Зекерья 3 - Мукъаддес Китап

Дёртюнджи руя. Баш руханий

¹ РАББИ манъа Мелегининъ огюнде тургъан баш руханий Ехошуаны ве оны къабаатламакъ ичюн сагъ тарафында тургъан Къабаатлайыджыны косьтерди.

² РАББИнинъ Мелеги Къабаатлайыджыгъа: – Къабаатлайыджы, РАББИ сени сёгсюн! Ерусалимни сайлагъан РАББИ сени сёгсюн! О адам атештен чыкъарылгъан яры янгъан одун парчасы киби заваллы дегильми? – деди.

³ Ехошуа исе Мелекнинъ огюнде кирли урбанен тура эди.

⁴ Мелек огюнде отургъанларгъа: – Кирли урбаларыны устюнден чыкъарынъыз, – деди. Сонъ Ехошуагъа: – Бакъ, къабаатынъны устюнъден алдым ве санъа байрамлыкъ урба кийдирем, – деди.

⁵ Даа бойле деди: – Башына темиз бир сарыкъ сарынъыз. Онъа урба кийдирдилер ве башына темиз сарыкъ сардылар. РАББИнинъ Мелеги де янында тура эди.

⁶ РАББИнинъ Мелеги тенбиелеп, Ехошуагъа бойле деди: – Ордуларнынъ РАББИси бойле дей:

⁷ Эгер сен Меним ёлларымдан юрсенъ ве Манъа хызмет этсенъ, адалетнен Эвимни башлыкъ этеджексинъ ве азбарымны къоруйджакъсынъ. Мында тургъанларнынъ арасында юрмеге Мен санъа ёл береджегим.

⁸ Эй, баш руханий Ехошуа, сен ве огюнъдеки, мында олгъанлары яхшы бельги олгъан аркъадашлар, динъленъиз! Бакъынъыз, Мен «Пытакъ» къулумны алып кетирем.

⁹ Мен Ехошуанынъ огюне таш къойдым! Бу ташнынъ устюнде еди козь бар. Онынъ устюне бир язы ояджагъым, – дей Ордуларнынъ РАББИси, – ве бир куньде бу топракънынъ гунасыны алып ташлайджагъым.

¹⁰ О куню эпинъиз бири-биринъизни озь юзюм ве инджир тереги тюбюнде отурмагъа чагъыраджакъсыз, – дей Ордуларнынъ РАББИси.