یوحنا اوّلین نامَه 3 - کتاب مقدس به زبان تالشي - گویش مرکزی

¹ بِوینَه دَدَ چنه اَمَش موحبت کردَ، تا اَمه خدا خِردَنِن خِلِه بِکَن! و اِنتَرَ نی هِستیمون! اِمی خاطِرَ کن دِنیا اَمه آنییَموست، اِمی خونه کن بَی آنییَموست.

² اَی خاجَتیِن، ایسَه خدا خِردَنِنیمون، ولی اَ چیی ایی کن بَبیمون هَنوزَنی دیار آبَه نیَه. ولی بَموستیمون اَموقه کن اَ اَیر آبو، چَی شیوار بَبیمون، چون بَی هَتَه کن هِستَه، بَویندیمون.

³ هَر کَم بیکا اِنتَرَ اُمیدی بَداشتی، بَشتَن پاجا آرَکَرد، هَتَه کن اَ پاجا اَ.

⁴ هَر کَم گِناخیکا زندَگی بَکَی، شَریعَتی زِرَبَرا عَمَل بَکَی؛ گِناخ شَریعَتی قانونی چاکنستِه اَ.

⁵ شمَه بَموستیرون کن اَ اَیر آبه، تا گِناخون نیفیت آکَرِ. بَیکا هیچ گِناخی دَرِ نیَه.

⁶ اَ کن چَی دِلَکا بَمَندیه گِناخی ایدامه نییَدا، کَسی کن گِناخیکا ایدامَه دَرِ، بَی نِه ویندَشَه و نِه آزنِستَشَه.

⁷ اَی گچَه خِردَنِن، مَرزَ کَسی بَشِمَه گومرا بکَرِ. هَر کَم صالحه آدَمی شیوار عَمَل بکَرِ، صالِحَه، هَتَه کن اَ صالِحه.

⁸ اَ کن گناخیکا زندَگی بَکَی اِبلیسیکارَ، اِمی خونه کن ابلیس هَه شِرووکا گِناخ کار بَه. اِمی خاطر خدا زوعَه اَیر آبه تا ابلیسی کارون هیچ بَرکَرِ.

⁹ اَ کن خدا کا دِنیا دَگنسته یه گِناخیکا زندَگی نیَکرد، اِمی خونه کن خدا ذات اَیکا بَمَندی؛ اَ نیَشا گِناخ کردِ ایدامه بدَرِ، چون کن اَ آدَم خدا کا دِنیا دگنسته یَه.

¹⁰ خدا خِردَنِن و شَیطونی خِردَنِن اِنتَرَکِه دیار آنَّب: هر کَم اَ چیی ایی کن دِرستَه اَنجوم نِدَرِ خداکا نییَه و هنته نی اَ کن اِشتَن برا رَی نِدارِ، خدا کا نیَه.

یَندِ رَی بدارَ

¹¹ اِم هِمَه پَیغومی کن اولیکا دَرَستِرون، کن پی یَندِ رَی بدارَ.

¹² اَمه نِباید قائِنی شیوار ببم، هه کن اَ آوشَری شِن بَه و اِشتَن برا کِشتِش. چییرا بَی کِشتِشَه؟ اِمی خاطر کن چَی اعمال بَد بینَه و چَی برا اعمال صالح به.

¹³ اَی برا اِن، اِمی خونه کن دِنیا شِمَکا بیزارَ، تَعجب نِکَرَ.

¹⁴ اَمه بَموستیمون کن مَرگیکا دَیوَردَمونه و زِندَگیرا آرَستَه ایمون، اِمی خونه کن برا اون موحبت بَکمون. هَر کم موحبَت نِکَرِ، مَرگیکا بَمَندیَه.

¹⁵ کَسی کن اِشتَن برا کا بیزارَ، آدَمَه کِشَه و شِمَه بَموستیرون کن هیچ آدَمَه کِشیرا زَیرونَه زندَگی دَرِ نیی.

¹⁶ مُحَبَتی اَ جِگاکا آموجِمون گتَه کن اَ، اِشتَن جانی چَمَه راکا آناشَه، و اَمه نی پی اِشتَن جانی برا اون راکا بِنَرَم.

¹⁷ ولی اَگَم کَسی دِنیا مال و مَنالیکا بِدارِ و اِشتَن برا دَس دَریس بِه بِوینِه، ولی اِشتَن رحمی بَیکا دریغ بکرِ، چِنتَرَ خدا موحبت اِنتَرَ آدَمیکا بَمَندیَه؟

¹⁸ اَی گِچه خِردَنِن، بِرَ موحبَت بِکَرَم، نِه تاکَه زونینَه و گَفینَه، بَسکم عملیکا و حَییقتیکا!

¹⁹ اِمیکا بَموستیمونَه کن حَییقتی کامون، و بَشامونَه اِشتَن دِلی خدا حِضوریکا مُطمَئن بِسازَم؛

²⁰ چون هر وَقت چَمَه دِل اَمه مَحکوم بکَرِ، خدا چَمَه دِلونکا یال تَرَ و گِردِ چیون بَموستی.

²¹ اَی خاجَتییِن، اَگَم چَمَه دِل، اَمه مَحکوم نِکَرِ، خدا حِضوریکا اِطمینان دارَم؛

²² و هر چیی ایی، اَیکا بَپیمونه، ویمونَگت، چون چَی حِکمون عمل بَکَمون و اَ چیی ایی کن چَی خَشی باعیث بَبی، اَنجوم بَدامون.

²³ و اِمَه چَی حِکم کن چَی زوعَه عیسی مَسیح نومی ایمان بوعرَم و یَندِ موحبَت بِکَرَم، هَتَه کن اَمَش فرمون دوعَیَه.

²⁴ هَر کَمی خدا حِکمونکا ایطاعَت بَکَی، خدا دِلَکا بَمَندی و خدا بَیکا بمندی. اَ روح واسیطنَه کن اَمش بخشِسته یهَ، اَ جِگا کا بَموستیمون کن اَ چَمه دِلَکارَ.