، سارا خِردَنن بَبیرون. 7 هِنترَکه، شمه اَی مِردِن، شمه اِشتَن ژِنونَّه جوری زندَگی بکَرَ کن اَوون درک بکرَ و آزنَه، اِمی خونه کن اَیِن بَشِمکا ظَریفتَرینَه و چَوون ایحترامی غَم بَرَ، اِمی خاطر کن اَیِن شِمَنه فیض بخشَه زندَگی وارِثینَه، تا نِکَرِ کن شمَه دِوااِن بی جواب بومونن. صالح بِه را عذاب ویندِ 8 آخیر بَسَر، گِردِ شمه، یَک دِل و یک فکر و برا دوست و دلسوز و فروتن بِبَه. 9 بَدی بدینَه و زَبونی زَبونینَه جواب نِدَرَ، بسکم چَی عَوض، برکَت طلب بَکَر، اِمی خونه کن هِمیرا خِله بَه ایرون تا برکَتی بَدست بوعرَ. 10 اِمی خونه کن، «هَر کم که پَپیشه زندگی رَی بدارِ و چاکه روجون بِوینِه، پی بدیکا اِشتَن زونی غم بَرِ و اِشتَن لِوون گول ژِرا دَبسته. 11 پی بَدیکا رَت آبو و چاکی بکَرِ؛ و صلح و سلامتی دوملَه ببو و چَی دومله بشو. 12 اِمی خاطر کن خداوندی چَم پارسا اونکارَ و چَی گوش چَوون دِوا اونرا آجَه، ولی خداوند بدکارون زِرَبَرا اَ.» 13 اَگَم چاکی کَردِرا غَیرَت بدارَ، کییَه کن بَشِمَه ضرَر بژَنه؟ 14 ولی حتی اَگَم صالح بِه را عذاب بوینه، بَرَکت بگَتیرون. «اَ چیی ایکا کن اَیِن بَتَرسِستین، شمه مترسَه و تَفشیش دَنِگنَه.» 15 بَسکم اِشتَن دِلیکا خداوند مسیح موقدَّس بزنَه و بَی ایحترام بنَرَ و اوزون حاضیر ببَه تا هَر کَم اَ اومیدی کن شمَه دلیکارَ دلیلی دَپَرسِستَه، چَی جوابی بدَرَ، البت ایحترامینه و نرمینه. 16 اِشتَن ووژدانی پاجا غَم بَرَ، تا اَیِنی کن شمَرا ایفترا بَگتین، و اَیِنی کن شمه چاکَه رفتاری مَسیح دِلَکا بَد باتین، شرمندَ آبون. 17 چون اَگَم خدا خواستَه یَه، بِیتَرَ کن چاکَه کاری خونه عذاب بوینه تا بَدَ کاری خونه. 18 اِمی خونه کن مسیح نی ایکَرَ گناخون خونه عذابِش کَشتَه، یعنی اَ صالِح، غَیرِ صالِحون خونِه، تا اَمه خدا وَر بوعَرِ. اَ جَندَکیکا مَردَ، ولی روح دِلَکا، زندَ آبَه، 19 و روح دلَکا زیندانییَه روحون وَر شَه واَیِنیِش باخبَر کردَ، 20 هَه روحِنی کن گِذَشته دوورَکا نا فِرمونیشون کردَ بَه، اَموقه کن خدا، نوح زَمونَکا کن کَشتی سی آرَبیَه، صَبرینه اینتظار اَکَشیه. اَ کَشتیکا تاکَه چن گِله آدَم مند بین، یعنی هَش نفر، کن آوی واسیطَنه نیجات گتِشون. 21 و اَ آو، اَ غسل تعمیدی نمونَه یَه کن ایسَه بشِمَه نیجات دَرِ. ایله تعمیدی کن تنی کثیف گیری خونه نییَه، بسکم پاجا اَ ووژدانی طَمارزو اَ، کن بَپیشَه خدا بوینِه. اِم تعمید عیسی مسیح زندَ آبه واسیطَنه بشِمه نیجات دَرِ، 22 هه عیسای مسیح کن آستامونیرا شَه و ایسَه خدا راستَه بالی طرَفیکا پامندَ و فرشتَه اِن و زاکیندارِن و زِبقِن چَی فِرمون آبَه اینَه. |
@ 2024 Korpu Company