اوّلین نامَه قورَنتیانیرا 9 - کتاب مقدس به زبان تالشي - گویش مرکزیپولوس، اِشتَن حقیکا بَگِذَشتی 1 مَگَم اَز آزاد نیمَه؟ مَگَم رسول نیمَه؟ مگَم چَمه خداوند عیسام ویندَ نی؟ مَگَم شمَه، چمن کار کَردِ بَرَ خداوندیکا نیرون؟ 2 اَگَم دییَرکَسونرا رسول مبوم، دستِه کَم شِمَرا کن هِستیمَه؛ اِمی خونه کن شِمَه موهر تائیدیرون کن ثابیت بَکَی اَز خداوندی دلَکا رَسولیم. 3 اَیِنی رودَکَر کن چمن خونه کان قیضاوت کردِ، اِمَه چمن دیفا. 4 مَگَم حَقِّمون نیَه بَرَم و بِنجَم؟ 5 حَقِّمون نیَ هِنتَه دییَرَ رسولن و خداوندی بِرااِن و کیفا شیوار، ایلَه ایماندارَ ژِن بَمِنه دَرِ ببو؟ 6 تاکَه اَز و برنابا هِستیمون کن پی اِشتَن زندَگی خونه کار بکَرَم؟ 7 کِرَم گِلَه سربازَ کن اِشتَن خیدمتی خرجی بدَرِ؟ کییَه کن اَنگِرَ باغی بیگِرِ و چَی میوَکا نَرِ؟ کییَه کن رَمه را شونه ببو ولی چَی شِتی کا نَرِ؟ 8 مَگَم اِم چییون اینسانیَه فکرونَّه باتیم؟ مَگَم شریعت نی اِنتَرَ نییَوات؟ 9 چون موسی شَریعتیکا نوشتَه یَه کن: «گایی کن گِرَگاکا چنگه اون بَکوستی، چَی گَوّی دَنِبَستَه.» مَگَم خدا گا اونرا تَفشیشَه؟ 10 اِم گَفی چَمَه خونه نییَژ؟ ها، اِم کلامی چَمَراشون نوشتَه، چون هَنگومی کن کَسی زَمینی گیت بَژَی، یا ژَ بَکوستی، پی اَکینی رَسَتی، اومیدی بدارِ. 11 اَگَم اَمه روحانیه چییون شمَه دِلَکا کَشتِمون، خَیلیَه کن شمکا پولَه کاریَری ویگِم؟ 12 اَگَم دییَرَ کَسِن حقشون هِست کن اِنتَرَ چیون بَشِمَکا بِپیان، اَمَرا ویشتَر حَق نی؟ ولی اَمه اِم حَقیکا بَرَ نِبَردِمون، بَسکَم هَرچیی ایی تاو بوعَردیمون تا نِکَرِ کن اِنجیل مسیح ناری گَتِه باعیث ببَم. 13 مَگَم نینَّموست اَیِن کن معبدیکا کار بَکَن، اِشتَن هردَچی معبَدیکا وینَّگَت، و مذبح پاسَرییِن نی اَ چیی ایکا کن مذبح سَریکا تقدیم بَبی رست ببَن؟ 14 هِنتَرَکه، خداوند حکمِش کردیَه، اَینی کن اِنجیلی اییلام بَکن، پی چَوون روزی انجیلیکا بَدَست با. 15 ولی اَز هیچ کِرَم اِم حَقّونکا بَرَ نِبردِمه و اِمی نِمَه نوشت تا اِم کارون چمن حقیکا بکَرَ. اِمی خونه کن چمن مردِ، چمن ایفتخاری هیچ آکَرِدِ کا بِیترَ. 16 اِمی خاطِر کن اَز اِنجیلی ایلام بَکَم، ایفتخار کردِ حَقّی بمَن آنییَدا، اِمی خونه کن اِم خیدمتی اَنجوم دوعه چمن وَظیفَه یَه؛ بِرامِه چمن حالیرا اَگَم اِنجیلی موعیظَه نِکَرِم! 17 اِمی خونه کن اَگَم اِشتَن مِیلینَه اِم کاری اَنجوم اَدَریمه، پاداش ویرَگِریمَه؛ ولی اَگَم چمن میلینَه مبو، تاکَه اِشتَن وَظیفه اَنجوم دوعَمه. 18 پس چمن پاداش چِه بَبیَه؟ تاکَه اِم کن مفته انجیلی خَشه خَبری موعیظَه بِکَم و اِشتَن حَقی کن چَی دِلَکا دارم هیچ وینِگِم. 19 چون هر چَنَه کن گِردِ چیکا رخَه ایمَه، بَشتن گِردی وَزییَر آکَردِمه تا خَیلییون مَسیح را بَدَست بوعَم. 20 یَهودیون وَریکا هَنته ایلَه یهودی شیوار بیم، تا یهودیون مسیح را بَدَست بوعَم. اَیِنی نَه کن شَریعَتی حِکمی بِنیکان هنته کَسی شیوار بیمه کن شریعتی حِکمی بنیکارَ تا اَیِنی کن شریعتی حِکمی بنیکاینَه مسیح را بَدَست بوعَم، «هر چَنَه کن اَز اِشتَن شَریعتی حکمون بنیکا نیمَه». 21 اَیِنی وَریکا کن شَریعَتی حِکمی بَنیکا نینَّه، هنتَه کَسِنی شیوار بیم کن شریعَتی حِکمی بنیکا نیَه تا اَیِنی کن شَریعَتی حِکمی بنیکا نینَّه مسیح را بَدَست بوعَم، «هر چنه کن اِشتَن بی خدا شَریعَت نیمَه، بسکم مَسیح شَریعتیکا فرمون بَبَم.» 22 عَجَزَ آدَمونَّه عِجِز آبیم تا عِجِزَ آدَمون مسیح را بَدَست بوعَم. هَمَه کَسیرا هَمَه چیی آبیمَه تا هر جوری کن ایمکان بداشتی بعضیون نیجات بدَرِم. 23 گِردِ اِم کارون انجیلی خونه بَکَمه، تا چَی بَرَکتونکا رَسَتی بدارم. 24 شمَه نینَّموست کن ویریتِه موساقبَکا، گِرد بَوریتین، ولی تاکَه ایی نفر جایزَ بَبَیَه؟ پس شمه بَردِ را بیوریجَه. 25 هَر کَم موساقبَرا بشیَه، هرچیکا، اِشتَن ناری بَگَتی. اَیِن فانیَه تاجی ویگَتِه خونه اِنتَرَ بَکن؛ ولی اَمه انتَرَ بَکمون تا زیرونَه تاجی ویگِرَم. 26 پس اَز بی هَدَف نِمَوریت، و هنته اَ کن هوا مِشت درَکَرد مِشت نِمَژ؛ 27 بَلکَم اِشتَن تَنی سختی دَرِم و هنته ایلَه وزییَری شیوار بَی اَسیر دمَوَرد، تا نِکَرِ دییَرَ آدَمونرا موعیظَه کَردِ بَه دوملَه، اِشتَن مردود آبوم. |
@ 2024 Korpu Company