اوّلین نامَه قورَنتیانیرا 5 - کتاب مقدس به زبان تالشي - گویش مرکزی

بی‌عیفتی کلیسا جیفینین بَکَی

¹ راستی، مِرا خَبَر آرَستَیَه کن شمَه دَلَکا بی عیفتی دگنَه یَه، اَ نی جوری کن حتی بوت پَرَستون دِلکا نی نییَه. چون دَرستِمه کن مِردی اِشتَن اَگیه نَنَه نَه دَرِ.

² وشمه هَنوزَنی کاینَه پوز دوعِه! مَگَم نِباید عازیَه بیگِرَ؟ و اَ کن اِنتَرَ کاریش کَردیَه شمَه دلَکا رَت آکَرَ.

³ اِمی خونه کن هَر چَنه اَز اِشتَن جَندَکینَه شمه دلَکا نیمه، ولی چمن روح شمَنه دَرِ و هِم ایسَه، هنته کَسی شیوار کن شمَه دِلَکارَ، نارتَر اَ کَسی خونه کن اِنتَرَ کاریش کَردیَه، اِشتَن قیضاوتی اییلام کِردِم.

⁴ وقتی کن شمَه، خداوند عیسی نومینَه یَندِ وَر جَم آبَه اَز روح دلَکا شِمَه وَریکام، و چَمَه خداوند عیسی خِنَرینَه،

⁵ شمَه پی اِم مِردی شَیطونی دَست آدَرَ، تا گناخکارَ جندَکی نیفلَه آبِه نَه، چَی روح، خداوند عیسی روجیکا نیجات بیگِرِ.

⁶ شمَه ایفتیخار هیچ درست نیَه. مَگَم نینَّموست تیکَلیی خَمیراز بَشایَه گِردِ خَمیری بَیزامونه؟

⁷ بَشتَن کَنه خَمیرازیکا پاجا آکَرَ تا تازَ خَمیر بِبَه، اِمی خونه کن واقیین کن بی خَمیرازیرون. اِمی خونه کن چَمَه پِسَخه عیدی وَرَ، مسیح، قِربونی بَیَه.

⁸ پس بَرَ عیدی، کَنَه خَمیرازینَه کن، بَدخواهی و آوَشَر گیری خَمیرازَ جشن مَگِرَم، بَلکَم بیخَمیرازَ نونینَه کن راستی و حییقتَه.

⁹ اِشتَن قَبَلنَه نامَکا، شَمرا نوشتم کن بی عیفَتونَّه شِه آمِه نِکَرَ.

¹⁰ چمن منظور اِم نِبَه کن اِم دِنیا بی عیفَتونَّه یا طمع کارونَّه یا شَیّادونَّه و یا بت پَرَستونَّه شِه آمِه نِکَرَ، اِمی خاطر کن اَتَرَکِه پی دِنیا دِلَکا بشَه.

¹¹ اَمّا ایسَه شِمَرا بَنوشتیم کَسینَه کن بَشتَن، برا باتی، ولی بی عیفَت، یا طمع کار یا بوت پَرَست یا زَبون اَدَر و یا عَرَخه هَرَ، یا آوشَرَ، شِه آمِه نِکَرَ و اِنتَرَ آدَمینَه حتی هَم سِفرَ آمَبَه.

¹² اِمی خونه کن بَمنِش رَبطی نییَه کن کلیسا بِرنی آدَمون سَر دیوون بِکَم. ولی مَگم کلیسا آدَمون سَردِرِ دیوون کردِ شمه وظیفه نییَه؟

¹³ خدا اِشتَن کلیسا بِرنی آدَمون سَردِرِ دیوون بَکَیَه. «اَ آوشَری شمَه دلَکا رَت آکَرَ.»