Зебур 98 - Мукъаддес Китап

Мукъаддес Аллагъа шукюр

¹ РАББИ – Падишадыр, титресин халкълар! Керувлар устюнде отура О, ер юзю къалтырасын!

² Сионда РАББИ улудыр, Юджедир О, бутюн халкълардан устюндир!

³ Сенинъ улу ве къоркъунчлы Адынъны шуретлесинлер! О – мукъаддестир!

⁴ Падиша къудретлидир, О, адалет севе! Сен догърулыкъны къургъансынъ, Якъупнынъ союна адалет ве акъикъатны косьтергенсинъ.

⁵ Юксельтинъиз Алламыз олгъан РАББИни, Онынъ аякълары астына йыкъылып ибадет этинъиз! О – мукъаддестир!

⁶ Онынъ руханийлери арасында Муса ве Харун бар эди, Смаил де Онынъ Адыны чагъыргъанлар ичинде эди. Олар РАББИни чагъыргъанда, О, оларны эшите эди.

⁷ О, булут дирегинден оларнен субетлешти, олар исе О берген шаатлыкъларны ве низамнамени сакълап туттылар.

⁸ Алламыз олгъан РАББИ, Сен оларгъа джевап бердинъ. Сен оларгъа багъышлайыджы Алла олдынъ, лякин ишлери ичюн джезалайыджы да эдинъ.

⁹ Алламыз олгъан РАББИни юксельтинъиз, азиз дагъында Онъа ибадет этинъиз, чюнки Алламыз олгъан РАББИ мукъаддестир!