اوّلین نامَه قورَنتیانیرا 12 - کتاب مقدس به زبان تالشي - گویش مرکزیروحانی یَه عطا اِن 1 ایسَه برا اِن نَپیمَه روحانیَه عَطا اون خونه بی خبر ببَه. 2 بَموستیرون وقتی کن بوت پَرست بیرون، گومراه آبَه بیرون، و گِنگَه بوتون طَرَف اَشیرون، هر جورَ کن اَبییَه بَشِمَه دَرَراکنین. 3 پس بَشِمَه باتیمَه کن هَرکَم خدا روح واسیطنَه گَف بژَنه، هرگز عیسی لَنَت نییَدا، و هیچ کَم غَیراَز خدا موقدسَه روح واسیطَنه نییَشا بواجه: «عیسی خداوندَ.» 4 عطا اِن موختَلیفینه، ولی روح هَیَه؛ 5 خیدمتِن موختَلفین، ولی خداوند هَیَه؛ 6 کارِن موختَلیفینه، اَمّا هَه خدا اَ کن گِردِ آدَمون، هَمَه چییکا زبق دَرِ. 7 خدا روح اَیر آبِه هر کَسیرا، گِردِ آدَمون منفعَتی خونه، بَی آنَّدا. 8 اِمی خونه کن ایی نَفریرا خدا روح واسیطَنه، کلامی حیکمَت آنَّدا، دییَرَ کَسیرا، هَه روح واسیطَنه کلام مَریفت عطا بَبی، 9 و دییَرَ کَسیرا نی هَه روح واسیطنَه ایمان، و دییَر شخصی نی، هَنی هَه روح واسیطنه، شفا دوعِه عطااِن. 10 ایی نفری موعجیزَ اون اَنجوم دوعِه خِنَر آدوعَه ببیه، و دییَرَ کَسی نی پیشگویی کَردِ، و بَه دییَرَ شخصی روحون تَشخیص دوعه خِنَر. دییَر شخصی موختلیفه زبانونَّ گف ژِ و بَه دییَری موختلیفه زبانون ترجومه کردِ آنَّدا. 11 اِمون گِرد هَه ایلَه روح واسیطنَه کن خدا روحَه زبق بَگَتین، و هَتَه کن اِشتَن اَپیشَه اوون رَسَت بَکَی، و هَر کَمی ببَخشِستی. ایلَه تَن، وِرَ اَعضا نَه 12 اِمی خونه کن هر چَنَه تَن ایلَه یَه، و وِرَ عضوونکا سی آبَیَه؛ و تَنی گِردِ عوضوِن، هر چَنه وِرین، ایلَه تَنین. مَسیح نی اِنتَرَیه. 13 اِمی خونه کن اَمه گِرد، چِه یهود و چِه یونانی، چِه وَزییَر و چِه آزاد، ایلَه روح نَه غسل تَعمید گَتَمونَه تا ایلَه تَن ببَم؛ و اَمه گِردی ایلَه روح کا هِنجامونیَشونه. 14 اِمی خونه کن تَن ایلَه عضوی نَه سی آبه نییَه، بَسکم وِرَ عوضوونکا سی آبَیَه. 15 اَگَم لِنگ بواجِه، «چون اَز بال نیمَه، تَنی شِن نیمَه،» اِم دَلیل نیبن کن تَنی عوضو مبو. 16 و اَگَم گوش بواجه،«چون اَز چَم نیمه، تَنی شِن نیمَه،» اِم دلیل نیبن کن تَنی عوضو مبو. 17 اَگَم گردِ تَن چَم بِبی، چِنتَرَ اَشامونَه دَرَسته؟ و اَگَم تَن گَرد گوش ببو، چنتَر ابیَه بو آکَردِ؟ 18 ولی اِنترکِه خدا تَنی اَعضا اَتَرَ کن اِشتَن اَپیش بَه، ایلَه ایلَه، تَنیکا آناشَه. 19 اَگَم گِرد ایی عوضو بینَه، تَن چِنترَ بوجود آی؟ 20 اَمّا عوضوِن خَیلی اینَه، در حالی کن تَن ایلَه یَه. 21 چَم نییَشا بالی بواجه، «بَته نیازِم نییَه!» و کَلّه نی نیَشا لِنگی بواجه، « بَتمه نیاز نِدارِم!» 22 بر عسک، تَنی اَ عوضوِن کن عِجِز نمود دَرِن، بَرک واجیتَر اینَه. 23 و تَنی اَ عوضوِن کن گَمون بَکمون کَم حورمَتینَه، اَوون خَیلی حورمت بَکمون، و اَ عوضوِنی کن خاص نینَّه، ویشتَر رسیدَگی بَکَمون؛ 24 ایسَه اِمکن چَمَه خاصَه عوضوِن اِنتَرَ رسیدَگی نَپیشون. ولی خدا تَنی اَنَ منظم سی آکَردشَه کن ویشتَرین حورمت عوضوِنی شِن ببو کن کم حورمتین، 25 تا تَنیکا جدایی مبو، بَسکَم تَنی عوضوِن ایی اَندازَ یَندِ فکریکا ببون. 26 و اَگَم ایلَه عوضو عذاب بکَشه، عوضوِن گِرد بَینَه عذاب بکَشِن؛ و اَگَم ایلَه عوضو حورمت بدارِ، گِرد خَش آنَّب. 27 اِنتَرکِه، شمه مَسیح تَنیرون و هَر کِرَم ایلَه بَه ایلَه، چَی عوضویکا هِستیرون. 28 خدا کلیسا کا، اَولیکا رسولِن، دووم پَیغمبَرِن، سووم موعلیمِن؛ دوملَه موعجیزَاون اَنجوم دوعِه خِنَر، چَی به دوملَه شفا دوعِه عَطااِن و کاریَری دوعه و مودیریَت و موختلیفه زبانونَّه گَف ژِ تَیین کردِشَه. 29 مگَم گِرد رسولین؟ گِرد پَیغَمبَرین؟ مَگَم گِرد موعلمینَه؟ مَگَم گرد موعجیزَ کَردِ خنَری دارِن؟ 30 مَگَم گِرد شفا دوعه عَطا بَداشتینَه؟ مَگَم گِرد موختَلیفه زبانونَّه گَف بَژَن؟ گِرد ترجومه بَکَنَه؟ 31 ولی شمه گِرد اِشتَن ایشتیاقینه یالَه عَطا اون دوملَه ببه. و اَز چاکترین راه بَشمَه آمونم. |
@ 2024 Korpu Company