Зебур 97 - Мукъаддес Китап

Алла дюньяда падишалыкъ япа

Зебур.

¹ РАББИге янъы бир йыр айтынъыз, чюнки О, аджайип шейлер япты! Озюнинъ онъ къолу, мукъаддес къудрети Онъа гъалебе кетирди!

² РАББИ Озь къуртарувыны косьтерди, халкълар огюнде акъикъатыны ачты!

³ Исраиль халкъына олгъан севгиси ве садыкълыгъыны эследи, дюньянынъ дёрт тарафы Алланынъ къуртарувыны корьди!

⁴ Эй, бутюн ер юзю, РАББИге къуванчнен сесинъизни юксельтинъиз, севинчнен багъырынъыз ве чалгъы чалынъыз!

⁵ РАББИ ичюн сантыр чалынъыз, сантыр чалып, йырлар айтынъыз!

⁶ Боразан ве бору чалып, Падиша РАББИ огюнде къуванчнен къычырынъыз!

⁷ Гурьлесин денъиз ве ичиндекилер, гурьлесин дюнья ве узериндекилер!

⁸ РАББИнинъ алдында дерьялар шувулдасын, дагълар да къошулып севинчнен багъырсын!

⁹ О, ерни укюм этмеге келе. О, дюньяны адалетнен, халкъларны догърулыкънен укюм этеджек!