پطروسی اوّلین نامَه 2 - کتاب مقدس به زبان تالشي - گویش مرکزیموقدسه آدَمِن و ایله زندَ سِه 1 پس هر مودیل بدیکا، و هر مودیل حیلَه و دِسرَ کَرچَنگ گیری و زِرَ بردِ، و هر مودیل بدَ واجی بَشتَنکا رَت آکَرَ 2 و هِنتَه چِلَینه خِردَنون شیوار، پاجا و روحانیَه شِتیرا موشتاق ببَه، تا چَی واسیطنه اِشتَن نیجاتیکا پِروعَه، 3 اَگَم واقییَن چَشتَرونه کن خداوند چاکه. 4 بَیکا نِزِک آبِه نَه، یعنی اَ زندَ سِه کن آدَمِن بَی رد کردِشون، ولی خدا وَریکا اینتخاب آبه و با اَرزِشَه، 5 شمَه نی هنتَه زندَ سِه اون شیواریرون کن روحانیَه عیمارَت شِمکا سِی آرَب، تا هنته موقدسَه کاهینون شیوار آبه تا عیسی مسیح واسیطَنه، روحانیَه قِربونییِنی کن خدا اوون قِبول بَکی، تقدیم بکرَ. 6 اِمی خونه کن اِشعَیای پیغمبری کیتاویکا نوشتَه آبیه کن: «ایسَه صَهیونی کوکا سِه ایی آمَنا، ساختیمانی اصلیَه سِه کن اینتخاب آبیه و با اَرزِشَه؛ هر کَم بَی ایمان بوعَرِ شرمندَ آنییَبن.» 7 پس اِم شِمرا کن ایمانِرون وَردَیه، حورمتَه؛ ولی اَیِنیرا کن ایمان وردَشون نی، «هَه سِه ایی اَ کن اِستا اِن بَی رَد کَردِشون ساختمانی اَصلیه سِه آبَیه،» 8 و، «سِه ایی کن لِسکیستِه باعیث ببو، و کازَ مَغاری کن ویگِنستِه باعیث ببو.» اَیِن اِمی خونه کن خدا کلامیکا ایطاعت نینَّکرد، زَمینی سَر وینَّه گِنست، هَته کن اِم کاریرا تَیین آبَه یه. 9 ولی شمَه اینتخاب بَه اودوم و کاهینِنی هِستیرون کن شاهانَه کَهانَت بَکرون. شمه موقدَسه میلَّت و مردومی هِستیرون کن خدا مِلکیرون، تا چَی چاکه صِفتون اییلام بکَرَ، کن بَشِمَه ظِلَماتیکا اِشتَن عجیبَه نوری طَرَف خِلِه کردشَه. 10 چیمی بَه نَه شمه مردوم نِبیرون، ولی ایسَه خدا مَردومیرون؛ ایی زمان خدا رَحمتیکا محروم بیرون، ولی ایسَه دِ خدا رَحمَتِرون ویگَتیَه. 11 اَی خاجتی اِن، شمَکا کن اِم دِنیاکا مِسافیر و خَلکیرون خاشتو خازِمه، جندکی هوا و هوسیکا کن شمَه روح زرَبرا کان جَنگِستِه، رَت آبَه. 12 شمَه کارِن بی ایمانون دِلَکا چاک ببو، تا اَیِنی کن شمَه زِرَبَرا گَف بَژَن کن شمه اَعمال بَدَ، شمه چاکَه کارون ویندِه خونه، روجیکا کن خدا بَویندیمون، بَی پرستش بِکَن. صاحِب منصبونکا فرمون بردِ 13 خداوندی خونه، هَر صاحیب منصَبی کن اینسانون دِلَکا تَیین آبَیه فِرمون بِبَه، چِه پادیشا کن گِردیکا کَفاتَرَ، 14 و چِه حاکیمِن، کن پادیشا ماَمورینَه تا بدکارون موجازات بکَن و اَیِنی کن چاکه کار اَنجوم دَرِن تحسین بکَن. 15 اِمی خونه کن خدا خواستَه اِمَه کن شمه اِشتَن چاکَه کارینَه، نادانه آدَمون گفی ناری کن اَحماقانَه یه بیگِرَ. 16 هنته آزادَ آدَمون شیوار زندَگی بکرَ، اَمّا اِشتَن آزادی، سرپوشی آوشر گیریرا سِی آنِکرَ، بَسکم هنتَه خدا وَزییَرون شیوار زندَگی بکَرَ. 17 گِردی حورمَتی غَم بَرَ، برا اون موحبت بکَرَ، خدا ترس ببَه. پادیشا ایحترام بنَرَ. 18 اَی وَزییَرِن، کامیله ایحتیرامینه اِشتَن اَربابون فِرمون ببَه، نِه کم تاکَه چاکَو مَرَبانَه اربابونرا، بَسکم بی اینصافه اَربابونرا نی هَتَه ببَه. 19 اِمی خونه کن اِم ایلَه پور فیضَه کاریَه، اَ کن چَی چَم خِداکارَ، وقتی کن ناحَقَه عَذاب بِبَرِ، و بی اینصافی تاو بوعَرِ. 20 اِمی خونه کن گِناخ کَردِ خونه تِنبِه ببَه و تاو بوعَرَ، چِه بَرَ ایی چَیرا هِستَه؟ ولی اَگَم چاکی بکَرَ و چَی عَوضیکا عَذاب بِوینَه و تحمول بکَرَ، اِم کار خدا چمیکا پور فیضه کاریه. 21 چون اِمی خونه شِمَشون خِلِه کردَیَه، اِمی خونه کن مَسیح نی شِمَرا عذابِش کَشتَه و شِمَرا سرمشقی آناشَه تا هَه راهی کن اَ شه یَه، شمَه نی بشَه. 22 «اَ هیچ گِناخیش نِکردَ، و چَی گَویکا هیچ حیله ایی بِرِن نامَه.» 23 وقتی کن بَشون زَبون دَکَردَ، زَبونینه چَوون جوابی نِداشه؛ و اَموقه کن رَنجِش کَشتَه، تهدید نِکردِش، بَسکم بَشتن عادیلَه داوَر، خدا دَست آداشَه. 24 مَسیح اِشتَن، چَمه گِناخون، اِشتَن تَنینه صَلیبی سَردِرِ دوشی سَر گَتِش، تا اَمه گِناخونرا بِمِرَم وصالِح بِه خونه زندَگی بَکرم. چَی زمونَّه شفا گَتِرون. 25 اِمی خونه کن شمه هِنتَه گین آبَه پَسونی شیوار بیرون، ولی ایسَه، شمه شونَه طرف و شمَه جانون ناظِری طَرفیرا ویگردِستَه ایرون. |
@ 2024 Korpu Company