یوحنا اوّلین نامَه 5 - کتاب مقدس به زبان تالشي - گویش مرکزی

دِنیا سَردِرِ پیروز آبه

¹ هَر کَم ایمان دارِ عیسی هَه وعدَ دوعَه مَسیحَه، خدا کا دِنیا دَگنسته یَه؛ هَر کَم دَدَ رَی بَداشتی، چَی خِردَنی نی رَی بداشتیه.

² اِم جِگاکا بَموستیمون خدا خِردَنون رَی بَداشتیمون کن خدا رَی بداشتیمون و چَی حِکمونکا ایطاعَت بَکَمون.

³ اِمی خونه کن خدا رَی داشته هِمَه کن چَی حِکمون کا ایطاعت بِکَرَم و چَی حِکمِن سِنگین نینَّه.

⁴ اِمی خونِه کن هر کَم خدا کا دِنیا آمَه ببو، دِنیا سَردِرِ پیروز آرَب. چَمَه ایمان، اَ بَردِ ایی اَ کن دِنیا سَر پیروز آبَه یَه.

⁵ کیَه اَ کن دِنیا سَر پیروز آبِه بشا؟ جز اَ کن ایمان دارِ عیسی خدا زوعَه یَه؟

⁶ اَ کن آو و خونینَه آمَه، یعنی عیسی مسیح. نِه تاکَه آوینَه، بَسکم آو و خونینَه؛ و خدا روحَه کن شاهیدی دَرِ، اِمی خونه کن خدا روح، حَییقتَه.

⁷ اِمی خونِه کن اِم سِه گِلَه اینَه کن شاهیدی دَرِن:

⁸ خدا روح و آو و خون؛ و اِم سه گِلَه، یَندِ نَه دَرِ اینَه.

⁹ اَگَم اَمه اینسانی شاهیدی قِبول بَکَمون، خدا شاهیدی خَیلی یال تَرَ، چون اِم شاهیدی اییَه کن خدا، اِشتَن زوعَه خونه آدوعَشَه.

¹⁰ هَر کَم خدا زوعَه ایمان دارِ، اِم شاهیدی اِشتَنکا بداشتی. ولی اَ کن خدا شاهیدی باوَر نیَکَرد، اَی دِروو اَواج بَکی، چون شاهیدی ایی کن خدا اِشتَن زوعَه خونه آدوعَشَه، قِبول کَردَش نی.

¹¹ و اَ شاهیدی اِمَه کن خدا اَمه زَیرونَه زندَگی بَخشِستَشَه، و اِم زندَگی چَی زوعَه دلَکارَ.

¹² اَ کن زوعَه بداشتی، زندَگی بَداشتی و اَ کن خدا زوعَه نِدارِ زندَگی نییَداشت.

آخیر بَسر

¹³ اِمون شِمَرا نِوِشتِمَه کن خدا زوعَه نومی ایمان دارَ، تا بِزنه کن زَیرونَه زندَگی بَداشتیرون.

¹⁴ اِم هه اطمینانیَه کن چَی حِضوریکا دارَم کن هَر موقِه چیی ایی چَی ایرادَ واتنَه درخواست بِکَرَم، اَ چَمَه سَسی دَرَرَست.

¹⁵ و اَگَم بَموستیمون هَر چیی ایی، اَیکا بَپیمون چَمه سَسی دَرَرَست، پس اطمینان دارَم کن اَ چیی ایی کن اَیکا اَپیمون بَه، ویگَتَمونَه.

¹⁶ اَگَم کَسی بوینِه چَی برا گِناخی بکَیَه کن مَردِ را تمون آنییِب، دِوا بکَرِ و خدا بَی زندَگی بَبَخشِستیَه. اِمی کَسی خونِه باتیم کن چَی گِناخ مَردِ را نییَش. گِناخی هِستَه کن مَردِ را تمون آرَب. اِنتَرَ گِناخی خونِه نِمَوات کن پی دِوا بکَرَ.

¹⁷ گردِ بَدَ کارِن گِناخین، ولی گِناخی نی هِستَه کن مَردِ را تمون آنییَبن.

¹⁸ اَمه بَموستیمون کن هَر کَم خدا کا دِنیا آمَه یَه، گِناخیکا زندَگی نیَکرد، بَلکَم عیسی کن خدا کا دِنیا دَگنستَه یه بَی غَم بَردی و اَ، آوشَری بال بَی آنیَرَست.

¹⁹ اَمه بَموستیمون کن خدا کا هِستیمون و گِرد دِنیا اَ آوشَری زبقی بِنیکارَ.

²⁰ و اِمی نی بَموستیمون کن خدا زوعَه آمَه و اَمَش فهم بَخشِستَه تا اَ کن حَییقتَه آزنَم، و اَمه چَی دِلَکا هِستیمون کن حَییقته، یعنی چَی زوعَه عیسی مَسیح کا. هَیَه حَییقیه خدا و زَیرونَه زندَگی.

²¹ اَی گچه خِردَنِن، بَشتَن بُتونکا رَت آکرَ.