اوّلین نامَه قورَنتیانیرا 2 - کتاب مقدس به زبان تالشي - گویش مرکزی

پولوس مسیح مصلوب بِه اییلام بَکَی

¹ برا اِن اَز نی، هَنگومی کن شِمَه وَر آمیم، نامیمَه تا خدا رازون، یالَه گَفونَّه و حیکَمتینَه شِمَرا اییلام بکَرم.

² اِمی خونه کن اِشتَن تصمیم داریمَه شمَه دلَکا، چیزی غَیراَز عیسی مسیح مَزنِم، کن اَ نی مَصلوب بَه عیسی اَ.

³ و اَز بَرکَه عِجِز گیری، و ترسو لَرزینَه شِمَه وَر آمیم.

⁴ و چمن پَیغوم و گَفِن حَکیمانَه کلَمَه اونَّه کن قانع بَکَیه نِبَه، بَلکَم خِداروح خِنَرینَه واتِم،

⁵ تا شِمَه ایمان اینسانیَه حیکمَتی سَر مَبو، بَسکَم خدا خِنَرینه ببو.

حیکمت، خدا روح کا

⁶ اِم حالیکا، اَمه یالَه آدَمون دِلَکا حیکمَتی خونه گَف بَژَمون، هر چَنَه نِه اَ حیکمَتی کن اِم زَمونه شِنَه یا اِم زمونه حاکیمِن شِن، کن نیفیت آبِرا مَحکوم آبَه اینَه،

⁷ بَلکَم خدا نون آبَه حیکمَتیکا گَف بَژَمون کن ایلَه رازَه و جیگاش هردیَه، اَ حیکمت کن خدا دِنیا خلق بِه بَه نَ، چَمه شکوه و جَلالیرا تَیین کَردَشه.

⁸ هیچ کِرَم اِم زَمونه حاکیمونکا اِم حیکمَتیکا سَر آنِگِنین، اِمی خونه کن اَگَم اَیکا سَر آگِنَه بینَه، خِداوندِ شکوه و جَلالی صَلیبی سَردِرِ نَکِشینَه.

⁹ هَتَه کن اِشعَیای پَیغمبری کیتاویکا نوشته بَیَه: «اَ چیی ایی کن هیچ چَمی نِویندِشَه، هیچ گوشی دَرَستَش نی، و هیچ فِکریرا آرَستَه نی، خدا اَیِنیرا کن اَوون رَی بَداشتی آمادَ آکَردَشَه.»

¹⁰ خدا اَی اِشتَن روح واسیطَنَه اِم چییون چَمرا دیار آکَردِش، چیرا کن خدا روح گِردِ چییون، حتی خدا اعماقی نی بَگَردستی.

¹¹ چون غَیراَزاینسانی روح، کن چَی دلَکارَ، کییَه کن اینسانی فکرونکا باخبر ببو؟ هِنتَرَکه، تاکَه، خدا روحَه کن خدا فکرونکا باخبَرَ.

¹² ایسَه اَمه اِم دِنیا روح ویگَتَمون نی، بَسکَم خدا روحِمون ویگَتَیَه، تا اَ چیی ایی کن خدا اَمَش خلا دوعیَه، بِزنَم.

¹³ واَمه اِمیکا گَف بَژَمون، اَ نی نِه گَفِنینَه کن اینسانیَه حیکمَتینه آموج گَتَمون ببو، بَسکم اَ گِفنینَه کن خدا روح آموج دَرِ؛ و اِمی خاطر روحانییَه حَییقتون اَیِنیرا کن اِشتَن دلَکا خدا روح بَداشتینَه، باتیمون.

¹⁴ اینسانی کن اِشتَن نفسی دوملَه ببو چییِنی کن خدا روح مَربوطَه قِبول نییَکَرد، اِمی خونه کن چَی نظَریکا نادونییَه، و اَوونکا سَر بَر نییَکَرد، چیرا کن تاکَه، خدا روح نَه بَبی چَوون دِرِست بِه کا، سَر آگِنِسته.

¹⁵ اَ کن خدا روح بَداشتی گِردِ چییون سَر دیوون بَکَی، ولی هیچ کَم نییَشا چَی خونه دیوون بکَرِ.

¹⁶ «چون کیَه کن خداوندی فکری بِزنِه تا بَی آموج بِدَر؟» ولی اَمه مسیح فکری دارَم.