اوّلین نامَه قورَنتیانیرا 10 - کتاب مقدس به زبان تالشي - گویش مرکزیهشدار بوت پرستی زِرَبَرا 1 برا اِن، اِمی خونه کن نَپیمَه اِم موضوع یادیکا بَرکَرَ کن چَمَه بابا اِن گرد خِری بنیکا بینَه و گِرد نی دَیرا دِلَکا دَیوَردین. 2 اَیِن گِرد خِریکا و دَیراکا غسل تعمیدشون گتَه، اِم کارینَه آمونِستِشون کن موسی پِیروو آنّب، 3 و گِرد هه روحانیَه هَردَ چیی هَردِشون 4 و هه روحانیَه هِنتَنی نیکا هِنتین؛ اِمی خونه کن اَ روحانیَه کازَ مَغاریکا هِنجینَه کن چَوون دوملَه آی، و اَ کازَ مَغار مَسیح بَه. 5 گِردِ ام چییونَّه، خدا چَوون ویشتَریکا راضی نِبَه، اِمی خاطِر چَوون مِیتِنِش وَیاوونی اِم سَر اَ سَریکا ولاخ آکردَ. 6 ایسَه، انتَرَ ایتفاقن دَگِنستَه تا چَمَرا سرمشق ببو، تا اَمه هنتَه چَوون شیوار بدی دملَه مبَم. 7 پس هَتَه کن بَعضی اَوونکا بوت پرست آبین، شِمَه مبَه؛ هَتَه کن کیتاو توراتیکا نوشتَه آبه یه: «قامی آدَمِن عَیاشیرا نِشتین و الواتی و عَرخ هِنتِرا راست آبین.» 8 و هَتَه کن بضی اَوونکا بی عیفَتی کَردِشونَه و ایی روجیکا بیستو سِه هَزار نفر نیفلَه آبینَه، اَمه بی عیفتی نِکَرم. 9 و اَمه نِباید مسیح وَرداوَرد بکَرم، هَتَه کن بعضی اَوونکا کَردشونه و نَلَتییِن اَیِنشون کِشتَه. 10 گِلَی نِکَرَ، هَته کن بَعضی اَوونکا کَردشونه و نیفیت آکَر، اَیِنش نیفلَه آکَرد. 11 ایسَه اِم چییِن اَوونرا ایتفاق دگِنستَه تا سرمشق ببو و نوشتَه آبَه تا چَمَرا درس عیبرَت آبو، کن اِم دوورَکا کن آخیرَ زَمانَه زندَگی بَکمون. 12 پس اَ کن گَمون بَکی آمبَستَه، هَواسِش ببو کن بَنِرگِنَه! 13 هیچ وَرداوردی کن دییَرَ اینسانون سَر آمَه مَبو شمَه سَردِرِ نا. خدا وفادارَ؛ اَ ایجازَ نییَدا شمَه اینجاریکا ویشتَر وَرداورد ببَه، بَسکَم وَرداوردی موقه، بروَزَ بَرَ ایی شِمَرا آمادَ آرَکَرد تا اَیکا تاو بوعَرَ. 14 پس چمن خاجَتییِن، بوت پَرستیکا بیوریجَه. 15 اَفَمونَّه کام گَف ژ؛ شمَه اِشتَن اَ چیی ایی خونه کن باتیمَه قیضاوت بکَرَ. 16 مَگَم اِم بَرَکتَه گولَه کن چَی خونه شِکر بکَمون، مَسیح خونیکا شَریک بِه نییَه؟ و نونی کن پِسَه بَکَمون، مَسیح تَنیکا شریک آبِه نییَه؟ 17 اِمی خاطر کن نون ایلَیَه، اَمه نی کن خَیلی ایمون، ایلَه تَن هِستیمون، اِمی خونه کن گِرد ایلَه نونیکا بَرَ بَبَردیمون. 18 ایسرائیلی قامی بِوینَه: مَگَم اَیِن کن قربونیون هَرینَه مَذبخ کا شریک نِه آبین؟ 19 پس چمن مَنظور چه چییَه؟ هَردَ چیی ایی کن بوتی تقدیم بَکَن با اَرزِشَه یا اِمکن بوت اِشتَن با اَرزِشَه؟ 20 نِه، چمن منظور اِمه کن بوت پَرستون قِربونییِن خدا تقدیم نییَبن بَلکَم پَریانون تَقدیم بَبی، و اَز نِمَپی شمه پَریانونَّه شریک آبَه. 21 شمه نینَّشا هِم خداوندی گولَکا بِنجَه و هم پَریانون گولَکا؛ شمه نینَّشا هم خداوندی سفرَکا بَرَ و هِم پَریانون سفرَکا. 22 مَگَم بَپیمون خداوندی غَیرَتی آکَرم؟ اَمه خداوندیکا قودور تَریمون؟ 23 «گِردِ چییِن جایِزَ» ولی گِردِ چییِن مِفَت نینَّه. «گِردِ چییِن روا اَ» اَمّا گِردِ چییِن بنا نییَکَرد. 24 هیچ کَم اِشتَن نفعی دوملَه مبو، بَسکم اِشتَن خَمسوعَه نفعی دوملَه بِبَه. 25 هر گوژدی کن قصابیکا بَخِرَتین، بی اِمکن اِشتَن ووژدانیکا دَپرسَه، اَی بَرَ، 26 اِمی خونه کن «زمین و هر چیی ایی کن چَی دِلَکارَ خداوندی شِنه.» 27 اَگَم بی ایمانَه آدَمی بَشِمَه غذا هَردِرا صَلا بَژَی و شمَه نی بَپیرونَه کن بِشَه، هر چیی کن شمَه نَ کا آرَنا، بی اِمکن اِشتَن ووژدانی خونه سوالی دَپرسَه، بَرَ، 28 ولی اَگَم کَسی بَشِمَه بواجه: «اِم گوژد بوتونرا قِربونی بَیَه.» اَ کَسی کن اِم گَفی بَشِمَه ژَشه ووژدانی خاطر، اَی مَرَ 29 البَت چمن منظور اَ آدَمی ووژدانَه نِه شمَه ووژدان. اِمی خونه کن چییرا دییَرَ شخصی ووژدان پی چمن رخِستِه را حِکم بکَرِ؟ 30 اَگَم شکر کَردِنَه هَردَ چیی ایی بَردیم، چیرا پی اَ چیی ایی خونه کن چَیرا خدا شکر بَکَم، بَمن محکوم بکَن؟ 31 پس هَر چیی ایی بردیرون، هر چیی ایی بِنتیرون و یا هر کاری بَکَرون، گِردِ اِم کارون خدا شکوه و جلال دوعه خونه اَنجوم بدَرَ. 32 هیچ کَسی بَرضَخ آنِکَر، چِه یهودی اِن ، چِه یونانی اِن و چِه خدا کلیسا، 33 هَتَه کن اَز نی، تقلا بَکَم تا گِردی هر جوری کن بَشام راضی آکَم. اِمی خونه کن اِشتَن نفعی دوملَه نیمَه، بَسکم خَیلیون نفعی دوملَه ایم تا نیجات بیگِن. |
@ 2024 Korpu Company