Зебур 96 - Мукъаддес Китап

Рабби – Падишадыр!

¹ РАББИ – Падишадыр! Ер юзю къувансын, чокъ адалар севинсин!

² Булутлар ве къаранлыкъ – Онынъ этрафында, догърулыкъ ве адалет – тахтынынъ темелидир!

³ Онынъ огюнде атеш юре, этрафтаки душманларны якъып ташлай.

⁴ Онынъ яшынлары дюньяны ярыкълата, ер юзю буны корип титрей.

⁵ РАББИнинъ огюнде, бутюн ернинъ Эфендиси огюнде дагълар балавуз киби ирип кете.

⁶ Коклер Онынъ догърулыгъыны бильдире, Онынъ шуретини бутюн халкълар коре.

⁷ Утансын путларгъа хызмет эткенлер, бош путларынен макътанып юргенлер! Аллаларнынъ эписи, РАББИге ибадет этинъиз!

⁸ Я РАББИ, Сенинъ къарарларынъны эшитип, Сион къувана, Ехуданынъ шеэрлери севине.

⁹ Я РАББИ, бутюн ер юзюнинъ энъ Юджеси Сенсинъ, бутюн аллаларнынъ устюнден Сен юкъарысынъ!

¹⁰ Эй, РАББИни севгенлер, яманлыкътан нефретленинъиз! Озь азизлерининъ джаныны О, сакълай, ярамайларнынъ къолундан оларны къуртара.

¹¹ Инсафлыларгъа нур сачыла, догъру юреклилер къувана.

¹² Эй, инсафлылар, РАББИге къуванынъыз, Онынъ мукъаддес Адыны алгъышланъыз!