پطروسی اوّلین نامَه 1 - کتاب مقدس به زبان تالشي - گویش مرکزی1 پطروسی طَرَفیکا کن عیسای مسیح رسوله، اینتخاب آبَه اِنیرا کن، پونتوسیکا، غَلاتیَکا، کاپادوکیَه کا و آسیا و بیتینیَه کا، غوربتیکا وِلاخ آبَه اینه؛ 2 اَیِنیرا کن خِدای دَدَ پیشدانی واتنَه، و خدا روح کاری واسیطنه، کن تقدیس بَکَیه، و عیسای مسیح کا فرمون بَردِ خونه و چَی خون کن چَوون سَریکا پِشندِشون، اینتخاب آبَه اینَه: فیض و صلح و سلامتی فِرَوون شمَه سَردِرِ ببو. زندَ اومید 3 خدا و چَمه خداوند عیسی مسیح دَدَ موتبارک ببو کن اِشتَن یالَه رَحمتینَه، عیسی مسیح زندَ آبِه واسیطَنَه، مردَاون دلَکا، اَمَش تازَ دِنیا دَگِنستِه ایی بخشِسته، زندَ اومید داشتِه خونه 4 و میراثی کن مچم و نیفیت آنییَبن و نییَچِلکیست، کن شِمَرا آستامونیکا غَمِشون هردَیَه؛ 5 شِمَرا کن خدا خِنَرینَه و ایمان داشتِه واسیطَنه، اَ نیجاتی خونه کن آمادَ آبیَه تا آخیرَ زَمانیکا اَیر آبو، حفظ آبَه ایرون؛ 6 و اِمی خاطر بَرک خَشیرون، هَر چَنَه کن ایسَه اَگَم لازِم ببو موختَلیفَه وَرداوَرونَّه تَلکه زمانیرا بَرضَخ آنَّب، 7 تا شمَه ایمانی ایصالَت وَرداوَردیکا ثابیت ببو و عیسی مَسیح ظهور کَردِ روجیرا، ستایش و شکوه جلال و ایحترامی باعیث ببو، هَه ایمان کن طِلِه کا برک با ارزشتَرَ، هر چَنه کن نیفیت آرَبن، ولی آرا نَه وَرداوَرد بَبی. 8 اَگَم چِه شمَه عیسای مسیحِرون ویندَ نییَه، بَی رَی دارَ؛ و هر چَنه کن ایسَه بَی نینَّویند، بَی ایمان دارَ و بَرکَه پور جَلالَه خَشینه خَشی بَکرون، 9 شمَه ایمانی نتیجه بَویندیرون یعنی شمه جانون نیجات گَتِه. 10 هِم نیجاتی خونه، پَیغَمبَرِن دیقَتینه جِستجو اَکَرینَه، اَ پَیغَمبَرِنی کن اَ فِیضی خونه کن قرار به شمه شِن ببو، شِمَراشون پیشگویی کردَ. 11 اَیِن تقلا اَکَرینَه سَر آگِنن هَنگومی کن مسیح روح چَوون دِلَکا، مَسیح عذابن و شکوه و جَلالونکا، کن چی بَه دومله آی و پیشگویی اَکَریَه، چیکیرا و کِرَم زمانی آمونییَه. 12 چَوونرا دیار آبَه کن نِه کم بَشتَن بَسکم بَشِمَه خیدمت اَکَرینَه، اَموقه کن اَ چییونی خونه گَف اَژَنینَه کن ایسَه چَوون خونه اِنجیلی پَیغوم اَوَرونکا دَنّرست، اَیِنیکا کن خدا موقدسَه روح خونه کن آستامونیکا عَندَشونَه، خَشه خَبری بَشِمَه آنَّدا. حتی فرشتَه اِن نی اِم چییون ویندِ طَمارزو بَداشتین. موقدَّس بِبه 13 پس شمَه فیکرون، عَمل کَردِرا آمادَ بکَرَ، هوش ببِه و شمه اومیدی کامیلا اَ فیضی سَر بِنَرَ کن عیسی مَسیح اِشتَن ظهور کَردِ موقه بَشِمَه بَبَخشِستیَه. 14 هِنتَه فِرمونه خِردَنون شیوار ببه، و دِ، نادون بِه موقه هوا وهَوسون شیوار مَبَه. 15 ولی هِنتَه، شمه صلا اَژَنی شیوار کن قودّوسه، شمَه نی گِردِ اِشتَن رفتارونکا موقدَّس ببَه؛ 16 چیرا کن توراتیکا نوشتَه آبیَه: «موقدَّس ببَه، اِمی خونه کن اَز قودّوسیمَه.» 17 اَگَم اَ کن، هر کَسی کارون سَر بی اِمکن چَی طرفی بیگِرِ دیوون بَکیَه، دَدَ باتیرون. پس اِشتَن غوربتی دوورَ خدا تَرسینه بِگذِرامونَه، 18 اِمی خونه کن بَموستیرون شمَه رَخستِه، اِم دَدارَ راهون دلَکا کن اِشتَن دَدَاونکا میراث گَتَرونه، نیفیت آرَبَه چییونَّه، هِنتَه طِلِه و نِقرَ شیوار خِرییَشون نییَه، 19 بَلکَم مسیح با اَرزِشَه خونینَه، اَ وَرَ کن بی عَیب و بی لَکَّه یَه، خِرییَشونَه. 20 اَ کن دِنیا خَلق بِه، بَه نَه تَیین آبَه بَه، ولی اِم آخیرَ زمانونکا شِمَرا اَیر آبه. 21 شمَه چَی واسیطنَه خدا کا ایمان وَردَرونَه، خِدایی کن اَش مردَاون دِلکا زندَ آکَردِش و بَی شکوه جلال بَخشِتِش، تا شمَه ایمان و اومید خِداکا ببو. 22 ایسَه کن حَییقتیکا فِرمون بَردِنَه، اِشتَن جانون پاجا آکَردَرون تا بی ریا و برا اَ موحبَت بِدارَ، خالیصانه و پاجا اَ دِلینه یَندِ رَی بِدارَ. 23 اِمی خونه کن شمه هَنی دِنیا دَگنستَه ایرون، نِه کم نیفیت آرَ بَه تِخمیکا بسکم زَیرونه تِخمیکا، یعنی خدا کلامی واسیطنه کن زندَ یه و تا ابد بمندیَه. 24 چون، «گِردِ جندَکِن هنتَه واشی شیوارین و چَی شکوه جَلال واشون گولی شیوارَ؛ واش خِشک آرَب و چی گولِن وینَّب، 25 ولی خداوندی کَلام زَیرون بمَندی.» و اِم کَلام، اَ خشه خبرَ کن شِمرا اییلام آبه. |
@ 2024 Korpu Company