اوّلین نامَه قورَنتیانیرا 11 - کتاب مقدس به زبان تالشي - گویش مرکزی

¹ پس بَمنکا سرمشق بیگِرَ، هَتَه کن اَز مَسیحکا سرمشق بَگَتیم.

کلَّه پوشامنییِه

² بشمَکا تَرییف بَکمهَ، اِمی خونه کن گِردِ چییونکا بَمن یاد آرَفنَه و رَسمون هَتَه کن شمَه دَست آدامَه، غَم بَردیرون.

³ ولی بَپیمه بفَهمه کن مَسیح هَر مِردی سَرَ و مِرد هَر ژِنی سَرَ و خدا مَسیح سَرَ.

⁴ هر مِردی کن اِشتَن سَری آپِشِه و چَی به دوملَه دوا بکَرِ یا پیشگویی بکَرِ، اِشتَن سری بی حورمت کَردشَه.

⁵ ولی هر ژِنی سَربَنَسار دوا بَکَرِ یا پیشگویی بکَرِ اِشتَن سَری بیحورمت کَردشَه؛ چَی اِم کار، دِرِست اِمی شیوارَ کن اِشتَن سَری تاشتَش ببو.

⁶ اَگَم ژِنی بَپیشَه کن سَربَنَسار ببو، پس پی اِشتَن زِلفون کتا آکَرِ؛ و اِمی خونه کن ژِنیرا عَیبَه کن اِشتَن ذِلفون کتا آکَرِ یا بتاشِه، پس پی اِشتَن سَری دَپوشامنِه.

⁷ مِرد نِبایَد اِشتَن سَری دَپوشامنِه، اِمی خونه کن اَ، خدا صَفَت و شکوه و جَلالَه؛ ولی ژِن، مِردی شکوه و جَلالَه.

⁸ اِمی خونه کن مِرد ژِنیکا بوجود آمَه نییَه، بَلکَم ژِنَه کن مِردیکا بوجود آمَیَه؛

⁹ و مِرد ژِنیرا خلق بَه نی، بَسکَم ژِن مِردیرا خلق بَیَه.

¹⁰ اِمی خاطر، فرشتَه اون خونه، ژِن پی اِشتَن سَریکا زاکینَه نوشونی بِدارِ.

¹¹ با ام وجود، خداوندی دِلَکا، نِه ژِن مِردیکا تاکه، نِه مِرد ژِنیکا.

¹² هَتَه کن ژِن مِردیکا بوجود آمَه، مِرد نی ژِنی واسیطَنه بوجود آ، و اِم چییِن گِرد خداکارَ.

¹³ شمه اِشتَن قیضاوت بکَرَ: ژِنیرا دِرِستَه کن سَربَنَسار خدا درگارا دِوا بکَرِ؟

¹⁴ مگَم طبیعت، اِشتَن بَشِمَه آموج نییَدا کن اَگَم مِردی دِرازَ ذِلف بدارِ، چَیرا عَیبَه،

¹⁵ ولی اَگَم ژِن دِرازَ ذلف بدارِ، چَیرا ایفتخار بَبی؟ اِمی خونه کن درازَ ذلفی پوشامنیه را ژِنی شون دوعَیَه.

¹⁶ ولی اَگَم کَسی بخا اِشتَن سازی بژَنه، پی بواجم کن اَمَرا و خدا کلیسا اونرا اِنتَرَ رسمی نیَه.

خداوندی سور

¹⁷ اَمّا اَ چیی ایکا کن ایسَه بَشِمَه حِکم بَکَم، بَشِمَکا تَریف نَمدا، اِمی خونه کن وقتی شِمَه یَندِ وَر گِرد آبَه، فایَدَ عَوَض، ضرَر بَداشتیرون.

¹⁸ اول اِمکن دَرستمه وقتی یَندِ وَر کلیسا خونه جَم آبَه، شمَه دلَکا بَرکَه جدایی ایی دَرَگنِست، و اِمی تلَکَه ایی باوَر بَکَمه.

¹⁹ شمَه دَلَکا جدایی پی ببو تا اِنتَرَکه اَیِنی کن واقییَن ایمان بداشتین شمَه دِلَکا دیار آبو.

²⁰ وقتی کن شمه ایی جِگاکا گِرد آبَه، خداوندی سوری هِردِ خونه نییَه

²¹ اِمی خونه کن غَذا هَردِ موقه، هر کِرَم شِمَکا بی اِمکن دییَری مونتظیرببو اِشتَن سوری بَردی، و اِم کار باعیث بَبی کن اییی نفر انشتا بَمَندی دییَری مَست آرَب.

²² مَگَم هردِ و هِنتِرا شمَرا کَه نی؟ یا اِم کن خدا کلیسا گِچ بَحیساب بوعَردیرون و دَس دَریسه آدَمون گِچ بَکَرون؟ بَشِمَه چِه بواجم؟ شمَه اِم کاریرا بَشِمَه تَریف بدَرم؟ نِه نِمَکرد.

²³ چون اَ چیی ایی کن اَز شمَه دَست آدامَه، خداوندیکا ویگَتمه، کن عیسای خداوندِشون اَ شَوی کن بَی غَنیمی تَسلیم آکَردَ، نونی پِگَتِشَه

²⁴ و شکر کَردِ بَه دوملَه پِزارنِستِشَه و واتش: «اِمه چمن تَن شمَه خونه. اِم کاری چم یادیرا اَنجوم بدَرَ.»

²⁵ هِنتَرَکه، سوری بَه دوملَه گولَه پِگَتِشَه واتِش: «اِم گولَه، تازَ عَهدیَه چمن خونی دِلکا. هر موقه کن اَیکا بِنتیرون، چمن یادیرا اِنتَرَ بکَرَ.»

²⁶ اِمی خونه کن هر موقه اِم نونی بَرَ و اِم گولَکا بِنجَه، تا زمانی کن خداوند هَنی ویگَردِ، چَی مرگی اییلام بَکَرون.

²⁷ پس هَر کم اَتَه کن دِرِست نییَه نونی بَرِ و خداوندی گولَکا بِنجِه، خداوند عیسی خونی خاطر تقصیر کار بَبییَه.

²⁸ هر کَم نارتَر از اِمکن نونیکا بَرِ و گولَکا بِنجِه، بَشتن ورداورد بکَرِ.

²⁹ اِمی خونه کن هَر کَم بی اِمکن خداوندی تَنی تشخیص بدَرِ، بَرِ و بِنجِه، اِشتَن مَحکومیَتی هَردَشَه و هِنتَشَه.

³⁰ اِمی خاطِرَ کن خَیلی شِمَکا عِجِز و آزاری اینَه و کاولَه ایی مَردَ اینَه.

³¹ ولی اَگَم بَشتَنرا حِکم اَکَریمون، چَمَه سَر حِکم نَبیَه.

³² ولی اَموقه ایکا کن خداوند چَمه سَر حکم بَکَی، اَدَب بَبیمون تا دِنیا آدَمونَّه محکوم آنِبَم.

³³ پس چمن برا اِن، وقتی هردِرا ِیَندِ وَر گِرد آبَه، یَندِ مونتظیر بومونه.

³⁴ اَگَم کَسی وشیشَه، اِشتَن کَکا غذا بَرِ تا شمه جَم آبه یَندِنَه، محکوم بِه باعیث مَبو. بقیَه چییون خونه نی، وقتی شمه وَر آمیم، بشِمه باتیم.