یوحنا اوّلین نامَه 1 - کتاب مقدس به زبان تالشي - گویش مرکزی

زندَگی کلام

¹ اَ چیی ایی کن شروو کا بَه، اَ چیی ایی کن دَرستَمونَه و اِشتَن چَمونَّه ویندَمون، اَ چیی ایی کن دَیَشتِمون و اِشتَن بالونَّه دَست آسا کَردِمون، یَعنی زندگی کلام کن اَی شِمَرا اییلام بَکَمون.

² زندَگی اَیر آبه؛ و اَمه اَی ویندَمونَه و چَیرا شاهیدی آمونَدا. اَمه زَیرونَه زندَگی شمَرا اییلام بَکَمون، هه زَیرونه زندَگیی ایی کن دَدَ نَه دَرِ بَه و چَمَرا اَیر آبَه.

³ اَمه اَ کلامی کن ویندَمونَه و دَرَستَمون شِمَرا نی اییلام بَکَمون، تا شِمَه نی اَمَنَه رَفاقَت بِدارَ؛ حییقتن نی چَمَه رَفاقَت دَدَ نَه و چَی زوعَه عیسیِ مَسیح نَه یه.

⁴ اَمه اِمی شِمَرا بَنوِشتیمون تا چَمه خَشی کامیل ببو.

نوری دلَکا زندَگی کردِ

⁵ اِمَه، پَیغومی کن اَیکا دَرَستَمونَه و شِمَرا اییلام بَکَمون: کن خدا نورَ و اصلا هیچ ظِلَماتی اَیکا دَرِ نی.

⁶ اَگَم اَمه بِواجَم بَینَه رَفاقَت بَداشتیمون، ایسَه اِمکن ظِلَماتیکا زندگی بَکمون، دِرو باتیمون و حییقتیکا عَمَل نِمونَه کرد.

⁷ ولی اَگَم نوریکا زندگی بَکمون، هَتَه کن خدا نوری دلکارَ، یَندِنَه رَفاقَت دارَم و چَی زوعَه عیسی خون، اَمه هر گِناخیکا پاجا بَکَی.

⁸ اَگَم بِواجَم گِناخِمون کردَ نی، بَشتَن گول ژَمونَه و چَمَه دِلَکا حییقت نیَه.

⁹ اَگَم اِشتَن گِناخون اییتراف بِکَرم، اَ کن اَمین و عادیلَه، چَمَه گِناخون بَبَخشِستی و هَر نادِرِستیکا اَمه پاجا بَکَی.

¹⁰ اَگَم بِواجَم گِناخ نِکَردَمونَه، بَی، دِرو اَواج نِمود بَدامون و چَی کلام چَمَه دِلَکا جِگاش نیَه.