اوّلین نامَه قورَنتیانیرا 8 - کتاب مقدس به زبان تالشي - گویش مرکزی

قِربونی بُتونرا

¹ و ایسَه هَردَ چیی ایی خونه کن بوتون تَقدیم بَیَه: بَموستیمه کن «گِردِ اَمه اَلمندَ آدَمِنی هِستیمون.» اِم اَلمند گیری یالَه نار بِه باعیث بَبی، ولی موحبت، اینسانی بنا بَکَی.

² اَ کن گمون بَکَی چیی ایی بَموستی، هَنوزَنی اَدَ کن پی بِزنِه، نییَموست.

³ ولی اَکَن خدا رَی بَداشتیَه، خدا بَی آرَموست.

⁴ پس هَردَ چی ایی خونه کن بوتون تَقدیم بَیَه، بموستیمون کن اِم دِنیاکا «بوت هیچَه،» و «غَیرَاَز ایلَه خدا، دییَرَ خِدایی نییَه.»

⁵ هر چنه کَسِنی هِستینه، کن زَمینی سَردِرِ و آستامونیکا اوون «خِدااِن» باتینه و واقییَن کن برکَه خدااِن و بَرکه «خِداوندِن» هِستَه،

⁶ اِم حالینَه، چَمَرا تاکَه ایلَه خدا هِستَه، یعنی آستامونیَه دَدَ، کن گِردِ چییِن اَیکارَ و اَمه چَی شِنیمون؛ و تاکَه ایلَه خداوند هِستَه، یعنی عیسی مسیح، کن گردِ چییِن چَی واسیطَنَه یَه و اَمه چَی واسیطَنه هِستیمون.

⁷ ولی گِردیرا اِم اَلمندی نیَه. ولی اِمی خونه کن بعضییِن چیمی بَه نَه بوتونَّه سرو کار دارین، اَگَم ایسَه نی هَردَ چییِنی بَرِن کن واقییَن بوتوت تقدیم بَیَه، اِمی خاطر کن چَوون ووژدان عِجِزَ، جیفینین آنَّب.

⁸ «هَردَ چیی، اَمه بَه خداوند نِزِک آنییَکَرد»؛ نِه نَردِنَه بدتَر بَبیمون، نِه هَردِنَه بِیتَر.

⁹ ولی هوش ببَه شمَه اِم حَق، عِجِزَ آدَمون لِسکیستِه باعیث آمَبو.

¹⁰ اِمی خونه کن اَگَم کَسی کن عِجِزَ ووژدان بَداشتی، بَتِه کن اِم چییون خونه اَلمندیشَه، غذا هَردِ موقه بوتخانه ایکا بوینه، مَگَم اَ نی وسوسَه آنییَبن اَ هَردَچیکا کن بوتون تقدیم بَیَه، بَرِ؟

¹¹ اِنتَرکِه، اِشتِه اَلمندی اَ عِجِزَ آدَمی نیفلَه آبِه باعیث بَبی، کن مسیح چَی خونه مَردَ.

¹² پس وقتی اِنتَرکِه اِشتَن برااون زِرَبَرا گناخ بَکَرون و چَوون عِجِزَ ووژدانی ضرر بَژَرون، مَسیح زِرَبَرا گناخ بَکَرون.

¹³ اِمی خونه، اَگَم هردَ چیی، چمن برا لِسکیستِه باعیث بَبی، هرگز گوژد نِمَرد تا چَی لِسکیستِه باعیث آنِبوم.