اوّلین نامَه قورَنتیانیرا 1 - کتاب مقدس به زبان تالشي - گویش مرکزی1 پولوسی طَرَفیکا، کن خدا خواستَنه خِله آبَه تا مسیح عیسی، رسول ببو، و چَمه برا سوسْتِنِسی طَرَفیکا، 2 خدا کلیسارا کن شهر قورنتوسیکارَ، و اَیِنی کن مَسیح عیساکا تَقدیس بَه اینه و اَیِنشون صَلا ژَیه تا یندِنه موقَدس ببون، گِردِ اَیِنی نَه کن هر دییَرَ جِگاکا چَمه خداوند عیسی مسیح نومی خِلِه بَکَن، کن چَمه خداوند و چَوون خِداوندَ: 3 فیض و صلح سلامتی چَمَه دَدَ خدا طَرَفیکا، و خداوند عیسی مسیح طرَفیکا، شمَه سَردِرِ ببو. شکر کَردِ 4 اَز اوزون اِشتَن خدا، شِمَه خونه و خدا اَ فیضی خونه کن مسیح عیساکا بَشِمَه بخشِستَشه، شکر بَکَم. 5 اِمی خونه کن شمَه مسیح دِلَکا هَر چیی ایکا، گِردِ کلامیکا و هَمه اِ اَلمند گیریکا غنی آبَه ایرون 6 حتی چَمه شاهیدی مَسیح سَردِرِ شِمَه دِلَکا تَایید آبَه، 7 هَته کن شمَه چَمه خداوند عیسی مسیح ویگَردستِه مونتَظِریرون، هیچ خَلا ایکا بی نَصیب نیرون. 8 اَ بَشِمَه تا بَه آخیر آمبَست غَم بَردیَه، تا چَمه خداوند عیسی مسیح روجیکا بی تقصیر ببَه. 9 خدا وفادارَ، اَ خِدایی کن بَشِمَه صَلا ژَشَه، تا چَی زوعَه، چَمه خداوند عیسی مَسیح نَه رَفِق ببَه. جِدایی کلیسا دِلَکا 10 برا اِن، چَمه خداوند عیسی مَسیح نومینَه شِمَکا خاشتو خازِمَه کن یَندِنَه یَک دل ببَه، تا شِمَه مینَکا تَفرَقَه مبو. بسکم شمه دلَکا هِم فکریکا و هِم نَظَریکا ایلَه آبَه. 11 چمن برا اِن، اِمی خونه کن خَلوئَه کَه آدَمِن بَمِنِشون خَبَر دوعَه یَه کن شِمَه مینَه کا بَرکَه ژِژِ اییَه. 12 چمن منظور اِمَه کن شِمَه باتیرون، «اَز پولوسی پِیرُو ایم»؛ دییَرَ کَسی باتی، «اَز آپولوسی پِیرُو ایمَه»؛ ایلَه باتی، «اَز کیفا پِیروایم»؛ و دییَرَ کَسی باتی، کن «اَز مَسیح پیرو ایمَه.» 13 مَگَم مسیح قسمت بَیَه؟ مَگَم اَ کن شِمَرا صلیبی سَردِرِ جیبَستِشون و کِشتِشون پولوس بَه؟ مَگَم شمَه پولوسی نومینَه غسل تعمید گَتِرون؟ 14 خدا شکر بَکَم کن غَیراَز کْریسپوس و گایوس، هیچ کِرَمی شِمَکا تعمید آنِدامه، 15 تا کَسی مَشا واتِه چمن نومینه تعمید گَتَرونَه. 16 اَلبت اِستِفاناسی کَه آدَمون نی تعمید دامَه؛ ولی یادیکام نییَه کن دییَرَ کَسی تَعمیدِم دوعَه ببو. 17 اِمی خونه کن مسیح بَمن نَندِشَه تا تعمید بدرم بَسکم عندِشَه تا انجیلی خَشَه خَبری موعیظَه بکَم، ولی نِه دِنیا حکیمه گَفونَّه کن قانِه بَکنَه، تا نِکَرِ کن مَسیح صلیبی خِنر، هیچ آبو. خدا خِنَر و مسیح حیکمت 18 اِمی خاطر کن صلیبی پَیغوم اَیِنیرا کن نیفله بَبین نادونیَه، ولی اَمرا کن خدا نیجاتی راه دلَکامون، خدا خِنَرَ. 19 اِمی خونه کن اِشعَیای پَیغمبری کیتاویکا نوشتَه بَیه: «حَکیمون حیکمتی نیفیت بَکَمه اَفَهمون فهمی هیچ آمَکَرد.» 20 حَکیمَه آدَم کِرَم جِگاکارَ؟ توراتی موعَلِم کِرم جگاکان؟ اِم زَمونه کا نظر اَدَر کِرَم جگاکااینَه؟ مَگَم خدا دِنیا حیکمتی، نادونیش نِکردَ؟ 21 چون اَ جِگا ایکا کن خدا حیکمتی خونه دِنیا نِشتِشَه حیکمَتی راه نَه خدا آزنِه، خدا مَصلَحتی اِنتَر ویندِشَه کن هِم نادونی را نَه کن اَمه موعیظَه بَکَمون، اَیِنی کن ایمان بوعَردین، نیجات بدَرِ. 22 اِمی خونه کن یَهودییِن نِشونه و موعجیزَ اَپیشونه و یونانی اِن حیکمَتی دوملَه این، 23 ولی اَمه مصلوب آبَه مسیح موعیظَه بَکَمون کن یهودیونرا لِسکیستِه سِه اَ و غَیر یَهودیونرا نادونیَه، 24 ولی اَیِنیرا کن خِلِه بَه اینه، چه یهودی ببون چه یونانی، مسیح، خدا خِنَرَ و خدا حیکمَتَه. 25 چون اَ چیی ایی کن خدا خونه نادونی بَویندیمون، اینسانی، حیکمتیکا حَکیمانَه ترَ و اَ چیی ایی کن خدا خونه عِجِز گیری بَموستیمون، اینسانی اینجاریکا قودورترَ. 26 برا اِن، اِشتَن وضو اوضا یاد آرَفنَه: اَ هَنگومی کا کن خدا بَشِمَه خِلِش کردَ. شمَه ویشتَری، دِنیا ارزشونَّه، حکیم بَحیساب نامیرون؛ و شمَه ویشتَری، قودرَت مَندونکا و نجیب زادَ اونکا نِبیرون. 27 ولی خدا اَ چیی ایی کن دِنیا اَی نادونی اَزنی؛ اینتخاب کَردشَه تا حکیمون شرمندَ آکَر، خدا اَ چیی ایی کن دِنیا بَی عِجِز بَموستی، اینتخاب کردِشَه تا قودرَت مندون شرمندَ آکَرِ؛ 28 خدا اَ چیی ایی کن اِم دِنیا اَی پست و گِچ بَموستی، حتی اَ چیی اِنی کن وِجودِشون نییَه، اینتخاب کَردشَه تا هَر چیی ایی کن وِجود بَداشتی هیچ آکَرِ، 29 تا هیچ اینسانی خدا ناریکا ایفتخار نِکَرِ. 30 و چَی خونه اَ کن، شِمَه مَسیح عیسی دِلَکا هِستیرون، اَ مسیح عیسی کن خدا طَرَفیکا آمَه و چَمَرا حیکمَت آبَه یَه، یعنی چَمه صالح بِه، قودوسیَّت و رَخِستِه. 31 تا هَتَه کن ارمیای پَیغمبَری کیتاویکا نوشتَه آبَه یَه: «هَر کَم ایفتخار بَکَی، بَه خداوند ایفتخار بکَرِ.» |
@ 2024 Korpu Company