اوّلین نامَه قورَنتیانیرا 3 - کتاب مقدس به زبان تالشي - گویش مرکزیجِدایی کلیسا دلَکا 1 ولی بِرااِن، اَز نَشایمَه هنته اَیِنی شیوار کن خدا روح چَوون دلَکارَ شِمَنه گف بژَنِم بَسکَم هنته جیسمانیَه آدَمون شیوا گَف ژِمَه، یعنی هنته اَیِنی کن مَسیح دِلَکا، چِلَینَه خِردَنین. 2 اَز بَشمَه گوژدی عَوَض شِت آدامَه، اِمی خونه کن چَیرا آمادَ نِبیرون و هَنوزَنی آمادَ نیرون، 3 چیرا کن هَنوزَنی جیسمانیَه چییون دوملَه ایرون. وقتی شِمَه دِلَکا زِرَبَردِ و ژِژِ هِستَه، مگَم شمَه هِم کار آنییَموست کن جیسمانییَه چییون دوملَه ایرون و اینسانییَه راه دلَکا رفتار بَکَرون؟ 4 اِمی خونه کن وقتی کَسی باتی: «اَز پولوسیکا پِیرَوی بَکم،» و دییَری باتی: «اَز آپولوسیکا پِیرَوی بَکم،» مَگَم دییَرَ اینسانون شیوار نینَّه؟ 5 مَگَم آپولوس کیَه؟ پولوس کیَه؟ اَیِن تاکَه پاسَرییِنی هِستینه کن خدا هَر کِرَم اَوونکا وَظیفه ایی آداشَه تا شِمَه چَوون واسیطَه نَه ایمان بوعَرَ. 6 اَز دونَه کَشتِمه و آپولوس اَی آویاری کَردِش، ولی اَ دونه پِرمِه باعیث خدا بَه. 7 پس نِه اَکَش کارَایَه و نِه اَ کن آویاری بَکَی، بَسکم تاکَه خِدایَه کن دونَه پِرمه باعیث بَبی. 8 اَکَن بَکَشتی و اَکَن آویاری بَکَی، هَر دِ ایلَه اینَه و هَر کِرَم اِشتَن زَمَت کَشته اَندازَ، مِژد ویرَگَت. 9 اِمی خونه کن اَمه خدا همکاریمون. شِمَه خدارا، عیمارت و زَمینی، کَشتو کار هِستیرون. 10 اَ فیضی نَه کن خدا بَمنِش آدوعَیَه، هنته ماهیرَ میعماری شیوار هیمی پِکَندِمَه و دییَرَ کَسی اَ هیمی سَردِرِ ساختیمان سِی آرَکَرد. ولی هر کم پی هوش ببو کن چِنتَرَ سِی آرَکَرد. 11 اِمی خاطر کن هیچکَس نیَشا اَ پِکَندَ هیمی سَردِرِ، یعنی عیسی مسیح، دییَرَ هیمی بنرِ. 12 ایسَه اَگَم کَسی اِم هیمی سَردِرِ ساختیمانی طِلِه و نِقرَ یا گِرونه سِه اونَّه یا چو یا واش یا سِمبَرینه سِی آکَرِ، 13 هر کَسی کار دیار آرَبن، چیرا کن اَ «روج» گِردِ چییون اَیر آرَکَرد. اِمی خونه کن آرا، کاری نتیجه دیار بَکَی، و اینسان هر کاری بکَرِ، آرا بَی وَرداورد بَکَیَه. 14 اَگَم اَ کاری کن اَ هیمی سَردِرِ سی آکَردشَه، بومونِه، اَ اینسان اِشتَن مِژدی ویرَگَت. 15 اَمّا اَگَم ایی نفری کار بسیجی، ضرر بَکَی؛ هر چنه اِشتَن نیجات بگَتی، ولی هنته کَسی شیوار بَبیَه کن آرا رَندیکا رَخِستیَه. 16 مَگَم نینَّموست کن خدا مَعبدیرون و خدا روح شِمَه دِلکارَ؟ 17 اَگَم کَسی خدا مَعبدی ویراونِه، خدا نی بَی نیفله آرَکَرد؛ اِمی خاطر کن خدا مَعبد، موقدسَه و شمه اَ مَعبَدیرون. 18 هیچ کَم بَشتَن گول مَژنه. اَگَم کَسی شمَکا گَمون بَکیَه کن اِم دوورَکا حَکیمه، برزَ نادون بومونِه تا شاید کن حکیم آبو. 19 اِمی خونه کن خدا چَمیکا اِم دِنیا حیکمَت نادونییَه. هَته کن اَیوب پَیغَمبری کیتاویکا نوشتَه آبَه یَه: «حَکیمون، چَوون اِشتَن حیلَه نه ویلاخِنِه.» 20 و هنی کیتاو زَبوریکا نوشتَه آبَه یَه: «خداوند حَکیمه فِکری بَموستیَه و بَموستیَه کن اَ فکرِن دَدارینَه.» 21 پس دِ هیچ کَم اینسانی سَردِرِ ایفتخار نِکَرِ. اِمی خونه کن گردِ چیین شمَه شنَه، 22 چِه پولوس، چِه آپولوس، چِه کیفا، چِه دِنیا، چِه زندَگی، چِه مَردِ، چِه ایسَه زمان، چِه آیَندَ، اِمِن گِرد شِمَه شِنین 23 و شمَه مَسیح شِنیرون و مسیح خِداشِنه. |
@ 2024 Korpu Company