یوحنا اوّلین نامَه 2 - کتاب مقدس به زبان تالشي - گویش مرکزی

مسیح چَمَرا شفاعت بکی

¹ چمن گِچَه خردَنن، اِم چییون شِ‍مَرا بَنوشتیم تا گِناخ نِکَرَ. ولی اَگَم کَسی گِناخی کَردِشَه، دَدَ وریکا ایی نفر هِسته کن چَمَه شیفاعتی بکرِ، یعنی عیسی مَسیحِه صالح.

² عیسی چَمَه گِناخون کَفّارَ یَه، نِه تاکَه چَمَه گِناخونرا، بسکم دِنیا گردِ گناخونرا.

³ اِمیکا چَی آزنستِه بَموستیمون کن، اَگَم چی حِکمون اَنجوم بدرَم.

⁴ اَ کن باتی بَی آزنِه، ولی چَی حِکمون اَنجوم نییَدا، دِرو اَواجَه و چَی دِلَکا حَییقت نییَه.

⁵ ولی هر کَم کن چَی کَلامی اَنجوم دَرِ، واقییَن کن خدا موحبت چَی دِلَکا کامیل آبَه یَه. اِم جِگاکا بَموستیمون کن بَیکا بَمندیمون، کن:

⁶ اَ کن باتی چَی دِلَکا بَمَندیَه، پی هَتَه زندَگی بکَرِ کن عیسی زندگی اَکَریَه.

⁷ اَی خاجَتییِن، اَز، ایله تازَ حِکمی شِمَرا نِمَه نوشت، بَسکَم هه قَدیمَه حِکمی کن اَوَلیکا داشتَرون. اِم قَدیمَه حِکم، هَه کلامیَه کن دَرَستَرون.

⁸ گردِ اِمونَّه، ایله تازَ حِکمیَه کن شِمَرا بَنِوِشتیم کن چَی حَقیقَت هِم اَیکا و هِنتَه شِمَکا نی دیارَ، اِمی خونِه کن ظِلَمات بَگِذَشتی و حَییقیَه نور ایسَه نی کا شپق ژِ.

⁹ اَ کن باتی نوریکارَ ولی اِشتَن برا کا نیفرَت بَداشتی، هَنوزَنی ظِلَماتیکارَ.

¹⁰ اَ کن اِشتَن برا رَی بَداتشتی، نوریکا بَمندی و هیچ چیی ایی چَی دِلَکا نیَه کن لِسکیستِه باعیث ببو.

¹¹ اَمّا اَ کن اِشتَن برا کا نیفرَت دارِ، ظِلَماتیکارَ و ظِلَماتیکا گَل بَژَی. اَ نییَزنی کِرَم جِگارا بَشیَه، اِمی خونِه کن ظِلَمات چَی چَمنِش کور آکَردَیه.

¹² اَی گِچه خِردَنِن، شِمَرا بَنوِشتیم، اِمی خونِه کن شِمَه گِناخِن چَی نومی خونِه بخشِستَه آبین.

¹³ اَی دَدَ اِن، شِمَرا بَنوِشتیم، چون اَ کن شِروو کا بَه، آزنِستَرون. اَی جَوانِن، شِمَرا بَنوِشتیم، اِمی خونِه کن اَ آوشَری سَردِرِ پیروز آبَه اینَه. اَی خِردَنِن، شِمَرا بَنوِشتیم، اِمی خونِه کن دَدَ آزنِستَرونَه.

¹⁴ اَی دَدَ اِن، شِمَرا بَنوِشتیم، چون اَ کن شِروو کا بَه آزنِستَرونَه. اَی جَوانِن، شِمَرا بَنوِشتیم، اِمی خونِه کن قودوریرون و خدا کَلام شِمَکا بَمندی، و شمهَ، اَ آوشَری سَر پیروز آبَه اینَه.

دِنیا رَی مدارَ

¹⁵ دِنیا و اَچیی ایی کن چَی دِلَکارَ، رَی مَدارَ. اَگَم کَسی دِنیا رَی بِدارِ، دَدَ موحبَت اَیکا نیَه.

¹⁶ اِمی خونه کن هَر چیی کن دِنیا کارَ، یعنی جندکی هوا و هوسِن، چَمی هوا هَوَسِن و زندگی غرور، دَدَ کا نیَه بَلکَم دِنیاکارَ.

¹⁷ دِنیا و چَی هوا و هَوَسِن بَگذَشتینَه، ولی اَکَن خدا اِیرادَ اَنجوم دَرِ، تا اَبَد بَمَندیَه.

هشدار ضد مسیح خونه

¹⁸ خِردَنِن، اِم آخِرین ساعَتَه و هَتَه کن دَرَستَرون مَسیح ضِد بومَیه، ایسَه نی خَیلی ضد مَسیحییِن آمه اینه، اِمیکا بَموستیمون کن آخِرین ساعَتَه.

¹⁹ اَیِن چَمَه دِلَکا بِرِن شینَه، اَمّا اَمَکا نِبینَه؛ چون اَگَم اَمَکا بین، اَمَنَه اَمونینَه. ولی چَوون شِه، آمونستش کن هیچ کِرَم اَوونکا اَمَکا نِبینَه.

²⁰ ولی شمَه اَ قُدوسی واسیطنه مسح آبیرون و شمه گِرد حییقتی بموستیرون.

²¹ اَز اِمون شِمَرا بَنوِشتیم، نه اِمی خاطِر کن حَقیقَتی نینَّزنی، بَسکم اِمی خاطِر کن اَی بَموستین، و هیچ دِروویی حَییقَتیکا نییَه.

²² دِرو اَواج کیَه، غَیراَز اَ کن حاشا بَکی عیسی، هه وعدَ آدوعَه مَسیحه. اِنتَرَ آدَم هَه مَسیح زِرَبَرایَه کن هِم دَدَ و هِم زوعَه حاشا بَژَیه.

²³ هَر کَم زوعَه حاشا بکَرِ، دَدَ نی نِدارِ و هَر کَسی زوعَه اِیقرار بکَرِ، دَدَ نی بداشتی.

²⁴ بَرزَ اَچیی ایی کن اَوَلیکا دَرَستَرونَه شِمَکا بومونِه؛ اَگَم اَ چیی ایی کن اَوَلیکا دَرَستَرونَه شِمَکا بومونِه، شمَه نی دَدَ کا و زوعَه کا بَمَندیرون.

²⁵ و اِمَه اَ چیی ایی کن اَ، اَمَش وَعدَ آدوعَیَه، یعنی زَیرونَه زندَگی.

²⁶ اَز اِمون شِمَرا اَیِنی خونِه نِوِشتِمَه کن بَشِمَه گومرا بَکَن.

²⁷ ولی شِمَه خونِه پی بِواجم اَ مَسح کن اَیکا ویگَترونَه، شِمَکا بَمَندیَه و نیازِرون نیَه کَسی بَه شِمَه آموج بدَرِ، بَسکَم چَی مَسح گِردِ اِم چییون خونِه بَشِمَه آموج دَرِ. اَ مَسح دِروو نیَه و حَییقیَه. پس هَتَه کن بَشِمَه آموج آدوعَشَه، اَیکا بِومونَه.

خدا خردَنن

²⁸ پس ایسَه، اَی خِردَنِن، اَیکا بومونَه تا اَموقه کن اَ، اَیر آبو و اِطمینان بِدارَم و چَی آمِه موقِه اَیکا شَرمَندَ آنِبَم.

²⁹ اَگَم سَر آگِنَه اینَه کن اَ صالحه، پس بَموستیرون اَ کن صالح بِه اَنجوم دَرِ، اَیکا دِنیا دَگنستَه یَه.