اوّلین نامَه قورَنتیانیرا 14 - کتاب مقدس به زبان تالشي - گویش مرکزیپیشگویی کَردِ و دییَر زَبانونَّه گَف ژِ 1 موحَبَتی دوملَه ببَه و روحانیَه خَلا اون، غَیرَتینَه بِپییَه، بَخِصوص اِمکن پیشگویی بَکَرَ. 2 چون اَ کن دییَرَ زبانونَّه گَف بَژَی، آدَمونَّه گَف نییَژ بَلکَم خدانَه گَف بَژَی. اِمی خونه کن هِچ کِرَم چَی گَفیکا سَر آنییَگِنِست؛ ولی اَ آدَم خدا روح واسیطنَه کا رازون واتِه. 3 ولی اَکَن پیشگویی بَکَی، دیَرَ اینسانونَّه، چَوون بنا کَردِ وتشویق کَردِرا گف بَژَی و اَوون آلاونِه. 4 اَ کن دییَرَ زبانونَّه گَف بَژَی بَشتن بنا بَکَی، ولی اَکَن پیشگویی بکی کلسیا بَنا بِه باعیث بَبی. 5 ایسَه اَز بَپیمَه کن شمَه گِرد، دییَرَ زبانونَّه گَف بژَنه، ولی ویشتَر بَپیمَه کن پیشگویی بکَرَ. اَ کن پیشگویی بَکَی، اَ کَسیکا کن دییَرَ زبانونَّه گَف بَژَی یال تَرَ، مَگم اِمکن ترجومَه بکَرِ تا کلیسا بَنا بِه باعیث ببو. 6 براِن، ایسَه اَگَم اَز شمَه وَر بام و دییَرَ زبانونَّه گَف بژَنم، شمَه چِه برَ ایی ببَردیرون، مَگَم اِمکن موکاشیفَه یا دانایی یا پیشگویی یا آموجی شِمَرا بِدارم؟ 7 حتی بی جانَه سازون نی هِنتَه لَلَه و چنگ ، اَگَم اِوون دِرِست نِژَنن، چِنتَرَ ببیَه سَر آگِنستِه کن چِه آهنگی کان ژِ؟ 8 اَگَم زِرنا چاکَه سَسی نِدَرِ، کی جَنگِستِرا آمادَ آرَبن؟ 9 شِمَه خونه را نی اِنتَرَیه. اَگَم شمَه زبانینَه گَف بژَنه کن نییَب بَی فهمستِه، چَنتَرَ بَبیَه ایی نفر شمَه گَفیکا سَر آگِنِستِه؟ اِمی خونه کن اِمی بَمندیَه کن هَوانَه گف بِژَنه. 10 شکّی نییَه کن دِنیا دِلَکا موختَلیفه زبانِنی هِستینه، هیچ کِرَم اَوونکا بی مَعنی نینَّه. 11 ولی اَگَم نِشام دییَری گَفی مَعنیکا سَر آگِنِم، بَمِنَه گَف اَژَنینَه خَلکیمَه و اَنی مِرا خَلکیَه. 12 شمَه خونه را نی اِنتَرَیه. اِمی خاطر کن خَشینَه خدا روح اَیر آبِه دملَه ایرون، تقلا بکَرَ تا کلیسا بَنا کَردِکا تَرقی بکَرَ. 13 پس اَ کن دییَرَ زبانینَه گَف بَژَی پی دِوا بکَرِ، تا اِشتَن گَفون ترجومه کَردِ بشا. 14 اِمی خونه کن اَگَم اَز دییَرَ زبانینَه دوا بِکَم، چمن روح دوا بَکی، ولی چمن عقل بَرَ ایی نییَبرد. 15 پس پی چِبکَرِم؟ چمن روح نَه دِوا بَکَم و عقلینَه نی دوا بَکَمه؛ چمن روحنَه ستایش کردِ سِرودی بَخَندیم ولی عَقلینَه نی ستایش کردِ سِرودی بَخَندیمَه. 16 غَیراَز اِم، اَگَم تِه روح دِلکا کایشَه شِکر واتِه، چِنتَرَ کَسی کن اِشتِه گَفیکا سَر آنییَگِنِست، اِشتِه شکر واتِرا آمین بواجه؟ اِمی خونه کن نییَزنی تِه، چِه کاش واتِه! 17 چون تِه دِرِست شکر بَکشَه، ولی اِشتِه شکر کَردِ دَیرَ کَسی بنا کَردِ باعیث نییَبن. 18 خدا شکر بَکمَه کن شمَه گِردیکا ویشتَر دییَرَ زبانونَّه گف بَژَم؛ 19 ولی اِمی بموستیم کن کلیساکا پِنج کلمه اِشتَن عَقلینه گف بژَنم تا دییَرَ کَسون آموج دوعَم ببو، بِیترَ تا اِمکن هَزاران کَلَمه دییرَ زبانونَه بواجم. 20 برااِن، فکریکا خِردَن مَبه، بسکم بدی کَردِکا خردَن ببَه. ولی فکریکا پی یال ببَه. 21 توراتیکا نوشته آبیَه: «خداوند باتی، دییَرَ زبانونَّه و خَلکی لِوونَّه اِم قامینَه گَف بَژَمه. حتی اَیِن نی بَمن گوش آنینَّدا.» 22 پس دییَرَ زبانِن، ایماندارون خونِه را نشونَه نیَه بسکم بی ایمانون خونِه یَه؛ ولی پیشگویی ایماندارون خونِه را نشونَه یَه و بی ایمانون شِن نیَه. 23 پس اَگَم کلیسا گِردِ آدَمِن یَندِ وَر جَم آبون و گِرد دیَرَ زبانونَّه گَف بِژَنن، و اِم مینَکا کَسِنی کن هیچ چیکا خبر ندارِن و بی ایمانه آدَمِنی مَجلِسی دِلَه دَران، نینَّوات کن شمَه توریرون؟ 24 اَمّا اَگَم بی ایمانَه آدَمِن یا اَیِنی کن هیچ چیکا خبرِشون نییَه وقتی کن گِرد پیشگویی بَکَنه مَجلسی دِلَه دَران، شمَه گِرد اَ آدَمی قانع بِه باعیث بَبیرون، کن گناخکارَ و گِردی ناریکا دیوون آرَبن، 25 و اَ آدَمی دِلی رازِن دیار آرَبن. اَموقه اِشتَن صَفَتینَه زَمینی سَردِرِ بَرَگِنِست و خدا پرستش بَکَیَه و اییلام بَکیَه کن: «حَییقتن خدا شمَه دِلَکارَ.» 26 برا اِن، پس چمن منظور چِه چییَه؟ هَنگومی کن یَندِ وَر گِرد آبیرون، هَر کَم ستایش کردِ سِرودی، آموجی، موکاشِفه ایی، زبانی و یا ترجومَه ایی دارِ، اِمِن گِرد پی کلیسا بَنا کِردِ خونه ایستفادَ ببو. 27 اَگَم کَسی دییَرَ زبانینَه گَف بِژَنه، دِ یا نهایَت سِه نفَر، اَ نی نُوبتی نه گَف بِژَنه و ایی نفر نی ترجومه بکَرِ. 28 ولی اَگَم موترجم نِبه، هَر کِرَم اَوونکا پی کلیساکا گف نِژَنه و اِشتَن دِلیکا خِدانَه گف بژنِه. 29 برزَ، دِ یا سِه نفر اَیِنیکا کن پیشگویی بکَن گف بِژنن و دییَرِن چَوون واتَه گَفی بسَنجن. 30 و اَگَم دییَرَ آدَمی کن اَ جِگاکا نِشتَه یَه موکاشِفه ایی ویگِرِ، اَوَلنَه گَف اَژَن پی سکوت بکَرِ. 31 اِمی خونه کن گِرد بَشارون نوبَتینه پیشگویی بکَرَ تا گِرد آموج بیگِن و گِرد تشویق ببون. 32 نبی اون روح، نبی اونکا فِرمون بَبَیَه. 33 اِمی خونه کن خدا، هرج و مرجی خدا نییَه، بَلکَم صلح و سَلامتی خِدایَه، هَتَه کن گِردِ موقدَسون کلیسا اونکا اِنتَرَیه. 34 ژِنن پی کلیساکا ساکیت بومونن. اِمی خونه کن اَیِنشون گَف ژِ ایجازَ آدوعَشون نییَه، بَسکم پی هَته کن شریعت باتی، ایطاعَت بِکَن. 35 اَگَم بَپیشون چیی ایی آموج بیگِن، اِشتَن شوکا کَه دِلَکا دَپَرسِن؛ اِمی خونه کن ژِنیرا عَیبَه کن کلیساکا گف بِژَنه. 36 مَگم خدا کَلام شمَکا آمَیَه، یا تاکَه بَشِمَه آرَستَیه؟ 37 اَگَم کَسی بَشتن پَیغمبَر یا آدَمی بموستی کن خدا روح بَداشتیَه، اَ پیی تایید بکَرِ کن اَ چیی ایی کن شمَرا بَنوِشتیم حِکمیَه کن خدا طَرفیکارَ. 38 اَگَم کَسی اِمی قبول نِکَرِ، اَ اِشتَن نی تایید نییَب. 39 چمن برااِن، پس گِردِ اِشتَن غَیرَتینَه پیشگویی کَردِ دوملَه ببه و دییَرَ زبانینَه گَف ژِ ناری مَگِرَ. 40 ولی گِردِ چییِن پی دِرِست و نظمو ترتیبینه اَنجوم ببو. |
@ 2024 Korpu Company